Урысыем щынэгъончъэнымкIэ и Федеральнэ къу­лыкъу и ГъэIорышIапIэу Адыгэ Республикэм щыIэр зызэхащагъэр мыгъэ илъэс 33-рэ мэхъу.

Ащ фэгъэ­хьыгъэ зэIукIэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет – Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэу КIэрэщэ Анзаур, хабзэм ифедеральнэ ыкIи ишъолъыр къулыкъухэм, хьыкумышIхэм, хэбзэухъумэкIо, уплъэкIокIо-лъып­лъэкIо ыкIи нэмыкI ведомствэхэм яIэшъхьэтетхэр. Урысыем щынэгъончъэ­нымкIэ и Федеральнэ къулыкъу и Гъэ­IорышIапIэу Адыгэ Республикэм щыIэм ипащэу Михаил Кемеровым Iофтхьабзэр зэрищагъ.
Адыгеим и ЛIышъхьэ ишIуфэс псалъэ къызэрэщыхигъэщыгъэмкIэ, мыщ фэдэ хэушъхьафыкIыгъэ къулы­къур зэрэзэхащагъэм мэхьанэшхо иIагъ, социальнэ-эко­номикэ хэхъоныгъэмкIи ащ амалышIу­хэр къытыгъэх.
«Урысыем щынэгъончъэнымкIэ и Федеральнэ къу­лыкъу и ГъэIорышIапIэ изэхэщэн лъэхъэнэ къы­зэрыкIоу щытыгъэп зыкIуагъэр. Советскэ Союзым изэбгырызын икIэухым, Темыр Кавказым бзэджэшIагъэ­хэмрэ сепаратизмэмрэ зызщаушъомбгъугъэ, цIыфхэр мырэзэныгъэ-зэпэуцужьын плъыр-стырым зыщыхэтыгъэхэ лъэхъаныгъ ар. Ау щытыгъэ нахь мышIэми, ГъэIорышIапIэм щылажьэхэрэм Iоф­тхьабзэхэу зэрахьагъэхэм яшIуагъэкIэ гумэкIыгъом нахь къыкIи­чыгъ, зыпкъитыныгъэр къа­ухъумэн алъэкIыгъ, шъолъырым щыпсэурэ цIыф лъэпкъ зэфэ­шъхьафхэр, зэгурыIоныгъэ ахэлъэу, мамыр щыIакIэм игъогу техьагъэх», —къыIуагъ КъумпIыл Мурат.
Шъолъыр къулыкъум изэхэщэнкIэ Iофышхо ышIагъ апэрэ пащэу ащ иIагъэм — Джэнчэтэ Налбый къулыкъум иIофшIэн зэрищыкIагъэм лъыкIахьэу зэхэщэгъэным иIахьышхо хишIыхьагъ.
Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм илъэс 33-м къыкIоцI зыпкъитыныгъэр щыIэнымкIэ, цIыфыр, обществэр ыкIи къэралыгъор щынэгъончъэнхэмкIэ Iофыгъуабэ зэрэзэшIуихыгъэр ащ къыхигъэщыгъ. Рес­публикэм и ЛIышъхьэ къызэриIуагъэмкIэ, а пстэуми яшIуагъэ къэкIуагъ яцыхьэ зытелъыжьэу социальнэ-эко­номикэ зэхъо­кIыныгъэхэр ашIынхэмкIэ, Адыгеим щыпсэухэрэм ящыIакIи нахьышIу хъунымкIэ.
Анахьэу къыхигъэщыгъэр къэралыгъо щынэгъончъэ­ным икъулыкъухэм хэбзэ шIагъоу ахэлъ хъугъэхэр къаухъумэхэзэ, непи а къулыкъум щылажьэхэрэм пшъэ­рылъ инхэр дэгъоу зэрэзэшIуахыхэрэр, Конституционнэ гъэпсыкIэр къызэраухъу­мэрэр, терроризмэмрэ къолъхьэ тын-Iыхынымрэ апэшIуекIохэзэ цIыфхэм ящынэгъончъэн апшъэрэ мэхьанэ зэраратырэр. ХэушъхьафыкIыгъэ дзэ операцием еп­хыгъэ пшъэрылъхэр зыщызэшIуахыхэрэ лъэхъаным терроризмэм пэшIуекIорэ комиссиеу республикэм щызэхэщагъэм ыпашъхьэ ит Iофыгъохэм язэшIохын мы къулыкъур зэрэхэлажьэрэм иIофи хэу­шъхьафыкIыгъэу ар къытегущыIагъ.
Республикэм и ЛIышъхьэ анахьэу анаIэ зытыраригъэдзагъэр а къулыкъум шIуагъэ къэзытырэ Iофэу зэшIуихырэм ишIуагъэкIэ хэгъэгум ианахь шъолъыр рэхьатхэм Адыгеир зэращыщыр ары.
ИкIэухым КъумпIыл Мурат къыIуагъ IэпэIэсэны­гъэу ахэлъым, Адыгеим ихэхъо­ныгъэ яIахьышхоу ха­шIыхьэрэм апае къулыкъум ипащэхэми, ащ щылажьэхэрэми зэрафэразэр. ЩынэгъончъэнымкIэ Федеральнэ къулыкъум и ГъэIорышIапIэу Адыгэ Республикэм щыIэм иIофышIэ заулэми АР-м и ЛIышъхьэ ирэзэныгъэ тхылъхэр афагъэшъошагъэх.
Мы Iофтхьабзэм къыщыгущыIагъэх АР-м и Къэралыгъо Совет – Хасэм и Тхьаматэу Владимир Нарожнэр, щынэгъончъэнымкIэ Федеральнэ къулыкъум и ГъэIорышIапIэу АР-м щыIэм ипащэу Михаил Кемеровыр, АР-м щынэгъончъэ­нымкIэ икъулыкъухэм яветеранхэм я Совет итхьаматэу Сергей Подгорновыр, щынэгъончъэнымкIэ Федеральнэ къулыкъум и ГъэIорышIапIэу АР-м щыIэм иIофышIэхэм яунагъохэм ялIыкIохэр.
ЯкъулыкъукIэ гъэхъэгъэшхохэр зышIыгъэхэм АР-м и Къэралыгъо Совет —Хасэм, щынэгъончъэнымкIэ федеральнэ къулыкъум и ГъэIорышIапIэу АР-м щыIэм яшIухьафтынхэр, джащ фэдэу къулыкъу зэфэшъхьафхэм ятынхэр, зичэзыу цIэхэр афагъэшъошагъэх, ГъэIорышIапIэм и Щытхъу Тхылъи датхагъэх.
ЗэIукIэм ыуж республикэм итворческэ купхэм къагъэхьазырыгъэ концертым еплъыгъэх.
АР-м и ЛIышъхьэ ипресс-къулыкъу къытыгъэ къэбархэмкIэ
Тхьаркъохъо Сафыет.