Адыгэ къэралыгъо университетым бгъэлэжьынэу щыт сурэтхэр зыдэт тхылъэу «Нысхъапэхэр» зыфиIорэр къыдигъэкIыгъ.

Дунэе мэхьанэ зиIэ литературнэ зэнэкъокъоу Жэнэ Къырымызэ ыцIэкIэ зэхащэрэм хагъэунэфыкIырэ чIыпIэхэр къыщыдэзыхыгъэхэм яIофшIагъэр къызщыхаутыхэрэ Iахьэу «Адыгеим икIэлэцIыкIу литератур» зыфиIорэм къыдыхэлъытагъэу ар агъэхьазырыгъ. Сурэтхэр зышIыгъэхэр Адыгэ къэралыгъо университетым искусствэхэмкIэ и Институт иеджакIоу Бэгъушъэ Диан. Ащ иIофшIагъэхэр зыцIэ къетIогъэ литературнэ зэнэкъокъум гъэрекIо хэлэжьагъэх ыкIи «Сурэтхэр» зыфиIорэ лъэныкъомкIэ текIоныгъэр къыщыдихыгъ.
Бэгъушъэ Диан:
— Мы сурэтхэр анахь цIыкIухэм апае сшIыгъэх. ЗэкIэмкIи нысхъэпэ 11 мэхъух. Шъхьаджи щыгъ шъуашэр адыгэ бзылъфыгъэ саем техыгъ. Нысхъапэ пэпчъ цIэ иI. Ахэм ямэхьанэ абгъу­хэмкIэ аготхагъ: Гушхо, Нэдах, Джантыгъ, Мэзагъу, Дышъ, Жъуагъо, Къутас, нэмыкIхэри.
Адыгэ къэралыгъо университетым итхылъ тедзапIэ 2023-рэ илъэсым къызэIуахыгъ. Апэрэу къыдигъэкIыхэрэр тхылъ ермэлыкъхэу Москва щыкIохэрэм гъэрекIо ахэлэжьагъэх. АдыгабзэкIи урысыбзэкIи тхыгъэ кIэлэцIыкIу тхылъхэм адакIоу шIэныгъэ IофшIа­гъэхэри къыщигъэлъэгъуагъэх. Мы илъэсым къыщегъэжьагъэу АКъУ-м итхылъ тедзапIэ Урысыем итхылъ те­дзапIэхэм я Ассоциацие хэхьэ.