Тэхъутэмыкъое районыр Адыгеим имуниципальнэ образованиехэм зэкIэми инвесторхэмкIэ анахь хъопсагъоу алъытэ. Ары ана­хьэу зигугъу тшIыгъэр район адми­нистрацием ипащэ игуадзэу Чэмышъо Тимур гущыIэгъу тызыфэхъум.

Къалэу Краснодар игъу­нэгъух, федеральнэ мэхьанэ зиIэ автомобиль ыкIи мэшIоку гъогухэм зэпачы, краим иаэропорт пэблагъ. А зэпстэур инвесторхэр районым къеблэгъэнхэм фэIорышIэ. ЕтIани, ар муниципальнэ образование анахь инхэм ащыщ, псэупIэ 27-рэ хэ­хьэ, нэбгырэ мини 131-м ехъу щэпсэу.
Администрацием ипащэ игуадзэ къызэриIуагъэмкIэ, 2024-рэ илъэсым инвестициеу мыщ къыхалъхьагъэр зэкIэмкIи сомэ миллиарди 5-рэ миллион 759,8-рэ мэхъу. Ар зы районкIэ макIэп. Инвестор анахь инхэм ащыщ гъомылэпхъэ гъэщтыгъэхэр къэзышIырэ хъызмэтшIапIэу «Хладокомбинат «Западный» зыфиIорэр. ГъэрекIо иза­къоу ащ сомэ миллион 72-рэ къыхилъхьагъ.
Инвесторышхоу щыт «ДомБытХим» зыцIэри. Ащ «бытовой химиекIэ» тызаджэу унагъом ща­гъэфедэхэрэр къыдегъэ­кIых. 2024-рэ илъэсэу икIыгъэм сомэ миллион 278-кIэ экономикэм ар хэлэжьагъ.
Къэгъагъэхэм якъэгъэ­кIын дэлэжьэрэ хъызмэтшIапIэу «Зеленый дом» зыфиIорэм икIыгъэ илъэсым — сомэ миллион 12,8-рэ, пшъэдэкIыжьэу ахьырэмкIэ гъунэпкъэ гъэнэфагъэхэр зиIэ об­ществэхэу «Ингка Сентерс Рус Проперти А» — сомэ миллион 87-рэ, «Дилерскэ Гупчэу Юг-Авто Плюсым» иавтомобиль щапIэу «Танк-м» — сомэ миллион 35,3-рэ, щэпIэ Гупчэу «МЕГА» сомэ мин 500 инвестициеу агъэ­федагъ. Ахэр къыдэгъэ­кIыгъэным изегъэушъомбгъун, оборудованием игъэ­­кIэ­жьын, цехыкIэхэм яшIын анахьэу зыпэIуа­гъэхьа­гъэр.
ХъызмэтшIапIэмэ зау­шъомбгъумэ, ямылъку хэ­хъощт, хэбзэIахьхэр нахьыбэу бюджетхэм ахалъхьащт, IофшIэпIэ чIыпIэу яIэм хэхъощт.
— «ЧIыпIэм хэхъоныгъэхэр егъэшIыгъэнхэр» зыфиIорэ проектэу къатыбэу зэтет унэхэр зыгъэуцурэ псэолъэшIхэм ащ дакIоу социальнэ псэуа­лъэхэри ашIынхэ фаеу къызщыдэлъытагъэр тирайон щыпхырытэщы. Сыда пIомэ бэу зэтет унэхэр мыщ жъугъэу ща­шIых. Ахэм апылъ псэо­лъэшI хъызмэтшIапIэхэр ары проектым къыхиубытэхэрэр. Джащ къыды­хэлъытагъэу бюджет ахъщэ зыпэIухьэрэ социальнэ псэуалъэу муниципальнэ образованием щытшIы­хэрэм ащыщхэми инвес­тициехэр ахалъхьэ. Блэ­кIыгъэ илъэсым псэо­лъэшI хъызмэтшIэпIитIумэ зэзэгъыныгъэхэм тадыкIэтхагъ, — къыIуагъ Чэмышъо Тимур.
ТигущыIэгъу тызэрэ­щигъэгъозагъэмкIэ, зым поселкэу Яблоновскэм, адрэм къуаджэу АдыгеякIэм унэхэр ащашIых. Ащ дакIоу еджэпIитIоу, ары пэпчъ нэбгырэ 1100-м телъытагъ, а псэупIэхэм ащагъэуцухэрэм инвестициехэр, зым сомэ мил­лион 658-рэ, ятIонэрэм миллион 57,9-рэ, ахалъхьагъ. Федеральнэ ахъщэу еджапIэ пэпчъ сомэ миллион 850-рэ къыфэкIуагъ.
Чэмышъо Тимур къызэрэхигъэщыгъэмкIэ, 2017-рэ илъэсэу «ЧIыпIэм хэ­хъоныгъэхэр егъэшIыгъэнхэр» зыфиIорэ проектыр зыпхыращырэм къыщыублагъэу Тэхъутэмыкъое районым щагъэуцугъэ еджапIэхэм, зэкI пIоми хъунэу, федеральнэ ахъщэу къатIупщыгъэм нэмыкIэу инвестицие мылъкуи ахэлъхьагъэ хъугъэ.
Джащ фэдэу икIыгъэ илъэсым автомобиль гъо­гухэм язытет нахьышIу шIыгъэным сомэ миллион 66,7-рэ, поселкэу Инэм ипсы укъэбзыпIэхэм миллион 698,9-рэ, Шапсыгъэ псыIыгъыпIэм игъэкIэжьын миллион 646,6-рэ, лъэпкъ творчествэм и Гупчэу къуаджэу Нэтыхъуае щагъэуцурэм сомэ миллион 70-м ехъу, спорт псэуа­лъэу Яблоновскэм щашIырэм миллиони 105,5-рэ инвестициеу блэкIыгъэ илъэсым ахалъхьагъ.
Джыри ащ тетэу инвес­торхэм ямылъку къыхалъхьэзэ АдыгеякIэм кIэлэцIыкIу IыгъыпIэ щашIынэу тхылъхэм ягъэхьазырын ыуж итхэу ары Чэмышъо Тимур тызэрэщигъэгъо­загъэр.
— Фэтэрыбэу зэхэт унэ­хэм яшIын тирайон лъэшэу зыщеушъомбгъу. Арышъ, псэолъэшIхэм со­циальнэ псэуалъэхэри ашIынхэу пшъэрылъ яIэ зэрэхъугъэр тэркIэ фе­дэшху. ЕджапIэхэмрэ кIэлэцIыкIу IыгъыпIэхэмрэ алъэныкъокIэ гумэкIыгъоу тиIэр нахь макIэ хъуным ар фэIорышIэ, — къыкIигъэтхъыгъ муниципальнэ образованием иадминистрацие ипащэ игуадзэ.
ХЪУТ Нэфсэт.