БоксымкIэ Къыблэ федеральнэ шъолъырым ипер­венствэу Мыекъуапэ щыкIорэм Адыгэ Республи­кэм ихэшыпыкIыгъэ ­командэ илIыкIохэм медалиплI къыщахьыгъ. ­Гъэтхапэм и 11-м турнирыр рагъэжьагъ, спорт комплексэу «Ошъутен» зыфиIорэм ар щэкIо.

Адыгеир нэбгырэ 42-мэ къагъэ­лъагъо, аныбжь елъытыгъэу ахэм купитIумэ защаушэты. Илъэс 15 — 16 зыныбжьхэм язэнэкъокъу аухыгъ. Урысыем ипервенствэ ифинал едзыгъоу къалэу Суздаль щызэхащэщтым хэлэжьэнхэмкIэ фитыныгъэ къязытырэ путевкэхэм якъыдэхын шъолъырым испортсмен 24-рэ фэбэнагъ. Пшъэрылъыр зыгъэцэкIэн зылъэкIыгъэ закъор Мые­къопэ районым щыпсэурэ Ни­кита Масленниковыр ары. ТикIалэ къинышхо къыщымыхъоу финалым нэсыгъ ыкIи ащ Краснодар краим илIыкIоу Владислав Малаховым щытекIуагъ. Гъэхъагъэу ышIыгъэм ишIуагъэкIэ разрядэу «Спортым имастер хъунымкIэ кандидат» зыфиIорэм ишапхъэ ыгъэцэкIагъ. Боксерыр зыгъасэхэрэр Бегла­ряновхэу Григорий ыкIи Азадуи. Мы тренерхэм первенствэм ифинал едзыгъо хэлэжьэщт нэбгырищ агъэхьазырыгъ. ЫпшъэкIэ зигугъу къэтшIыгъэ Никита Масленниковым нэмыкIэу Ксения Максютарэ Мелик Аветисянрэ.

Джащ фэдэу зэнэкъокъум ха­гъэунэфыкIырэ чIыпIэхэр къы­щыдахагъэх Мыекъуапэ щыщ Валерий Назриевым, Красногвар­дейскэ районым илIыкIоу Максим Дерибасрэ Тэхъутэмыкъое районыр къэзыгъэлъэгъогъэ Давид Фе­доренкэмрэ.
Непэ илъэс 13 — 14 зыныбжьхэм язэнэкъокъу рагъэкIокIыщт, финалистхэр ыкIи джэрз медальхэр къэзыхьыгъэхэр къэнэфэщтых. Мы купым Адыгеим испорт­смен 21-рэ хэт.