Хьисапым дунаир зэрепхы
Адыгеим мы мафэхэм щыкIорэ Кавказ хьисап олимпиадэм IэкIыб къэрал 14-мэ ыкIи Урысыем ишъолъыр 20-мэ къарыкIыгъэ кIэлэеджэкIуи 150-м ехъу хэлажьэ. Мы илъэсым ар я 10-у зэхащэ, апэрэу Кыргызстан ыкIи Приднестровскэ Молдавскэ Республикэм ащыщхэми яшIэныгъэхэм ахагъахъо.
Я X-рэ Кавказ хьисап олимпиадэр гъэтхапэм и 14-м къыщегъэжьагъэу и 19-м нэс кIощт. Адыгэ Республикэм гъэсэныгъэмрэ шIэныгъэмрэкIэ и Министерствэ, Адыгэ къэралыгъо университетыр, мы апшъэрэ еджапIэм и Кавказ хьисап гупчэ, республикэ естественнэ-хьисап еджапIэр, «Полярис-Адыгея» зыфиIорэр Iофтхьабзэм кIэщакIо фэхъугъэх.
Олимпиадэр тIоу гощыгъэ, Урысыем, Абхъазым, Узбекистан къарыкIыгъэхэр очнэу хэлажьэх. Армением, Беларусь, Иран, Казахстан, Кыргызстан, Приднестровскэ Молдавскэ Республикэм, Сербием, Тыркуем, Таиланд, Таджикистан, Туркменистан ыкIи Швейцарием якIэлэеджакIохэм пэIудзыгъэ шIыкIэм тетэу яшIэныгъэхэр къагъэлъагъох.
Гъэтхапэм и 14-м мэфэкI шIыкIэм тетэу олимпиадэр Адыгэ къэралыгъо университетым къыщызэIуахыгъ. Iофтхьабзэм хэлэжьагъэх Адыгэ Республикэм и Парламент и Тхьаматэу Владимир Нарожнэр, АР-м иминистрэхэм я Кабинет и Тхьаматэ игуадзэу, финансхэмкIэ иминистрэу Виктор Орловыр, АР-м гъэсэныгъэмрэ шIэныгъэмрэкIэ иминистрэу Евгений Лебедевыр, нэмыкIхэри.
АР-м и ЛIышъхьэ ыцIэкIэ къэзэрэугъоигъэхэм шIуфэс къарихыгъ Виктор Орловым. Мыщ фэдэ мэхьанэшхо зиIэ Iофтхьабзэр Адыгеим зэрэщызэхащэрэм зэрэрыгушхохэрэр ащ къыIуагъ. Естественнэ-научнэ ыкIи инженернэ гъэсэныгъэм хэхъоныгъэ егъэшIыгъэнымкIэ, мыщ епхыгъэ сэнэхьатхэр къыхэзыхыхэрэм япчъагъэ нахьыбэ шIыгъэнымкIэ пшъэрылъэу къафагъэуцугъэм изэшIохынкIэ мы олимпиадэм иIахьышIу зэрэхэлъыщтыр ащ къыIуагъ.
«Хьисапым дунаир зэрепхы» — джары олимпиадэм шъхьэу фашIыгъэр. Мы лъэныкъом ныбжьыкIэхэр нахьыбэу хэщэгъэнхэр, ахэм яшIэныгъэхэм ахэгъэхъогъэныр, чIыпIэ зэфэшъхьафхэм ащыпсэурэ кIэлэеджакIохэр зэпхыгъэнхэр ары пшъэрылъ шъхьаIэу зэхэщакIохэм зыфагъэуцужьырэр.
Олимпиадэм игъэсэныгъэ программэ къыдыхэлъытагъэу ныбжьыкIэхэм зэIухыгъэ лекциехэр афызэхащэх, шIэныгъэлэжь цIэрыIохэм аIокIэх. Кавказ хьисап олимпиадэм къыдыхэлъытагъэу «Интеграл по городу» зыфиIорэ квест-джэгукIэр Мыекъуапэ щыкIуагъ. Адыгэ къэралыгъо университетыр загъэпсыгъэр илъэс 85-рэ зэрэхъурэм ар фэгъэхьыгъагъ.
КIэлэеджакIохэр зыхэлэжьэгъэ уцугъо пэпчъ гъэшIэгъоныгъ, задачэхэр къыщашIых, шъхьадж зыхэт командэм текIоныгъэ къыдихыным фэбэнагъэх. Олимпиадэм изы мафэ пэпчъ шIуагъэ къытэу, гъэшIэгъонэу зэрэкIощтым зэхэщакIохэр пылъых.
ЯшIэныгъэхэм зэрахагъэхъощтым дакIоу языгъэпсэфын программи дэгъоу афызэхащэ, республикэм ичIыпIэ зэфэшъхьафхэр арагъэлъэгъух, тарихъыр, шэн-хабзэхэр къафаIуатэ.
Хабзэ зэрэхъугъэу, Кавказ хьисап олимпиадэр шэпхъэ инхэм адиштэу республикэм щэкIо. Гъэтхапэм и 19-м ар мэфэкI шIыкIэм тетэу зэфашIыжьыщт, анахь шIэныгъэ куухэр къэзыгъэлъэгъуагъэхэр агъэшIощтых.
ДЕЛЭКЪО
Анет.