Мыекъуапэ щэкIо
Лъэс зекIонымкIэ марафонэу «Гъэмафэм тыпэгъокIы» зыфиIорэр республикэм икъэлэ
шъхьаIэ щэкIо. Ащ кIэщакIо фэхъугъ Мыекъуапэ физическэ культурэмкIэ ыкIи спортымкIэ и Комитет.
Адыгеим имызакъоу, къэралыгъом ишъолъыр зэфэшъхьафхэм ащыпсэухэрэр Iофтхьабзэм хэлажьэх, зэкIэмкIи нэбгыри 190-рэ. ЗэхэщакIохэм къызэраIуагъэмкIэ, мэфи 7-м къыкIоцI ахэм лъэбэкъу мини 140-рэ е километри 100 къакIун фае. Зы нэбгырэм мафэм гурытымкIэ километрэ 14-рэ метрэ 285-рэ е лъэбэкъу мин 20 къыкIунэу щыт пшъэрылъыр ыгъэцэкIэным фэшI.
Хабзэ зэрэхъугъэу, Iофтхьабзэм хэлажьэхэрэм азыныкъом ехъум марафоныр зэрифэшъуашэу акIу, ахэм ягъэхъагъэхэр дипломхэмкIэ къыхагъэщых. Илъэс къэс нэбгырэ 1000-м ехъумэ заушэты. 2020-рэ илъэсым ибжыхьэ щегъэжьагъэу рагъэкIокIырэ Iофтхьабзэм цIыфхэр зэрепхых, ащ дакIоу япсауныгъи агъэпытэ.