Адыгабзэмрэ тхыбзэмрэ я Мафэ фэгъэ­хьы­гъэ зэнэкъокъоу «Адыгабзэм нахь фэIа­зэхэр» зыфиIорэр мы мафэхэм зэхащагъ.

Ныдэлъфыбзэм икъэухъумэн, ихэгъэхъон, бзэм идэхагъэ къыт­кIэхъухьэрэ лIэужхэм алъы-
гъэ­Iэсыгъэныр, ныбжьыкIэхэр адыгэ культурэм хэщэгъэнхэр, ахэм яIэпэIэсэныгъэ хэгъэхъогъэныр пшъэрылъ шъхьаIэу зэхэщакIохэм яIагъ. Зэнэкъо­къур ятIонэрэу мыгъэ зэхащэ.
Адыгэ Республикэм гъэсэныгъэмрэ шIэныгъэмрэкIэ и Министерствэрэ сэнэхьат IэпэIэсэныгъэм хэгъэхъогъэнымкIэ Адыгэ республикэ институтымрэ Iофтхьабзэм кIэщакIо фэхъугъэх. Адыгэкъалэ, Кощхьэблэ, Красногвардейскэ, Тэхъутэмыкъое, Теуцожь, Шэуджэн район­хэм ыкIи МыекъуапэкIэ гимназиеу N 22-м, Адыгэ республикэ гимназием якIэлэеджакIохэм заушэтыгъ.
Зэнэкъокъум иапэрэ уцугъо щагум щыкIуагъ, ныбжьыкIэхэм адыгэ шъуашэхэр ащыгъхэу къэшъо дахэхэр къашIыгъэх, орэдхэр къаIуагъэх. КъекIолIагъэхэм анахьэу агу рихьыгъэхэм ащыщ ныбжьыкIэхэр шыкIэ­пщынэм къызэреуагъэхэр, ­адыгэ орэдыжъхэр къызэраIуагъэхэр.
ЯтIонэрэ уцугъом адыгэ шхыныгъохэр зытет Iанэхэр къа­гъэ­хьазырыгъэх. Куп пэпчъ иIанэ тетыр, ижъырэм къыщегъэжьагъэу адыгэхэм ащ мэхьанэу ратыщтыгъэр IупкIэу, зэгъэзэфагъэу къаIотагъ. Бахъсымэр, къундысыур, къое хьалыжъор, пIастэр, щыпсыр, адыгэ къэбыр, хьалыу, хьатыкъ ыкIи нэмыкIыбэ Iанэхэм атетыгъ.

Адыгэ шэн-хэбзэ зэхэтыкIэ зэфэшъхьафхэр къизыIотыкIырэ къэгъэлъэгъонхэмкIэ нэужым кIэлэеджакIохэр зэнэкъокъугъэх. Красногвардейскэ къикIыгъэ купым нысэищыр къыгъэлъэ­гъуагъ, IурIупчъэхэр, къашъохэр, адыгэ джэгукIэхэр хэтхэу ахэм гъэшIэгъонэу зыкъа­шIыгъ. Адыгэ­къалэ илIыкIохэм ижъыкIэ хьа­кIэм зэрэпэгъокIыщтыгъэхэр, уасэу фашIыщтыгъэр къыраIоты­кIыгъ, хьакIэщым хьакIэр рагъэ­блэгъагъ, агъэ­шIуагъ, пщынэ мэ­къэмэ дахэ щыIугъ. Адыгэ республикэ гимназием икIэлэ­еджакIохэм кIапщэм пылъ къэбархэр къагъэлъэгъуагъ, хыры­хыхьэхэр, IурIупчъэхэр къаIуагъэх, сыма­джэр узым емыгупшы­сэным пае агъэчэфыгъ. Кощ­хьэблэ районым къикIыгъэхэм чэщдэс къа­гъэлъэгъуагъ, хыры­хыхьэхэр къа­Iуагъэх, джэгугъэх, гъэсэпэтхыдэхэр нахьыжъхэм къаIуагъ, къэбархэр къаIотагъ, орэд къа­Iуагъ, кIэухым кIакор пшъэшъэ­жъыем ышъхьэ рахъуи ахьыгъ. Шэуджэн районым илIы­кIохэм кушъэхапхэм шапхъэу пылъхэр зэкIэ къыраIотыкIыгъ. Мыекъопэ гимназиеу N 22-м икIэлэ­еджакIохэм нысэщэ джэгум къешIэкIыгъэ шапхъэхэр къа­гъэлъэгъуагъэх, хъохъухэр къа­­Iуагъэх, ныор рагъэжьэ­жьыгъ. Теуцожь районым къи­кIыгъэхэм илъэс зыныбжь пшъэ­шъэжъыем лъэтегъэуцо фашIыгъ. Куп пэпчъ зэрифэ­шъуашэу зыкъыгъэлъэгъуагъ.
Зэнэкъокъум къыдыхэлъы­тагъэу адыгэ тхакIохэм ясурэт­хэр арагъэлъэгъузэ ахэр зы­щыщхэр, атхыгъэхэр къаIуагъэх. Джащ фэдэу адыгэ дышъэ ида­гъэр зэрэпшIын фаер къарагъэлъэгъугъ, пшъэшъэжъые анахь IэпэIасэхэр зэнэкъокъум хэлэжьагъэх.
Уцугъо пэпчъ шэпхъэ гъэнэфагъэхэр пылъыгъэх. Адыгабзэр зэрагъэлъапIэрэр, дэгъоу зэра­шIэрэр нафэ хъугъэ. Анахь дэ­гъоу зыкъэзыгъэлъэгъуагъэхэр нэужым къыхагъэщыгъэх. Адыгэ республикэ гимназием Гран-при фагъэшъошагъ. Шэу­джэн районымкIэ къуаджэу Пщы­жъхьаблэ, Красногвар­дей-
скэ районымкIэ Хьатикъое гурыт еджапIэм ыкIи Кощхьэблэ районымкIэ къуаджэу Фэдз къарыкIыгъэхэм текIоныгъэр къыдахыгъ, адрэхэм хагъэунэфыкIырэ чIыпIэхэр афагъэшъошагъэх.
ОсэшIэу, Адыгэ Хасэм и Хэ­сашъхьэ хэтэу МэщфэшIу Нэдж­дэт ныбжьыкIэхэм зафигъэзагъ. Ижъырэ хабзэхэр дахэу, дэгъоу къызэрагъэлъэгъуагъэр ари­Iуагъ. Зэрэ адыгэм рыгушхохэу, ныдэлъфыбзэр агъэлъапIэу, бзэм идэхагъэ, ибаигъэ зэхашIэу псэунхэу къяджагъ. Джащ фэдэу къагъэлъэгъуагъэхэм шъхьафэу къатегущыIагъ, анахьэу анаIэ зытырагъэтын фаехэр ариIуагъ.
КIэлэегъаджэхэмкIи кIэлэ­еджакIохэмкIи мыщ фэдэ зэхахьэхэм мэхьанэшхо зэряIэр гущыIэгъу тызыфэхъугъэхэм къаIуагъ. Ахэр нахьыбэ хъумэ зэрягопэщтыр къыхагъэщыгъ. Ныдэлъфыбзэр шIу зылъэгъурэ, зыгъэлъапIэрэ, игъэкIотыгъэу зэзгъэшIэрэ ныбжьыкIэхэр ­Адыгеим зэриIэхэр джыри зэ нэрылъэгъу тфэхъугъ. Ахэм япчъагъэ хахъо къэс лъэпкъыр баищт.
ДЕЛЭКЪО Анет.
Сурэтхэр: Iэшъынэ Аслъан.