Гъатхэм иапэрэ мазэ мэфэкIхэмкIэ бай: гъэтхапэм и 10-р — АР-м и Конституцие и Маф,
и 14-р — адыгабзэмрэ тхыбзэмрэ я Маф. МыхэмкIэ, шэны­шIу зэрафэхъугъэу, АР-м и Лъэпкъ тхылъеджапIэ краеведениемрэ литературэмрэкIэ иотдел къэгъэлъэгъонхэр ыгъэхьазыры­гъэх.

АР-м и Конституцие республикэм щызэдэ­псэу­рэ лъэпкъхэмкIэ анахь мэхьанэшхо зиIэ лэжьыгъ. Ащ изэгъэзэфэн-зэгъэкIун илъэс зыщыплIым депутат­хэр дэлэжьагъэх, шъыпкъэм тетэу, нэфагъэ хэлъэу Iахь пэпчъ гъэпсыгъэ; ныдэлъфыбзэ-адыгабзэр ухъумэгъэныр ыкIи тишъыпкъэу хэти зэгъэшIэ­гъэныр, адыгэ шэн-хабзэ­хэмкIэ анахь мэхьанэ зиIэ нахьыжъ-нахьыкIэ зэфыщытыкIэхэр мыщ щыхэ­гъэунэфыкIыгъэх.
Илъэс 30 хъугъэу Адыге­им и Конституциеу лажьэрэм фэгъэхьыгъэ къэгъэлъэгъоныр зыгъэ­хьазырыгъэр тхылъ­еджапIэм иIофышIэ чанэу Айтэчыкъо Рузан. Къэ­гъэлъэгъон баеу «СурэтышI ыкIи тхэкIо IэпэIас» зыфиIорэр зэлъашIэрэ сурэтышIэу, журналистэу, тхакIоу илъэсипшI пчъа­гъэхэм лъэпкъым игу­шъхьэлэжьыгъэ хахъо фэзышIырэ Къат Теуцожь илъэс 80 мы мафэхэм зэрэхъугъэм фэгъэхьыгъ.

Илъэс къэс гъэтхапэм и 14-м адыгабзэмрэ тхыбзэмрэ я Мафэ хагъэунэфыкIы. Ащ фэгъэхьыгъэ къэгъэлъэгъоныр ыгъэ­хьазырыгъ тхылъеджапIэм иIофышIэ ныбжьыкIэу ЛIышэ Данэ.
— Къэгъэлъэгъон пэпчъ зэхьылIагъэм елъытыгъэу, тхылъ зэфэшъхьафхэу уасэ зиIэхэр, мы темэр икъоу къизыIотыкIыхэрэр, гъэзет ыкIи журнал хэутыгъэхэр бэу ащыгъэфедагъэх, — къеIуатэ Рузанэ, — Ахэр тиреспуб­ликэ идокумент къодыехэр арымырэу, щыIэкIэ-псэукIэ шапхъэхэри щыIэныгъэ лъэныкъо пстэумкIи къащызэхэфыгъ. Урысыем инароднэ сурэтышIэу ыкIи тхэкIо гъэшIэгъонэу Къат Теуцожь лIэшIэгъуныкъом нахьыбэм иакъылрэ икъэ­лэмрэкIэ илъэпкъ зэрэ­фэлажьэрэр, исурэтхэм афэдэ къабзэу, итхылъ­хэри зэрэгъэшIэгъонхэр, иадыга­бзи иурысыбзи зэпэщачэу зэрэтхэрэр, исурэтхэр нэплъэгъум имы­закъоу, гур аубытэу зэрэщытхэр ятэгъашIэ.
Дзэукъожь Нуриет.
Сурэтхэр: Лъэпкъ тхылъеджапIэр.