Неущ Адыгеим шэм­бэт шIыхьаф­хэр щыкIощтых.

Мыщ фэдэ шэн-хабзэр республикэм зыщыхамы­нэрэр илъэсыбэ хъугъэ. Гъатхэм икъихьагъу тефэу шъолъырым ипсэупIэхэм зэкIэми адэсхэр, ащыла­жьэхэрэр, еджакIохэр, кIэ­лэцIыкIухэр зэкIыгъу­хэу зыщыпсэухэрэр, общест­веннэ чIыпIэхэр агъэ­къа­бзэх.
АР-м и ЛIышъхьэу Къум­пIыл Мурат и Унашъо­кIэ къэбзэныгъэм има­фэ­хэр гъэтхапэм и 15-м къы­щегъэжьагъэу мэ­лылъфэгъум и 26-м нэс кIощтых. А пIалъэм къыриубытэу республикэм щыпсэурэ пэпчъ шэмбэт шIыхьафхэм ахэлэжьэ­шъущт. Ащ ихьатыркIэ жъоныгъокIэ мэфэкIэу къэблагъэхэрэм, анахьэу ТекIоныгъэм и Мафэ, ти­шъолъыр къабзэу тапэ­гъокIыщт.
Шэмбэт шIыхьафым изы­фэгъэхьазырын ­аублагъ. АР-м тыкъэзыуцухьэрэ дунаим икъэухъу­мэнрэ чIыопс къэкIуа­-
пIэ­хэмрэкIэ и ГъэIорышIапIэ IофшIэным изэхэщэн лъып­лъэщт, чIыпIэ пэпчъ ар ифэшъуашэу щырекIо­кIыным гъунэ лъифыщт. ШIыхьафыр мэкIофэ хэ­кIыр зыугъоищт техникэм къыкIухьащт. Муниципалитет пэпчъ иIофшIэн зы­щыкIощтымрэ уахътэмрэ ежь-ежьырэу ыгъэнэфэщт. Район гупчэхэмрэ къа­лэ­хэмрэ ащыпсэухэрэр зэ­кIыгъухэу пыдзафэхэм яугъоин дэлэжьэщтых. Къатыбэу зэтет унэхэм ящагухэр, ячIэхьапIэхэр, зыгъэпсэфыпIэхэр аукъэ­бзыщтых.
ГущыIэм пае, Тэхъутэмыкъое районым ипащэу Шъэо Аскэр анахьэу анаIэ зытырагъэтынэу афигъэпытагъэр социальнэ мэхьанэ зиIэ псэуалъэхэм къапыщылъ чIыналъэхэр, саугъэтхэр, шIэжь чIыпIэхэр ыкIи дзэ щытхъум исаугъэтхэр.