Джыри хэлэжьэщтых
Федеральнэ проектэу «Iэрыфэгъу къэлэ щыIакIэ гъэпсыгъэныр» зыфиIорэм къыдыхэлъытагъэу къэлэ цIыкIухэм язэтегъэпсыхьан пае Урысые зэнэкъокъоу илъэс къэс зэхащэрэм Адыгэкъалэ щэгъогогъо текIоныгъэр къыщыдихыгъ. Ащ ишIуагъэкIэ проспектэу Лениным ыцIэ зыхьырэм къэлэ парк щагъэпсы.
ПсэупIэм иадминистрацие ящэнэрэ чэзыум къыдыхэлъытэгъэ IофшIэнхэр зэшIозыхыщт подрядчикым икъыхэхын пае мэзэе мазэм икъихьагъум зэнэ- къокъу зэхищэгъагъ. ПшъэдэкIыжьэу ыхьырэмкIэ гъунэпкъэ гъэнэфагъэхэр зиIэ обществэу «БакСтроим» текIоныгъэр къыдихыгъ.
Джы ащ паркым лъэсрыкIо гъогухэр щишIыщтых, архитектурнэ пкъыгъо дахэхэр, тIысыпIэхэр, хэкIидзапIэхэр щигъэуцущтых, автомашинэ уцупIэхэр щигъэпсыщтых. Ахэм анэмыкIэу баскетбол ешIапIэ, спорт джэгупIэ щашIынэу гухэлъхэм ахэт. Ахэр чэщырэ къэнэфынхэу ашIыщтых. ГъэпсэфыпIэ чIыпIэм видеокамерэхэри щыпалъэщтых.
Подрядчикым зэзэгъыныгъэу дашIыгъэм къызэрэдэлъытагъэмкIэ, тызыхэт гъэтхэпэ мазэм ыкIэм IофшIэнхэр ригъэжьэщтых, тыгъэгъазэм и 1-м шIомыкIэу ыухынхэ фае.
АР-м псэолъэшIынымкIэ и Министерствэ къызэритыгъэмкIэ, ящэнэрэу къалэм зэнэкъокъум текIоныгъэр къызщыдехым, паркым ипроект иящэнэрэ чэзыу пае сомэ миллион 74-рэ мин 932-м ехъу къыфэ- кIуагъ.
Мыгъэ я 10-у къэлэ цIыкIухэм яобщественнэ чIыпIэу зэтырагъэпсыхьащтхэм язэнэкъокъу зэхащэ. АдыгеимкIэ къалэхэу Мыекъуапэ, Адыгэкъалэ, поселкэхэу Инэм, Яблоновскэр ащ хэлэжьэщтых. Министерствэм къызэрэщаIуагъэмкIэ, жъоныгъуакIэм и 1-м шIомыкIэу тхылъхэр ахэм атынхэ фае.
Шъугу къэдгъэкIыжьын, Адыгэкъалэ имызакъоу, Мыекъуапи гъогогъуитIо текIоныгъэр ащ къыщыдихыгъ. Мэз-парк чIыпIэу «Мэздахэр» ары хигъэлэжьагъэр. Ащ ишIуагъэкIэ чэзыуитIоу ахъщэ къатIупщыгъ. Джы ящэнэрэм хэлэжьэщт.
Поселкэхэу Инэмрэ Яблоновскэмрэ яадминистрациехэм цIыфхэм яеплъыкIэхэр къыдалъытэзэ зым иплощадэу «Зэкъошныгъэр», адрэм псыхъоу Пшызэ инэпкъ зэнэкъокъум хагъэлэжьэнэу къыхахыгъэх. Общественнэ чIыпIэхэр зэрэзэтырагъэпсыхьащт «гъогу картэхэр» агъэхьазырыгъэх, зэнэкъокъум кIэухэу фэхъущтым ежэнхэу ары къафэнагъэр.
Общественнэ чIыпIэхэмрэ фэтэрыбэу зэхэт унэхэм ящагухэмрэ зэтырагъэпсыхьэхэмэ, цIыфхэм псэукIэ амалэу яIэр нахьышIу зэрэхъущтым щэч хэлъэп. Ары пшъэрылъ шъхьаIэу иIэр лъэпкъ проектэу «ЩыIэныгъэм пае инфраструктурэр» зыфиIорэм.
ПсэупIэхэм язэтегъэпсыхьан фэгъэхьыгъэ къэбархэм Министерствэм иинтернет нэкIубгъохэм шъуащеджэн шъулъэкIыщт (https://t.me/minstroy01).