АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ иколлегие изэхэсыгъо автомобиль гъогухэм я ГъэIорышIапIэу «Адыгеяавтодорым» щыкIуагъ.

2024-рэ илъэс IофшIагъэр ащ щызэфахьысыжьыгъ, 2025-мкIэ зэшIохыгъэн фаехэр щагъэнэфагъэх. «ЩыIэныгъэм пае инфраструктурэр» зыфиIорэ лъэпкъ проектым ипхырыщын анахь шъхьаIэу зытегущыIагъэхэм ащыщ. Iофтхьабзэр зэрищагъ Министерствэм ипащэу Валерий Картамышевым.
«Щынэгъончъэ ыкIи шэпхъэшIухэм адиштэрэ гъогу­хэр» зыфиIорэ лъэпкъ проектэу икIыгъэ илъэсым зипIалъэ аухыгъэм къыдыхэлъытагъэу «Адыгеяавтодорым» гъэре­кIо ышIагъэм, къихьэгъэ 2025-мкIэ гухэ­лъэу яIэхэм ащигъэгъозагъэх ГъэIорышIапIэм ипащэу Алексей Корешкиным. Ащ къызэриIуагъэмкIэ, проектым ишIуагъэкIэ икIыгъэ илъэсым шъолъыр мэхьанэ зиIэ гъогу Iахь 18, ар километрэ 48-рэ мэхъу, Кощхьэблэ районым ит къуаджэу Фэдз илъэмыдж, метрэ 219-рэ зэрэхъурэр, агъэцэкIэжьыгъ.
Муниципальнэ гъогухэмкIэ къалэу Мыекъуапэ километри 4,9-рэ, поселкэу Яблоновскэм километри 2,3-рэ ащагъэкIэжьыгъ.
— Лъэпкъ проектым къыдыхэлъытагъэхэм язэшIохын 2024-рэ илъэсым пстэумкIи сомэ миллиардрэ миллион 900-рэ тефагъ. Ащ щыщэу сомэ миллиардрэ мин 500-р шъолъыр мэхьанэ зиIэхэм, миллион 482-р чIыпIэ гъогухэм апэIухьагъ. IофшIэнхэр пIалъэхэм адиштэу зэшIохыгъэ хъугъэх, ахъщэр зэрищыкIагъэм тетэу дгъэфедагъэ, — къыIуагъ шъолъыр ГъэIорышIапIэм ипащэ.
«ЩыIэныгъэм пае инфраструктурэр» зыфиIорэ лъэпкъ проектыкIэм къыдыхэлъытагъэу 2025-рэ илъэсым ашIэщтхэми Алексей Корешкиныр къатегущыIагъ.
— Мыгъэ гъогу Iахь 25-рэ икIэрыкIэу тшIыжьын тыгу хэлъ. Ар километрэ 70,1-рэ мэхъу, сомэ миллиардрэ миллион 500-рэ тефэщт. Марат Хуснуллиным пшъэ­рылъэу къытфишIыгъэм тетэу, гъогухэм ягъэцэкIэжьын епхыгъэ зэзэгъыныгъэхэр тшIыгъахэх. IофшIэнхэр 2025-м иIоныгъо и 1-м шIомыкIэу тыухынхэ фае. Джащ фэдэу лъэмыджитф мыгъэ дгъэцэкIэжьыщт. Ар зэкIэмкIи метри 196-рэ мэхъу. АхэмкIэ зэзэгъыныгъэхэм ягъэхьазырын мэлылъфэгъум и 1-м ехъулIэу тыухыщт. Илъэсым ыкIэм нэс IофшIэнхэр тыухынхэу проектым къыщыдэлъытагъ, — къыIуагъ «Адыгеяавтодорым» ипащэ.