ЦIыфым идунай ыхъожьыгъэми, игъэхъагъэхэр, ишIушIагъэ кIодыхэрэп, ыцIэ дахэкIэ раIо, ишIэжь агъэлъапIэ. КIэлэегъэджэ гъогу дахэм къырыкIуагъэу, шIэныгъэлэжьэу, Мыекъопэ къэралыгъо технологическэ университетым автомобиль транспортым игъэфедэнкIэ икафедрэ идоцентэу Тыгъужъ Казбек бэмышIэу идунай ыхъожъыгъ.

Псаоу къытхэтыгъэмэ, гъэмафэм ащ ыныбжь илъэс 89-рэ хъущтыгъэ. ИщыIэныгъэ гъогу IофшIэным, шIэныгъэм ыкIи къыткIэхъухьэрэ лIэужхэм ягъэсэн рип­хыгъ. Тыдэ зигъэзагъэми, ищытхъу аригъаIозэ ипшъэрылъхэр ыгъэцэкIа­гъэх. Къэбэртэе-Бэлъкъар къэралыгъо университетыр къызеух ужым иIофшIэн гъогу ыублагъ. Инженер сэнэхьатым къыщегъэжьагъэу техническэ шIэныгъэ­хэмкIэ кандидатым ар нэсыгъ. Агропромышленнэ комплексым ыкIи гъэсэныгъэм алъэ­ныкъокIэ ныбжьыкIэхэм шIэныгъэ аригъэгъотыным иIахьышIу хэлъ. Мыекъопэ къэралыгъо технологическэ университетым илъэс 20-м ехъурэ Iоф щишIагъ.
Тыгъужъ Казбек 1962-рэ илъэсым къыщегъэжьагъэу 1986-рэ илъэсым нэс инженерэу, нэужым инженер шъхьаIэу, Къэбэртэе-Бэлъкъар Республикэм мэкъу-мэщымкIэ и Министерствэ иотдел ипащэу ыкIи нэмыкI IофшIэнхэр щытхъу хэлъэу ыгъэцэкIагъэх.

1981-рэ илъэсым Пшызэ мэкъумэщ институтым техническэ шIэныгъэхэмкIэ кандидат диссертациер къыщигъэшъыпкъэ­жьыгъ, нэужым Урысые шIэныгъэ- ушэтыпIэ институтым механизациемкIэ илабораторие ипэщагъ. Къэ­бэртэе-Бэлъкъар мэкъумэщ академием мэкъу­мэщ машинэ­хэмкIэ икафедрэ идоцентыгъ.
Тыгъужъ Казбек иIофшIэн уасэ зэрэфашIыщтыгъэр къеушыхьаты къэралыгъо тын лъапIэу къыфагъэшъошагъэхэм, ар Адыгэ Республикэм иапшъэрэ еджапIэхэм язаслуженнэ IофышI, АР-м транспортымкIэ изаслуженнэ IофышI.
Мыекъопэ къэралыгъо технологическэ университетым 1999-рэ илъэсым къыщегъэжьагъэу Казбек Iоф щишIагъ. «Экономика и управление на предприятиях транспорта» зыфиIорэ кафедрэм идоцентыгъ. 2001-рэ илъэсым «Сервис транспортных, технологических машин и оборудования» зыфиIорэ кафедрэм икъызэIухын иIахьышIу хилъхьагъ. 2001-рэ илъэсым къыщегъэжьагъэу 2006-м нэс кафедрэм ипэщагъ. 2006-рэ илъэсым къыщегъэжьагъэу ащ идоцентэу Iоф ышIагъ.
ШIэныгъэм игъогу гъэшIэгъон Тыгъужъ Казбек къыкIугъ, IофшIэгъэ 50-м ехъу иI, ахэр анахьэу зыфэгъэхьыгъэхэр транспорт фэIо-фашIэхэм ахэгъэхъогъэ­ныр ары. Ипшъашъэу Фатимэрэ икIалэу Рэщыдэрэ ятэ фэдэу шIэныгъэлэжь хъугъэх, докторскэ диссертациер къагъэ­шъыпкъэжьыгъ.

— Казбек Мосэ ыкъом шIэныгъэ куу зэриIагъэм имызакъоу, тиупчIэжьэгъугъ, хьалэлэу, цIыфышIоу щытыгъ. ЛIэуж пчъагъэ­мэ шIэныгъэ куу аригъэгъотыгъ, къыхахыгъэ сэнэхьатыр шIу аригъэлъэгъугъ. ЕгъашIи ар тыгу икIыжьыщтэп, ишIэжь дгъэлъэпIэщт, тыгу къи­нэжьыщт, — къыща­Iуагъ Мые­къопэ къэралыгъо технологическэ университетым.
— ЦIыфышIоу, гукIэгъу хэлъэу щытыгъ. «АдыгэлI шъыпкъ» зыфаIохэрэм афэдагъ Тыгъужъ Казбек. Шъыпкъагъэр игъого­гъоу, хъоршэрыгъэ зэримыхьэу псэугъэ. ШIэныгъэ куу иIагъ, лъэ­гэпIэ инхэм анэсыгъагъ, ау ащ рыкъэеу щытыгъэп, ущыт­хъоуи ыдэщтыгъэп. Адыгеим имызакъоу, илъэс пчъагъэрэ зыщыпсэугъэ Къэбэртэе-Бэлъкъар Республикэм ныбджэгъухэр бэу щыриIагъэх, зэкIэми шъхьэкIафэ къыфашIэу, агъэлъапIэу щы­тыгъ. Тыгу ар илъыщт, — зэныбджэгъухэм ацIэкIэ еIо СтIашъу Руслъан.
ДЕЛЭКЪО Анет.
Сурэтхэр: Тыгъужъхэм яунэгъо хъарзынэщ.