Адыгеим и ЛIышъхьэу КъумпIыл Мурат адыгабзэмрэ тхыбзэмрэ я Мафэ тефэу республикэм и Правительствэ и Унэ щыригъэблэгъагъэх Дунэе абхъаз-­абазэ конгрессым и Сыхъум къутамэ ипащэу Темур Реквава, Дунэе абхъаз-абазэ конгрессым икъутамэхэм япащэхэу Дмитрий Жиба, Изольда Хагба, автоном мысатыу организациеу «Алашара» зыфиIорэм иофисэу Щэрджэскъалэ дэтым ипащэу Мурат Гедуговыр, офисым илIыкIоу Нателла Джемакуловар.

ЗэIукIэгъум джащ фэдэу хэлэжьагъэх АР-м лъэпкъ Iоф­хэмкIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, АР-м и ЛIышъхьэ иIэпыIэгъоу Хьакъунэ Бэллэ, гуманитар ушэтынхэм апылъ Адыгэ республикэ институтэу Т. М. КIэращэм ыцIэкIэ щытым ипащэу, адыгабзэм икъэухъу­мэнкIэ ыкIи изэгъэшIэнкIэ Про­ектнэ офисым иIэшъхьэтетэу ЛIыIужъу Адам, офисым иIэ­шъхьэтет игуадзэу Биданэкъо Марзиет.
Шъугу къэтэгъэкIыжьы: 2024-рэ илъэсым жъоныгъуакIэм адыгабзэмкIэ Проектнэ офисым илIыкIохэр Щэрджэскъалэ щыIагъэх, абазыбзэмрэ культурэмрэ язэгъэшIэнкIэ ыкIи якъэухъумэн­кIэ офисэу «Алашара» иIоф­шIакIэ нэIуасэ ахэм зыфашIыгъ. Ащ нэмыкIэу къуаджэу Инжич-­Чукун дэт общественнэ ыкIи бзылъфыгъэ советхэм ащыIа­гъэх, къуаджэу Эльбуркан дэт кIэлэцIыкIу IыгъыпIэу «Марамыз» IофшIэныр зэрэщызэхэщагъэм зыщагъэгъозагъ, абазыбзэр кIэлэцIыкIухэм ягъэшIэ­гъэным пае шIыкIэ-амал зэфэшъхьафхэу ащ щагъэфедэхэрэм, лъэпкъ Iэмэ-псымэхэмкIэ ансамблэу «Апхьарца» зыфиIорэм хэтхэм нэIуасэ зафашIыгъ.

Республикэм и ЛIышъхьэ къы­зэрэхигъэщыгъэмкIэ, Дунэе абхъаз-абазэ конгрессымрэ офи­сэу «Алашара» зыфиIорэмрэ унаIэ зытеудзэнэу щыт Iоф­шIэкIэшIу аIэкIэлъ, шъолъыри­тIуми бзэмкIэ яспециалистхэм ыкIи кIэлэегъаджэхэм щысэшIу афэхъунхэ алъэкIыщт.
«Ныдэлъфыбзэр зэгъэшIэ­гъэнымкIэ ыкIи къэухъумэгъэнымкIэ Адыгеими IофшIэкIэ гъэнэфагъэ иIэ хъугъэ. Типроект офисхэм шIуагъэ къэзытыщт зэдэлэжьэныгъэ зэдыряIэу, лъэпкъыбзэхэр куоу ягъэшIэ­гъэнхэмкIэ амалыкIэхэр къызэрэхахыщтхэм, бзэм фытегъэ­псыхьэгъэ ныбжьыкIэ лагерьхэм ыкIи нэмыкIыбэхэм зызэрарагъэушъомбгъущтым сицыхьэ телъ. Тилъэпкъхэм якультурэ тизэдэлэжьэныгъэ фэIорышIэным мэхьанэшхо иI, тизэхэ­хьэ-зэхэгущыIэжьхэм нахь шIуагъэ къатынымкIи амалышIоу ахэр мэхъух», — къыIуагъ КъумпIыл Мурат.

