АР-м и ЛIышъхьэу КъумпIыл Мурат иунашъокIэ къэбзэны­гъэм имафэхэр блэкIыгъэ шэмбэтым Адыгеим щыра­­гъэжьагъэх. Ахэр мэлылъфэгъум и 26-м нэс кIощтых. А пIалъэм тишъолъыр икъэбзэныгъэ фэгумэкIырэ нэбгырэ пэпчъ шэмбэт шIыхьафхэм ахэлэжьэ­шъущт.

Мы Iофыгъом фэгъэзэгъэ организациехэм япшъэрылъхэр нахь тэрэзэу агъэцэкIэн, ищыкIагъэ хъумэ студентхэр, кIэлэеджакIохэр, общественнэ организациехэм ялIыкIохэр зыхэлэжьэрэ шIыхьафхэр зэхащэхэзэ ашIын зэрэфаер республикэм ипащэ зэхэсыгъохэм къащеIо.
Шэмбэт шIыхьафым пшъэрылъ шъхьа­Iэу иIагъэр жьыбгъэм зэрихьэрэ хэкIыр Iущыгъэныр, джащ фэдэу зыгъэпсэфыпIэ чIыпIэхэм, саугъэтхэм, гъогу напцэхэм ыкIи мэз шъолъырхэм шIоеу ащызэтырихьагъэр Iущыгъэныр ары.
АР-м тыкъэзыуцухьэрэ дунаим икъэу­хъумэнрэ чIыопс къэкIуапIэхэмрэкIэ и ГъэIорышIапIэ IофшIэным изэхэщэн фэгъэзэгъагъ ыкIи къэралыгъо хэбзэ къулыкъухэм ялIыкIохэм чIыпIэу агъэкъэ­бзэщтхэр афигъэнэфагъэх.
Гъэтхапэм и 15-м республикэм икъэ­лэ шъхьаIэ ичIыпIэ зэфэшъхьафхэм ащыкIогъэ шэмбэт шIыхьафхэм «Адыгэ макъэр» ащыIагъ, хэлэжьагъэхэм ащыщ­хэм гущыIэгъу афэхъугъ. Илъэс къэс мы шэнышIур республикэм щызэрахьэ, зэрафэлъэкIэу къэбзэныгъэм къыфэджэх, ау нафэ зэрэхъугъэмкIэ, чIыопсыр ауцIэ­пIы, цIыфхэм зызыщагъэпсэфырэ чIыпIэхэм, мэзхэм хэкIэу къащаугъоигъэр бэдэд.
Апэу тызIухьагъэр Мыекъуапэ къохьапэмкIэ икъэдэхьэгъу ары. Кровельнэ гупчэм къыщегъэжьагъэу ипподромым къыхиубытэрэ чIыпIэм нэс зыгъэкъэбзэнэу зытефагъэр АР-м экономикэ хэхъоныгъэмкIэ ыкIи сатыумкIэ и Министерств.
— Хабзэ зэрэтфэхъугъэу, тызэхэтэу шэмбэт шIыхьафхэм тахэлажьэ. Мыгъи нэбгырэ 40 фэдиз тыхъоу тыкъэзэрэугъоигъ, мары зэрэшъулъэгъоу, сыхьатым къы­кIоцI тыугъоигъэ хэкIыр бэдэд, джыри тызнэмысыгъэ чIыпIэхэм талъыкIотэщт ыкIи къэбзэныгъэм имафэхэр окIофэ шэмбэт къэс тыкъыдэкIыщт. Тикъалэ къабзэу гъат­хэм техьаным тэри тиIахь хатлъхьэ тшIоигъу, — хигъэунэфыкIыгъ министрэу Шэуджэн Заур.
Мэздахэ илъэгапIэ екIурэ гъогу напцэ­хэм, изыгъэпсэфыпIэ чIыпIэхэм цIыфыбэ ащыугъоягъ. АР-м культурэмкIэ и Министерствэ иIофышIэхэм участкищ къатефагъ, ахэр зэрифэшъуашэу агъэ­къэбзагъэх.
— Бжъэ, апч ыкIи нэмыкI бэшэрэбхэр ары нахьыбэу къэтыугъоигъэ­хэр. Мыщ фэдэ Iофтхьабзэхэм мэхьанэ яI, ау хэкIыр рамыдзыным епхыгъэ пэшIорыгъэшъ Iофтхьабзэхэр нахьыбэу зэхэщэгъэнхэр нахь тэрэзэу сеплъы. Мы чIыпIэхэм защызгъэпсэфыхэрэм Iалъмэкъхэм арылъэу шъонхэр, гъомылапхъэхэр къызахьышъукIэ, ахэр пшыпыжьынхэ зэрэфаер къагурыIон фае, — къыIуагъ министрэу Аулъэ Юрэ.
