ГандболымкIэ Урысыем и Суперлигэ ипэшIоры­гъэшъ едзыгъо иятIонэрэ къекIокIыгъо къыдыхэ­лъытэгъэ ешIэгъоу «АГУ-Адыифым» иIагъэр шIуахьыгъ. Тикомандэ Звенигород къэзыгъэлъэ­гъорэ «Звездам» IукIагъ.

«Звезда» — «АГУ-Адыиф» — 34:24 (16:11)
Мы ешIэгъум Московскэ хэкум икомандэ хэпшIыкIэу нахь щы­лъэшыгъ. Ащ ипэубэ пчъагъэр къызэIуихыгъ «Звездам» хэт Светлана Вертушковам. Командэ­хэр республикэм икъэлэ шъхьаIэ зыщызэIокIэхэм «АГУ-Адыифым» иешIэкIо анахь дэгъоу къы­хахыгъэ Юлия Хавронинам мызыгъэгуми къэлапчъэм Iэгоуи 8 дидзагъ, ау ар текIоныгъэмкIэ икъугъэп. Ухъумэныр тикомандэ дэеу къыдэхъугъ, тигандболисткэхэр ыпэкIи зэрэщешIагъэхэм уигъэрэзэнэу щытэп, анахьэу ятIонэрэ таймым. Та­къикъи 7-м къыкIоцI типшъа­шъэхэм къэлапчъэм Iэгуаор да­дзэн алъэкIыгъэп, ащ къыхэкIэу бысымхэр къатекIуагъэх, пчъа­гъэр — 24:34.
— «Звездам» джыри тыте­кIонэу тыфэягъ, ау мызыгъэгум ащ игандболисткэхэр хэпшIыкIэу нахь лъэшыгъэх. Арэущтэу щытми, командэм сыфэраз, — ­къыIуагъ «АГУ-Адыифым» иге­неральнэ пащэу Светлана Кожубековам.
«Звездам» щешIагъэх:
къэлэпчъэIутхэр — Долгих, Тихановар, Лебедевар. Пензевар — 8, Егоровар — 8, Вертушковар — 7, Крыловар — 4, Клишинар — 3, Коркинар — 2, Герасимовар — 2.
«АГУ-Адыифым» хэтыгъэх:
къэлэпчъэIутхэр — Пивневар, Баскаковар, Гобадзе. Хавронинар — 8, Бондаренкэр — 5, Коблыр — 4, Краснокутскаяр — 3, Сергиенкэр — 2, Болоба — 1, Зарецкаяр — 1.
Мы ешIэгъум ыуж «АГУ-Адыи­фыр» я 4-рэ чIыпIэм щыт ыкIи ащ нахь лъагэу дэкIоен ылъэкIыщтэп, сыда пIомэ зэIукIэгъуи 3 ныIэп къыфэнагъэр. КъыкIэ­лъыкIощт ешIэгъур «АГУ-Адыифым» Мыекъуапэ щыриIэщт, ­гъэтхапэм и 23-м «Динамо-Синара» тихьакIэщт.
Командэхэр зыдэщыт чIыпIэхэр ыкIи очко
пчъагъэу рагъэкъугъэр:

1. «Динамо-Синара» — 25.
2. «Звезда» — 22.
3. «Луч» — 15.
4. «АГУ-Адыиф» — 8.
5. «Университет» — 0.