ЯтIонэрэ чIыпIэр къахьыгъ
ВолейболымкIэ Къыблэ ыкIи Темыр-Кавказ федеральнэ шъолъырхэм япервенствэу Буденновскэ щыкIуагъэм Мыекъуапэ илIыкIохэм медальхэр къыщахьыгъэх.
Ставрополь краим команди 6 щызэрэугъоигъ. Адыгеир къэзыгъэлъэгъуагъэхэр къэлэ спорт еджапIэу С. М. Джэнчатэм ыцIэ зыхьырэм зыщызыгъасэхэрэр ары. 2011 — 2012-рэ илъэсхэм къэхъугъэ спортсмен ныбжьыкIэхэм ятренерыр Юрий Пичуевыр ары.
Республикэм илIыкIохэм ешIэгъуи 5 яIагъ, ахэм ащыщэу 3-р къахьыгъ. Ростов хэкум, Чэчэным ыкIи Дагъыстан якомандэхэм къашIуахьыгъ. Волгоград хэкум ыкIи Ставрополь краим ялIыкIохэр къатекIуагъэх. Зэфэхьысыжьхэм къызэрагъэлъэгъуагъэмкIэ, Волгоград хэкум текIоныгъэр къыдихыгъ, ятIонэрэ ыкIи ящэнэрэ чIыпIэхэм командищ афэбэнагъ. Къэгъэлъэгъон тедзэхэмкIэ Адыгеим икомандэ ятIонэрэ хъугъэ, Ростов хэкум испортсменхэм джэрз медальхэр къахьыгъэх.
Командэхэр зыдэщыт чIыпIэхэр ыкIи очко пчъагъэу рагъэкъугъэр:
- Волгоград хэкур — 9.
- Адыгэ Республикэр — 8 (10:8).
- Ростов хэкур — 8 (11:9).
- Ставрополь краир — 8 (9:9).
- Дагъыстан Республикэр — 7.