Медалищ къахьыгъ
Урым-рим бэнэнымкIэ Урысыем ипервенствэ къалэу Уфа щыкIуагъ. Адыгэ Республикэм Тэхъутэмыкъое районымкIэ илIыкIохэм гъэхъэгъэшIухэр ашIыгъэх, хагъэунэфыкIырэ чIыпIищ къыдахыгъ.
Зыныбжь илъэс 21-м емыхъугъэ спортсменхэр ары зызыушэтыгъэхэр. Къащэчырэм елъытыгъэу ахэр куп 11-у гощыгъагъэх. Урысыем и ЛIыхъужъэу Максим Серафимовым ишIэжь фэгъэхьыгъэ зэнэкъокъум къэралыгъом ишъолъыр зэфэшъхьафхэм къарыкIыгъэ бэнэкIо 380-рэ хэлэжьагъ.
Тэхъутэмыкъое районым испорт еджапIэхэм защызыгъасэхэрэм хагъэунэфыкIырэ чIыпIищ къафагъэшъошагъ. Хьатит Мурат текIоныгъэр къыдихыгъ, ЦIэгъошIу Дамиррэ Нэхэе Рэмэзанрэ джэрз медальхэр къахьыгъ.
ТибэнакIохэм ыкIи ахэм ятренерхэм тафэгушIо, тапэкIи мыщ фэдэ гъэхъэгъэшIухэр ашIынхэу, Адыгеим ыцIэ дахэкIэ рарагъэIонэу афэтэIо.