Унэгъо ныбжьыкIэхэм псэукIэ амалэу яIэхэр нахьышIу шIыгъэнхэм фэгъэхьыгъэ Iофтхьабзэу Адыгэ Республикэм и Правительствэ и Унэ щыкIуагъэм сертификатхэр щаратыжьыгъэх.

Iофтхьабзэм рагъэблэгъагъэх респуб­ликэм имуниципальнэ образование пстэуми ялIыкIохэр: унэгъо ныбжьыкIи 9, ахэм янахьыбэр сабыибэ зэрыс унагъох. Адыгеим и ЛIышъхьэу КъумпIыл Мурат сертификатхэр зэратыжьыгъэхэм афэгушIуагъ, щыIэкIэ дэгъу яIэнэу, шIоу щыIэр къадэхъунэу афэлъэIуагъ.
«ПсэукIэ амал дэгъу цIыфхэм яIэныр — унагъом лъэныкъо пстэумкIи зэдиштэу хэхъоныгъэ ышIыным ылъапс. Арэущтэу щымытымэ, мурадхэр ипхъухьанхэр, кIэлэцIыкIухэр ппIунхэр ыкIи узэрэу­хъумагъэр зэхэпшIэныр къин хъущт. Мы сертификатхэр шъуищыIэныгъэ ичэзыукIэ иублапIэу орэхъух, гушIуагъорэ унэгъо насыпрэ шъуиIэнхэу шъуфэсэIо», — Iоф­тхьабзэм хэлажьэхэрэм закъыфигъэ­загъ республикэм и ЛIышъхьэ.
КъумпIыл Мурат къызэрэхигъэщы­гъэмкIэ, псэукIэ амалэу яIэхэр нахьышIу ашIыным пае 2025-рэ илъэсым унэгъо ныбжьыкIэ 98-мэ къэралыгъо IэпыIэгъу аратыщт, ахэм ащыщэу 43-р сабыибэ зэрыс унагъу. КъэкIопIэ пстэуми къахагъэкIынышъ, сомэ миллион 243-м ехъу а гухэлъхэм апэIуагъэхьащт. Урысые Федерацием икъэралыгъо программэу «УФ-м щыпсэухэрэм псэукIэ Iэрыфэ­гъухэр ягъэгъотыгъэнхэр ыкIи якоммунальнэ фэIо-фашIэхэр зэшIохыгъэнхэр» зыфиIорэр 2006-рэ илъэсым къыщыублагъэу гъэцэкIагъэ мэхъу. А уахътэм къыкIоцI республикэм иунэгъо ныбжьыкIэ 2698-мэ япсэупIэхэм язытет нахьышIу ашIын алъэкIыгъ, пстэумкIи сертификатэу аратыгъэхэм сомэ миллиарди 2 фэдиз апэIухьагъ. ЦIыфхэр зычIэсыщт унэхэм яIофыгъо изэшIохынкIэ зишIуагъэ къакIохэрэм ащыщ унэу ашIыхэрэм япчъагъэ нахьыбэ зэрэ­хъурэр.
ЗэдэгущыIэгъум илъэхъан Адыгеим и ЛIышъхьэ сабыйхэр зэрыс унагъохэм IэпыIэгъу ятыгъэнымкIэ республикэм щызэрахьэрэ Iофтхьабзэхэм, къалэхэм ямызакъоу, къуаджэхэм адэсхэми щы­IэкIэ-псэукIэ амал дэгъухэр ягъэгъотыгъэнхэмкIэ Iофыгъоу зэшIуахыхэрэм къатегущыIагъ. Ащ пае къэралыгъом программэхэмрэ лъэпкъ проектхэмрэ апэIухьанэу ахъщэшхо къыхегъэкIы. Iофыр зыфэгъэхьыгъэр нахьыбэу кIэлэцIыкIу IыгъыпIэхэр, еджапIэхэр, медицинэ учреждениехэр, культурэм иунэхэр, спорт псэуалъэхэр шIыгъэнхэр ыкIи гъэцэкIэжьыгъэнхэр, инженер, гъогу ин­фраструктурэм хэхъоныгъэ ягъэшIыгъэныр ары.
Сертификатхэр зэратыгъэхэм къаIуагъ цIыфхэм ящыIакIэ нахьышIу шIыгъэнымкIэ Адыгеим щагъэцэкIэрэ Iоф­шIэным пае республикэм ипащэхэм зэрафэразэхэр Адыгеим и ЛIышъхьэ зэригъэгугъагъэхэмкIэ, хэбзэ къулы­къухэм тапэкIи анаIэ тырагъэтыщт унэ­гъо ныбжьыкIэхэм IэпыIэгъу ятыгъэным. IофшIэнэу агъэцакIэрэм лъэныкъо зэ­фэшъхьафхэр къыщыдалъытэхэзэ хэ­хъоныгъэ фашIы. Сабыйхэр зэрыс уна­гъохэм IэпыIэгъу ятыгъэным пае мы илъэсым къыщыублагъэу Адыгеим Iоф­тхьэбзакIэхэр щызэшIуахыхэу рагъэ­жьагъ. АР-м и ЛIышъхьэ УФ-м и Прези­дент къыгъэуцугъэ пшъэрылъхэу цIыф­хэм ящыIакIэ нахьышIу хъуным, республикэм сабыибэ зэрыс унагъоу щыпсэухэ­рэм ахэхъоным япхыгъэхэр гъэцэкIагъэ хъунхэм Iофэу ашIэрэр зэрэфэлэжьэщтым ицыхьэ зэрэтелъыр къыхигъэ­щыгъ.
«Къэралыгъо IэпыIэгъум къыдилъытэрэ Iофтхьабзэхэм яшIуагъэкIэ унэгъо ныбжьыкIэхэу Адыгеим исхэм ащыщыбэм псэупIэ яIэ хъугъэ, ащ къикIырэр неущырэ мафэр зыфэдэщтым яцыхьэ нахь телъ зэрэхъугъэр ары. ТапэкIи унэгъо ныбжьыкIэхэм тадеIэщт. Урысыем и Президентэу Владимир Путиным ренэу къыхегъэщы унагъохэм щыIэкIэ тэрэз яIэныр лъэпкъ гухэлъ шъхьаIэу зэрэщытыр. Джыри зэ къэсэIожьы: республикэм щыпсэухэрэм нахь зыкъызэIуахынымкIэ, ящыIакIэ нахьышIу шIыгъэнымкIэ тфэлъэкIыщтыр зэкIэ тапэкIи тшIэщт», — къыхигъэщыгъ КъумпIыл Мурат.
Сертификатхэр зэратыгъэ унагъохэр: къалэу Мые­къуапэкIэ — Покидькохэм яунагъу, АдыгэкъалэкIэ — НапцIэкъохэм, Джэджэ районымкIэ — Францевхэм, Кощхьэблэ районымкIэ — Батышъхэм, Красногвардейскэ районымкIэ — Гъубжьэкъухэм, Мыекъопэ районымкIэ — Рыльцевхэм, Тэхъутэмы-къое районымкIэ — Къэлэкъутэкъохэм, Теуцожь районымкIэ — Iэшъынэхэм, Шэуджэн районымкIэ — ПIатIэкъохэм.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.