Адыгабзэмрэ тхыбзэмрэ я Мафэ тефэу адыгэбзэ къеджэнымкIэ республикэ зэнэ­къокъоу «Сыбзэ сидунай» зыфиIорэм щы­текIуагъэхэмрэ къыщыхагъэщыгъэхэмрэ агъэшIощтых. Ащ текIоныгъэ къыщыдэзы­хыгъэхэр джыри шъэфэу щыт, ау респуб­ликэ гъэзетэу «Адыгэ макъэм» къахигъэщыгъэ еджэкIо цIыкIум тигуапэу непэ игугъу къышъуфэтэшIы.

Хэкужъ Диан — Очэпщые гурыт еджа­пIэм ия 5-рэ класс ис, зэнэкъокъум къыгъэхьыгъэ видеотехыгъэм къы­зэрэщиIотагъэмкIэ, ичылэ гупсэ лъэшэу ыгу фэщагъ, шIу елъэгъу. Ащ къыщы­хъугъэ зэлъашIэрэ усакIоу Нэхэе Руслъан итворчествэ егъэлъапIэ, иусэхэм яджэ, орэдышъом ралъхьагъэхэри къеIох. ИцIыкIугъом къыщыублагъэу Дианэ концертмэ ахэлажьэ, усэ къеджэнымкIэ, орэд къэIонымкIэ зэнэкъокъумэ защеушэты, текIоныгъэ бэмэ къащыдихыгъ.
Культурэм и Унэу Очэпщые дэтым ипащэу Iэпэзэо Нуриет ытхыгъэ усэу «Адыгеир илъэсишъэ зэрэхъурэм фэгъэ­хьыгъ» зыфиIорэм ямышIыкIэу Хэкужъ Дианэ къеджагъ ыкIи ар тыгу екIугъ. Лъэшэу тигуапэу «Адыгэ макъэм» Iоф щызышIэхэрэмкIэ пшъэшъэжъыем иусэ къеджакIэ къыхэдгъэщыгъ ыкIи непэрэ зэфэхьысыжь зэхахьэм Щытхъу тхылъым­рэ тишIухьафтынрэ щеттыжьыщтых. Зыбзэ уасэ фэзышIыхэрэр нахьыбэ хъу­хэмэ, лъэпкъыми ыпсэ пытэщт.