Хэгъэгу зэошхом ТекIоныгъэр къызщыдахыгъэр илъэс 80 зэрэхъурэм къыдыхэлъытагъэу Iофтхьабзэу «ТекIоныгъэм и Пхъэшъаб» зыфиIорэр республикэм щырагъэжьагъ.

УзытемыкIощт лъэпкъ зэфэшъхьафыбэу тикъэралыгъошхо щыпсэухэрэм ягушхоныгъэ ишIэжь гъэпытэгъэным ар фэIорышIэщт. Iофтхьабзэм къыдыхэлъыта­гъэу, псэупIэу Краснооктябрьскэм дэт мэзхъыз­мэтшIапIэм пхъэшъэбэ чъыг гъэтIысыжь 50-м ехъу тыгъуасэ щагъэтIысхьагъ.
— Хэгъэгу зэошхом ТекIоныгъэр къыз­щыдахыгъэр илъэс 70-рэ зыщыхъугъэм Мыекъуапэ икъэлэ парк щагъэтIысхьэгъэгъэ пхъэшъэбэ чъыгым къычIэтхы­гъэх непэ дгъэхьазырыгъэ гуакIэхэр. А чъыгыр къызтекIыгъэр Сталинград зэошхом псаоу къелыжьыгъэ илъэси 100-м ехъу зыныбжь пхъэшъабэу Волгоград игупчэ къыщыкIырэр ары, — къытфиlотагъ АР-м имэзлэжьхэм яобществэ итхьаматэу Хьатикъое Мэджыдэ.
Шъугу къэдгъэкIыжьын, «Текlоныгъэм ипхъэшъабэхэр» къэралыгъом ишъолъыр зэфэшъхьафхэм — паркхэм, скверхэм, гупчэхэм ащагъэтIысхьагъэх ыкIи ахэм адэжь шIэжь зэхахьэхэр, Iофтхьэбзэ зэфэшъхьафхэр ащырагъэкIокIых. Тикъэ­лэ парк къыщыкIырэ пхъэшъэбэ чъыгыр илъэсипшIым къыкIоцI метрэ 16 илъэгагъэ, чъыгыпкъым сантиметрэ 22-рэ ишъомбгъуагъэ хъугъэ.
Джы ащ къычIахыгъэ гъэтIысыжьхэр мэзхъызмэтшIапIэм иIофышIэхэу Хьати­къое Хьазрэт, Батышэ Налбыйрэ Джамбулатрэ, Бэрзэдж Айдэмыр егугъухэзэ агъэтIысхьагъэх, ищыкIэгъэ чIыгъэшIури рагъэкIугъ. Бжыхьэм ехъулIэу лъапсэхэр задзыкIэ, мэзлэжьыным епхыгъэ еджэпlи 8-у республикэм итхэм ащагъэтIысхьанхэу атырагощэщтых.
Iэшъынэ Сусан.