Адыгеим илъэпкъ тха­кIоу, Урысыем IофшIэнымкIэ и ЛIыхъужъэу, УФ-м и Общественнэ палатэ хэтэу МэщбэшIэ Исхьакъ илъэс 95-рэ зэ­рэхъурэм фэгъэхьыгъэ Iофтхьабзэхэм языфэ­гъэхьазырынкIэ зэхэщэ­кIо комитетым изэхэсыгъо Адыгеим и ЛIы­шъхьэу КъумпIыл Мурат зэрищагъ.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр къэзэрэугъоигъэхэр мэфэкI Iофтхьабзэхэм япэшIорыгъэшъ план щигъэгъозагъэх. ПстэумкIи республикэм илъэсым къыкIоцI Iофтхьэбзи 140-м ехъу щызэшIуахынэу рахъухьагъ. Ахэр зыфытегъэпсыхьагъэхэр адыгабзэр нахь игъэкIотыгъэу зэлъягъэшIэгъэныр ыкIи еджэным цIыфхэм анаIэ нахь тырягъэдзэгъэныр ары. Ахэр творческэ зэнэкъокъух ыкIи викторинэх, литературнэ пчыхьэзэхахьэх, театральнэ ыкIи концерт къэгъэлъэгъоных. Юби­леим епхыгъэ хъугъэ-шIэгъэ игъэ­кIотыгъэхэм зыкIэ ащыщыщт МэщбэшIэ Исхьакъ итворчествэ пхырыщыгъэ гупшысэхэмкIэ къатыщт мэфэкI концертыр. Ащ фэгъэхьыгъэу игъэкIотыгъэу къыIотагъ АР-м культурэмкIэ иминистрэу Аулъэ Юрэ.

ЗэхэщэкIо комитетым хэтхэр Iофтхьабзэу зигугъу къашIы­гъэхэм ахэплъагъэх ыкIи хэхъо­ныгъэ заулэ фашIыгъ. ГущыIэм пае, гуманитар ушэтынхэм апылъ Адыгэ республикэ институтым ипащэу ЛIыIужъу Адам къахилъхьагъ Къыблэ федеральнэ шъолъырымрэ Темыр-Кавказ федеральнэ шъолъырымрэ ячIы­пIэ зэфэшъхьафхэм а Iофым епхыгъэ Iофтхьабзэхэр ащызэхащэнхэу. Джащ фэдэу игъоу алъэгъугъэхэм ащыщых район гупчэхэм тхакIом цIыфхэм зэIу­кIэгъухэр щадишIынхэр, Мэщ­бэшIэ Исхьакъ ипроизведение техыгъэ спектаклыр къэгъэлъэ­гъогъэныр.
Адыгеим и ЛIышъхьэу КъумпIыл Мурат зэхэсыгъом икIэух­хэр зэфихьысыжьхэзэ къызэ­рэхигъэщыгъэмкIэ, республикэм икультурнэ щыIэныгъэкIэ мэфэкI Iофтхьабзэхэр хъугъэ-шIэгъэшхоу хъунхэ фае, зэкIэ муниципалитетхэр ахэм къызэлъаубытыщтых.
«Исхьакъ Шумаф ыкъор — щытхъуцIэу «Урысыем IофшIэнымкIэ и ЛIыхъужъ» зыфиIорэр къызыфагъэшъошэгъэ апэрэ тхакIу, адыгэ литературэм лъа­псэ фэзышIыгъэхэм, адыгабзэр зэлъягъэшIэгъэным анахь Iофы­шхо дэзышIэхэрэм ащыщ. МэфэкI Iофтхьабзэхэри ащ фэдэ цIыфышхом диштэхэу щытынхэ фае. Ныбжь зэфэшъхьаф зиIэ цIыфхэм ашIогъэшIэгъоныщт Iофтхьабзэхэр гъэхьазырыгъэнхэ, лъэгэпIэ иным диштэу, игъэ­кIотыгъэу ахэр зэхэщэгъэнхэ фае», — къыIуагъ КъумпIыл Мурат.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.