Конгрессым и Сыхъум къута­мэ ипащэу Темур Реквава къыIуагъ зэкъош лъэпкъхэм ядунэететыкIи языкIыныгъи ащ фэдэ зэдэлэжьэныгъэр лъэ­псэшIу зэрафэхъущтым ицыхьэ зэрэтелъыр.
«Адыгеим тызэрэщыIэр лъэшэу тигуапэ. Кавказым ишъо­лъыр анахь гъэшIэгъонхэм ар ащыщ. ТиIофшIэгъухэм тызэ­гъусэу итхъухьагъэх тызтегущыIэщтхэри, тигухэлъхэри», — къыIуагъ Тимур Реквава.
Дунэе абхъаз-абазэ конгрессымрэ автоном мыкоммерческэ организациеу «Алашара» зыфиIорэмрэ ятарихъ, гъэпсыкIэу яIэм ыкIи япшъэрылъхэм афэгъэхьыгъэу шъхьафэу къыIотагъ. Ащ къызэрэхигъэщыгъэмкIэ, организациехэм япроектхэр зэкIэ зытегъэпсыхьагъэхэр абхъазыбзэмрэ абазыбзэмрэ нахь игъэкIотыгъэу ягъэшIэгъэнхэр, тедзапIэхэм къащагъэхьазырырэ хэутыгъэхэми нахь зарагъэу­шъомбгъуныр. КъызтегущыIа­гъэхэм ащыщых псауныгъэм икъэухъумэн, спортым, культу­рэм алъэныкъокIэ Iофтхьэбзэ заулэхэр. Общественнэ ыкIи бзылъфыгъэ советхэм IэпыIэгъу афэхъух, шъолъыр ыкIи фе­деральнэ министерствэхэмрэ ведомствэхэмрэ адэлажьэх. «Алашарам» пэщэныгъэ адызэрихьэзэ еджапIэхэм кружокхэр ащызэхащэх, пшысэхэр аудио шIыкIэм тетэу агъэхьазырых, абазыбзэкIэ мультфильмхэр зэрадзэкIых. Ижъырэ Iэпэщысэхэр, шэн-хабзэхэр къэухъумэгъэнхэмкIэ, лъэпкъ орэдхэмрэ къашъохэмрэ мыкIодынхэмкIэ IофшIэн гъэнэфагъэ агъэцакIэ.

Мы зэIукIэгъум джащ фэдэу къыщаIуагъ адыгабзэм икъэу­хъумэнкIэ ыкIи ихэхъоныгъэкIэ Проектнэ офисым Iофэу ышIэ­рэм фэхъурэ кIэухым фэгъэхьыгъэу. Ащ ипащэу ЛIыIужъу Адам адыгэ хабзэр къэухъумэгъэ­нымкIэ, унагъохэм ныдэлъфыбзэмкIэ ащыгущыIэнхэмкIэ, адыгабзэр зыщызэрагъэшIэрэ кIэлэцIыкIу IыгъыпIэхэм ыкIи еджапIэхэм хэхъоныгъэ ягъэшIыгъэнымкIэ проектхэм афэгъэхьыгъэу къыIотагъ. Къалэу Мыекъуапэ иурамхэми адыгэ гущыIэжъхэр зытетхэгъэ пкъыгъохэр ащыплъэгъунхэ плъэ­кIыщт, ахэми бзэр къэухъумэгъэным-
кIэ мэхьэнэ гъэнэфагъэ яIэу щыт. ЗышIоигъо пстэуми ыпкIэ хэмылъэу адыгабзэр зэра­гъэ­шIэным пае курсхэр зэхаща­гъэх, ахэри яIофшIэн егугъух. Адыгеим, Къэбэртэе-Бэлъкъарым, Къэрэщэе-Щэрджэсым, Тыркуем яныбжьыкIэхэр зыхэлэжьэхэрэ гъэмэфэ этнолагерьхэми бзэм икъэухъумэнкIэ яшIуагъэ къэкIо. Мультфильмхэр зэдзэкIыгъэнхэмкIэ, бзэм епхыгъэ мобильнэ гуадзэхэр шIыгъэнхэмкIэ, Яндекс-зэдзэкIынхэм зягъэушъомбгъугъэнымкIэ ыкIи нэмыкIхэмкIэ IофшIэн гъэнэфагъэ зэшIо­хыгъэ мэхъу.
Ныдэлъфыбзэхэр зэгъэшIэ­гъэнхэмкIэ ыкIи къэухъумэгъэн­хэмкIэ Адыгеим, Абхъазым, Къэ­рэщэе-Щэрджэсым яспециа­листхэм тапэкIи зэдэлэжьэныгъэу азыфагу илъыщтым епхыгъэ еплъыкIэу яIэхэри къаIуагъэх. Шъолъырхэм япроектнэ офисхэм шIыкIэ-амалэу агъэфедэхэрэри къыхагъэщыгъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.