Хабзэ зэрэхъугъэу, адыгабзэмрэ тхыбзэмрэ я Ма­фэ республикэм ­«Адыгэ диктант» щатхы.

Мыгъэ ар я 7-у зэхащагъ. Адыгэ филологиемрэ культурэмрэкIэ ифакультет ар щыкIуагъ, джащ фэдэу пэIудзыгъэ шIыкIэм тетэу шIоигъоныгъэ зиIэхэм атхын амал яIагъ. ЗэхэщакIохэм къызэраIуагъэмкIэ нэбгырэ 400 фэдиз Iофтхьабзэм хэлэжьагъ.
Зызыушэтыгъэхэм ахэтыгъэх хабзэм икъулыкъушIэхэр, кIэлэ­егъаджэхэр, студентхэр, общест­веннэ движениехэм ахэтхэр, нэмыкIхэри. ПэIудзыгъэ шIыкIэр къызыфагъэфедэзэ Адыгеим имызакъоу Къэбэртэе-Бэлъкъарым, Къэрэщэе-Щэрджэсым, Краснодар краим ыкIи Тыркуем ит къалэу Дюздже ащатхыгъ.

Текстым икъыхэхын мэхьанэшхо раты, гъэсэныгъэмкIэ ыкIи пIуныгъэмкIэ купкI ин иIэу щытын фае, ащ дакIоу ар къин дэдэу щытэп, сыда пIомэ, адыга­бзэр зэкIэми зэраIэкIэлъыр зэфэшъхьаф. 2025-р Хэгъэгум иухъумакIо и Илъэсэу зэра­гъэнэфагъэр ыкIи зэлъашIэрэ адыгэ тхакIоу МэщбэшIэ Ис-
хьакъ къызыхъугъэр илъэс 95-рэ зэрэхъурэр къыдалъытэзэ ироманэу «ЦIыфыр тIо къэхъурэп» зыфиIорэм ипычыгъоу лIыгъэм фэгъэхьыгъэр къыхахыгъ. Ащ къеджагъэр гимназиеу N 5-м адыгабзэмрэ адыгэ литературэмрэкIэ икIэлэегъаджэу Светлан.
Шагъундэкъо Анжелэ илъэс пчъагъэ хъугъэ пэIудзыгъэ шIыкIэм тетэу Iофтхьабзэм зыхэлажьэрэр, мыгъэ апэрэу университетым къекIолIагъ ыкIи ар нахь шIогъэшIэгъон зэрэхъугъэр къытиIуагъ.
— АдыгабзэмкIэ укIэлэегъа­джэ зыхъукIэ мыщ фэдэ мэхьанэ зиIэ Iофтхьабзэхэм уахэлэжьэн фае, ебгъаджэхэрэм щысэ къып­тырахыным пае. Тыфай тиныдэлъфыбзэ тыди щыIунэу, хэ­хъоныгъэхэр ышIынхэу, рыгущыIэхэрэр нахьыбэ хъунхэу, — къыIуагъ ащ.
Хъуажъ Рэситэ адыгабзэмрэ тхыбзэмрэ я Мафэ имэфэкI шъыпкъэу елъытэ ыкIи диктантыр илъэс къэс етхы, лъэпкъым щыщ цIыфхэр ащ зэрипхыхэу пшъэшъэжъыем елъытэ. Батырбый Анзаур апэрэу мыщ хэлажьэ, адыгабзэр зэришIэрэр ыушэтынэу къекIолIагъ.
КIэуххэр мы мафэхэм къэ­нэфэщтых. Ахэр Адыгэ филологиемрэ культурэмрэкIэ ифакультет исайт къихьащтых.
ДЕЛЭКЪО Анет.