АР-м и ЛIышъхьэрэ АР-м иминистрэхэм я Кабинет хэтхэмрэ гухэ­кIышхо ащыхъугъ адыгэ сурэтышI цIэрыIоу ПIэтIыощэ Феликс гъэтхапэм и 17-м дунаим зэрехыжьыгъэр ыкIи щымыIэжьым иунагъорэ иIахьылхэмрэ афэтхьаусыхэх.
Республикэм и ЛIышъхьэу КъумпIыл Мурат социальнэ хъытыухэм къызэраригъэхьагъэмкIэ, ПIэтIыощэ Феликс итворчествэкIэ гъэхъагъэу ышIыгъэхэм апае щытхъуцIабэ ыкIи шIухьафтын зэфэшъхьафхэр къыфагъэшъошагъэх. Ар Урысыем изаслуженнэ сурэтышI, Адыгеим илъэпкъ сурэтышI, АР-м и Къэралыгъо шIухьафтын, художествэхэмкIэ Урысые академием идышъэ медаль къыфагъэшъошагъэх.
Суриковым ыцIэкIэ щыт Художественнэ къэралыгъо институтым щызэхэщэгъэ Московскэ художественнэ еджапIэр къызеухым ыуж Московскэ апшъэрэ художественнэ-промышленнэ училищым еджэныр щылъигъэкIотагъ. Мыекъуапэ къызегъэзэжьым, 1979-рэ илъэсым Адыгеим исурэтышIхэм я Союз зэхищэгъагъ, сурэтышI ныбжьыкIэхэм IэпыIэгъу афэхъущтыгъ, республикэм художественнэ искусствэм зыщиу­шъомбгъуным лъапсэ фишIыгъ.
Феликс Мурат ыкъом ыцIэ епхыгъэх лъэныкъо зэфэшъхьафхэу живописыр, графикэр ыкIи тхылъхэм адэтыщт сурэтхэм яшIын. Адыгэ жэрыIо творчествэмрэ нарт эпосымрэ къахэхыгъэ лъэныкъо зэфэшъхьафхэм япхыгъэ паннохэр ыкIи коллажхэр ышIыщтыгъэх, ахэм Iэпэ­Iэсэныгъэ ин зэрахэлъыр къахэщыщтыгъ.
ПIэтIыощэ Феликс цIыф къызэрыкIоу щытыгъ, икIэсагъэп закъыхигъэщыныр. Тыкъэзыуцухьэрэ дунаим идэхагъэ щыгушIукIэу, изакъоу чIыопсым кIэдэIукIыныр ишэныгъ, шэкIонри анахь зыфэщэгъэ лъэныкъохэм ащыщыгъ. А пстэуми къахихырэ гупшысэхэр исурэт гъэшIэгъонхэм, иIофшIэгъэ зэфэшъхьафхэу гупшысэ куу зыхэлъхэм ащигъэфедэщтыгъэх.
«Адыгэ сурэтышIым иIофшIагъэхэр урысые ыкIи дунэе культурэм изы Iахь хъугъэх. IэкIыб къэрал музейхэм ыкIи унэе коллекциехэм ащ исурэтхэр ачIэлъых. Адыгеим имызакъоу, чыжьэу ащ пэIудзыгъэ чIыпIабэми осэшхо къыщыфашIыщтыгъ. ПIэтIыощэ Феликс ищыIэныгъэ ыкIи итворческэ гъогу, игупшысэ куухэр ыкIи иIэпэIэсэныгъэ сурэтышI ныбжьыкIэхэмкIэ гъуазэу щытыщтых ыкIи ащымыгъупшэу а цIыф шIагъор бэрэ агу зэрилъыщтым сицыхьэ телъ», — къыхигъэщыгъ КъумпIыл Мурат.