Адыгабзэмрэ тхыбзэмрэ я Мафэ тефэу «Адыгэ макъэм» инэкIубгъохэм къащызэIуехы «МэщбашIэр зэжъугъашIэ» зыфиIорэ Iахьэр. Усэу ар зэрэ­тыублэрэри тиныдэлъфыбз зыфэгъэхьыгъэр.

Шъыпкъэ, тхэкIошхор нахьыжъхэм ябгъэшIэжьынэу щытэп, еджагъэу, гъэсагъэу зызылъытэжьырэ пстэури ащ зыфэнэIуасэр, ытхыгъэхэр зашIэрэр бэшIагъэ. ТиныбжьыкIэхэм МэщбэшIэ Исхьакъ итворчествэ апэблагъэ тшIыным, тхакIом ищыIэныгъэ зыфигъэхьыгъэ тарихъ Iотэным, лъэпкъым ицIыфхэу, тикультурэу, тичIыналъэу зыфэтхагъэхэм, зыфэусагъэхэм ащ ынэкIэ ядгъэплъынхэм апай етхьыжьэгъэ Iофыр.
Къыхэгъэщыгъэн фае, гъэзетым имызакъоу, тихъытыу нэкIубгъохэми МэщбашIэм иусэхэр ащыIущтых. Ари непэ тэублэ. Мы IофыгъомкIэ къыддырагъэштагъ Къэбэртэе-Бэлъкъарымрэ Къэрэщэе-Щэрджэсымрэ яреспубликэ гъэзетхэу «Адыгэ псалъэмрэ» «Черкес хэ­кумрэ» яIофышIэхэми. Непэ къыхэтыутырэ усэм ащ такъыщеджэ:

Гъэмэфэ огъум псы чэндж гуIалэу
Нэпкъым дэгъукIрэм фэдэу игъашIэ,
Зыуи рамыдзэу, шIошIыр раIуалIэу
Синыдэлъфыбзэ игугъу къысфашIы:
«Моу типсырыкIы плъапэ зэрибдзэу
Уиадыгабзэ хэт ищыкIагъ?..»
АIозэ, тхьапшырэ, тхьапшырэ фаIуагъ.
Мы дунай нэфым апэрэ псалъэр
Щыщ сфэзышIыгъэр синыдэлъфыбз,
Гур зыгъэгушхоу сигугъэ хаплъэ
ИлъэгэIуатэу бгъэгум дизыбз.
Ным ибыдзыщэу сIупэ Iуфагъэр
Дыджы-псыджые таущтэу сфэIон,
ЦIыфыгъэ дахэу ащ къысхилъхьагъэр
Жьыщэгъу сеIэфэ огум щыбэгъон.
ЧIылъэм сехыжьэу сыкъытехьажьымэ,
Сыхарэгъади, сымыдэхъун.
Хъухэщтэп ясIоу сыбзэ ясхъожьымэ,
А сыхьат дэдэм сылIэжьыми хъун.
Жьыбгъэу къилъыгъэм фэдэу мэкъэхъоу,
Уц тхьэпэ цIыкIум фэдэу Iушъабэу,
ПсынэкIэчъ къабзэм фэдэу къысфэхъоу,
Тыгъэу къысфепсырэм фэдэу сшIофабэу,
Синыдэлъфыбзэ дэими, дэгъуми
Дунаир рысшIэу чIылъэм сытет,
Сыдырэ уахъти – гъэбэжъуи, огъуи
СэрыкIэ ощхыбыбым ренэу ар фэд.
Хьатх Мыхьамэт иорэд мафэ
Сщимыгъэгъупшэу лIэшIэгъум хещы,
Нарт Шэбатныкъо ишъыпкъэ зафэ
Бзэджагъэу щыIэр гъашIэм сфыхечы.
Сятэ ичIыгоу ным къыситыгъэм
Ижъогъэ нэз сыготэу сэкIо,
Дэхагъэр зэкIэ фэзгъадэу тыгъэм
АщкIэ дунаим иорэд фэсэIо.