Къырым игъатхэ ипэгъокIэу поселкэу Тульскэм дэт гъэ­сэныгъэм игупчэу N 1-м лIыхъужъныгъэм идесэ щыкIуагъ.

Республикэ проектэу «ЛIыхъужъэу къэхъухэрэп» зыфиIорэм къыдэхэлъытэгъэ Iофтхьабзэр зэрищагъ хэушъхьафыкIыгъэ дзэ операцием хэлэжьэгъэ Евгений Праздниковым.
Iофтхьабзэм хэлэжьагъэх къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ илIыкIохэр, я 8 — 9-рэ классхэм ащеджэхэрэр.
ЗэIукIэгъур шъхьэихыгъэу, гуфэбагъэ хэлъэу рекIокIыгъ. ДзэкъулыкъушIэхэм ящыIэныгъэ имызакъоу, зэо пшъэрылъхэр пшъэдэкIыжь ахэлъэу зэрагъэцакIэ­хэрэр, щыIэкIэ-псэукIэу, зэфыщытыкIэу яIэхэр ветераным къафиIотагъ. Джащ фэдэу Къырым иухъумакIохэм лIыгъэу, пытагъэу, псэемыблэжьыныгъэу къахэфагъэхэм ар къащыуцугъ.
ХэушъхьафыкIыгъэ дзэ операциер зырагъэжьагъэм мэзитIу тешIагъэу Евгений Праздниковыр ЧВК «Вагнер» зы­фиIорэм хэтэу ащ кIуагъэ. Инженер-сапер батальоным иштаб ипащэ иIэпыIэгъоу ар щытыгъ. «КIэпсэжъыем» зэпырыкIыгъэу илъэс фэдизрэ щыIагъ. Бахмут (Артемовск) дэжь щыкIогъэ зэпэуцужь лъэшым ипшъэрылъхэр щытхъу хэлъэу зэрэщигъэцэкIагъэхэм фэшI тын лъапIэхэр къыратыгъэх.
КIэлэеджакIохэм лIыхъужъым къыIотагъэхэр ашIогъэшIэгъоныгъ, упчIабэ ащ ратыгъ.
ЗэIукIэгъум икIэух ныбжьыкIэхэм дзэкIолIхэм афатхыгъэ письмэхэр ветераным ратыгъэх. Ар мы охътэ благъэм шIушIэ IэпыIэгъу зыщэщтхэм
ахэтэу кIощт.
Iэшъынэ Сусан.