Адыгэ диктантым итхын шъухэлажь
Адыгабзэмрэ тхыбзэмрэ я Мафэ фэгъэхьыгъэу Дунэе Iофтхьабзэу «Адыгэ диктант» зыфиIорэр непэ атхыщт. Мыгъэ ар я 7-у зэхащэ.
Адыгэ Хасэмрэ Адыгэ къэралыгъо университетымрэ мыщ кIэщакIо фэхъугъэх. Адыгэ филологиемрэ культурэмрэкIэ факультетым мафэм сыхьатыр 1-м шIоигъоныгъэ зиIэхэр рагъэблагъэх (къалэу Мыекъуапэ, урамэу Пушкиным ыцIэ зыхьырэм тет унэу N 260-м, я 202-рэ аудиториер). Джащ фэдэу диктантыр онлайн шIыкIэм тетэу зытхынэу фаехэм апае эфир занкIэ щыIэщт, университетым и ВК-канал къихьащт.
Тхэныр рамыгъажьэзэ IофшIэныр зэрагъэцэкIэщтыр къафаIотэщт. Шапхъэхэм къызэрэдалъытэрэмкIэ, фаем ыцIэ тыритхэщт, цIэтедзэ бгъэфедэми хъущт. Онлайн шIыкIэм тетэу къыхэлажьэхэрэм атхыгъэр электроннэ почтэу nshkhalakhova@inbox.ru рагъэхьан фае.
Диктантыр зэритхыгъэр къэзыушыхьатырэ тхылъ фаехэм пэшIорыгъэшъэу макъэ арагъэIун фае.
Адыгабзэр зикIэсэ пстэури Iофтхьабзэм къырагъэблагъэ. Ар зэрэрагъэкIокIыщтым епхыгъэ упчIэ зиIэхэр мы телефон номерым теонхэ алъэкIыщт: 8(961)8284063.