Сыбзэ сидунай
Адыгабзэмрэ тхыбзэмрэ я Мафэ фэгъэхьыгъэ зэнэкъокъоу «Сыбзэ сидунай» зыфиIорэм изэфэхьысыжьхэр ашIыгъэх.
АР-м и Театральнэ зэхахьэ ныбжьыкIэхэр щагъэшIуагъэх. Фондэу «Гухэлъ — GUKHEL», АР-м культурэмкIэ и Министерствэ, Адыгэ республикэ кIэлэцIыкIу тхылъеджапIэр Iофтхьабзэм кIэщакIо фэхъугъэх. Зэнэкъокъум къекIолIагъэх общественнэ движениеу «Адыгэ Хасэм», Адыгеим гъэсэныгъэмрэ шIэныгъэмрэкIэ и Министерствэ, Адыгэ къэралыгъо университетым, республикэ гъэзетэу «Адыгэ макъэм», АР-м и Лъэпкъ театрэ ялIыкIохэр, нэмыкIхэри.
Адыгэ республикэ кIэлэцIыкIу тхылъеджапIэм ипащэу Елена Демьянковам зэхахьэр къызэIуихыгъ.
Адыгеим, Къэбэртэе-Бэлъкъарым, Къэрэщэе-Щэрджэсым къащагъэхьазырыгъэ видеоролики 150-м ехъу осэшIхэм къаIэкIэхьагъ. Илъэси 3-м къыщегъэжьагъэу 14-м нэс зыныбжьхэр мыщ хэлэжьагъэх. Зэнэкъокъум усэм е рассказым япычыгъо IупкIэу, зэгъэфагъэу хэлажьэхэрэр къеджэнхэу ыкIи видеороликхэр тырахынхэу щытыгъ. Ащ якъэбар кIэкI, ацIэ, алъэкъуацIэ, зыщеджэхэрэр, зыщыпсэухэрэр адыгабзэкIэ къыщаIотагъ.
Лъэныкъоу «Видеосюжет» зыфиIорэм хэлэжьагъэхэм адыгабзэкIэ узыгъэгъозэрэ е сэмэркъэу зыхэлъ сюжетхэр къагъэлъэгъуагъэх: адыгэ хабзэр, адыгэ тхакIохэм япроизведениехэм къахэхыгъэ пычыгъохэр, гущыIэжъхэр, щыIэныгъэм къыхэхыгъэ къэбар щхэнхэр. Ащ хэлажьэхэрэм кадрэм итхэу къаIорэр езбырэу зэрагъэшIагъэу щытын фэягъ, кадрэ кIыбым зи къыщаIо хъущтыгъэп. Iофтхьабзэм хэлэжьагъэхэм шапхъэхэр агъэцэкIагъэх, осэшI купым анахь дэгъухэр къыхихыгъэх.
АР-м изаслуженнэ журналистэу ТIэшъу Светланэ мэфэкI Iофтхьабзэр зэрищагъ.
Илъэси 3 — 5 зыныбжьхэмкIэ хагъэунэфыкIырэ чIыпIэхэр къыдэзыхыгъэхэр:
а I-рэ чIыпIэр — Мерэм Залин, къу. Джыракъый; я II-р — ЛэупакIэ Анзаур; я III-р — Хьэхокъуэ Самина. ХэушъхьафыкIыгъэ шIухьафтынхэр аратыгъэх Джэндар Алимрэ Шэуджэн Эмиррэ.
Илъэси 6 — 10 зыныбжьхэмкIэ: а I-рэ чIыпIэр — МэщлIэкъо Амин; я II-р — Жанджэрый Арианэ; я III-р — ЛIыхъукIэ Тамерлан. Шiухьафтын тедзэхэр: ХъокIон Амин, Цэй Алкъэс, Хъуажъ Батырбый.
ХэушъхьафыкIыгъэ шIухьафтын фагъэшъошагъ илъэси 10 зыныбжь Хэкужъ Дианэ. Ар зыгъэшIуагъэр «Адыгэ макъэм» иредактор шъхьаIэу МэщлIэкъо Саид.
— Зыбзэ уасэ фэзышIыхэрэр нахьыбэ хъухэмэ, лъэпкъыми ыпсэ пытэщт. «Адыгэ макъэм» щылажьэхэрэмкIэ пшъэшъэжъыем иусэ къеджакIэ къыхэдгъэщыгъ ыкIи Щытхъу тхылъымрэ тишIухьафтынхэмрэ етэтыжьых. Дианэ тигъэзет щылэжьэнэу къетэгъэблагъэ, — къыIуагъ МэщлIэкъо Саидэ.
Илъэс 11-м къыщегъэжьагъэу 14-м нэс зыныбжьхэм къахагъэщыгъэхэр:
а I-рэ чIыпIэр — Мэсей Салимэ; я II-р — ТIэшъу Ирин; я III-р — КIыкI Асфар. Шiухьафтын тедзэкIэ агъэшIуагъэх илъэс 11 зыныбжь Бэгъушъэ Камилэрэ илъэс 14 зыныбжь Даяна Касаевамрэ.
«Видеосюжет» зыфиIорэ едзыгъомкIэ шIухьафтын тедзэ зыфашIыгъэр Мыекъуапэ ия 34-рэ лицей икIэлэцIыкIу куп.
А I-рэ чIыпIэр — Очэпщые кIэлэцIыкIу тхылъеджапIэм итеатральнэ купэу «Чэщдэс»; я II-р — Уракъхэу Маринэрэ Даринэрэ; я III-р — Шэуджэн Бэлл, Сапый Инар, Дзыбэ Суанд.
Адыгабзэр зимыдэлъфыбзэхэмкIэ тедзэ шIухьафтыныр Владислав Басовым фагъэшъошагъ. А I-рэ чIыпIэр — Амирина Гаджиевам, я II-р — Эпсирханова Зарэ, я III-р — Ева Прохоровам аубытыгъ. Шiухьафтын тедзэр ратыгъ Владислав Басовым.
Ныдэлъфыбзэм фэгъэхьыгъэ Iофтхьабзэм кIэлэцIыкIухэр нахьыбэу хэлэжьэнэу зэхэщакIохэр мэгугъэх.
Лъэпшъыкъо
Фатим.