АР-м и Лъэпкъ хъарзынэщ иIофышIэ­хэми шэмбэт шIыхьаф зэхащагъ. ЯлэжьапIэ къыхиубытэрэ соткэ 35-м нэмыкIэу, пэчIынатIэу къыпыщылъ чIыпIэхэми гъэкъэбзэн IофшIэнхэр ащызэрахьагъэх. Ащ ипащэу БрантIэ Азэмат къызэриIуа­гъэмкIэ, акэцэ чъыгэу щытхэм жьыб­гъэм къыхьыгъэу шъо зэфэшъхьаф зиIэ целофан дзыо цIыкIухэр ящэкIыгъагъэх, ахэр ыкIи къутамэхэм къагокIыкIыгъэхэр зэкIаугъоягъэх. КъэкIощт шэмбэт мафэм хъарзынэщыжъыр зыдэтыгъэ щагоу соткэ 12 хъурэр агъэкъэбзэн гухэлъ яI.
Мыекъопэ кIэлэегъэджэ колледжэу Андырхъое Хъусенэ ыцIэ зыхьырэм егъэджэн IофымкIэ ипащэ игуадзэу Черкес Асхьад къызэриIуагъэмкIэ, хабзэ зэрафэхъугъэу гъэтхэ гъэкъэбзэн Iофтхьабзэхэр рагъэкIокIых. Чъыгхэр зыхэс чIыгухэр студентхэм атIыжьыгъэх, щагу кIоцIхэр агъэкъэбзагъэх. Ом изытет нахь зыпкъ къызиуцокIэ, чъыгыпкъхэр, ахэр къызэрэгъэчъыхьагъэхэр агъэлэщтых.
Культурнэ кIэныр къэухъумэгъэнымкIэ ыкIи гъэфедэгъэнымкIэ ГъэIорышIапIэу Адыгеим щыIэм иIофышIэхэм щэрыонымкIэ спорт комплексым къыщегъэжьагъэу авиаторхэм ясаугъэт нэс къыдиубытэрэ чIыпIэр агъэкъэбзагъ.
— СыдигъокIи мыщ фэдэ Iофтхьабзэхэр щыIагъэх. ЦIыфхэр зэхэтхэу аIэ зэкIэдзагъэу Iоф зэдашIэ зыхъу­кIэ зэрепхых, чIыопсым узэрэфэсакъыщтыр, къэбзэныгъэр зэрахэлъыщтым яшэнышIухэр мыщ къыпхелъхьэх. Къалэр зэрэдгъэкъабзэрэр дэгъу, ар гуIэтыпIэ мэхъу. Ау нахь мэхьанэ зиIэхэм ащыщ ар амыушIоиным тыпылъыным. ЯцIыкIугъом къыщегъэжьагъэу а шэныр ахэтлъхьан фае, ащкIэ гурыт ыкIи апшъэрэ еджапIэхэм ачIэсхэр нахьыбэу шэмбэт шIыхьафхэм къа­хэлажьэхэмэ, хэкIхэр иптэкъунэу зэрэщымытыр къагурыIощт, ащ фэдэ IофшIэнхэм ныбжьыкIэхэр нахь ыпсыхьащтых, — хигъэунэфыкIыгъ ГъэIорышIапIэм ипащэу ЦIыпIынэ Рустем.
Гъэзетэу «Адыгэ макъэми» ауж зыкъыригъэнагъэп. Шэмбэт шIыхьафым къыдыхэлъытагъэу, ащ иIофышIэхэр къэзэрэугъоигъэх. Редакцием ищагу, ащ къыпыщылъ чIыпIэхэр апхъэнкIыгъэх, жьыбгъэм къыхьыгъэ шIойхэр аугъои­гъэх. КъыкIэлъыкIощт шэмбэт шIыхьафхэми тахэлэжьэщт.
Зэфэхьысыжь пшIымэ, Мыекъуапэ идэхагъэ, икъэбзагъэ фэгумэкIырэ цIыфхэм агу етыгъэу Iоф ашIагъ. Арэу щытми, зыхэм агъэкъэбзагъэр, гукъау нахь мышIэми, нэмыкIхэм ауцIэпIыжьын алъэкIыщт. Ащ фэдэ мыхъуным пае хэти къызэринэкIыгъэ хэкIыр Iуихыжьын фае.
Iэшъынэ Сусан.