АР-м и ЛIышъхьэу КъумпIыл Мурат хэушъхьафыкIыгъэ дзэ операцием хэлажьэхэрэмрэ ахэм яунагъохэмрэ IэпыIэгъоу афакIорэм къытегущыIагъ.

— ТидзэкIолIхэмрэ ахэм ягупсэхэмрэ социальнэ IэпыIэгъу ятыгъэныр респуб­ликэм ихэбзэ къулыкъухэм апшъэ ашIы­хэрэм ащыщ. 2022-рэ илъэсым къыщыу­благъэу ахъщэ тынэу ахэм афэкIуагъэр зэкIэмкIи сомэ миллиарди 2,5-рэ мэхъу, — къыIуагъ республикэм ипащэ.
ХэушъхьафыкIыгъэ дзэ операцием хэлэжьэнэу кIохэрэм шъолъыр ыкIи му­ниципальнэ зэтыгъо ахъщэ тынэу афа­тIупщырэр IэпыIэгъу анахь инхэм ащыщ. АР-м и ЛIышъхьэ къызэрэхигъэщыгъэмкIэ, ар сомэ миллионрэ мин 600-рэ мэхъу.
Джащ фэдэу дзэкIолIхэм яунагъохэу гъэстыныпхъэ шхъуантIэр зимыIэхэм ар ящэлIэгъэнымкIэ адеIэх. ХэушъхьафыкIы­гъэ дзэ операцием хэлажьэхэрэм якIэлэ­цIыкIухэм зэтыгъо ахъщэ тынэу сомэ мин 20 афэкIо. Ахэм зэкIэмэ апэу язы­гъэ­псэфыгъо уахътэ афызэхащэ, япсауныгъэ изэтегъэуцожьынкIи, гъэпсэфыпIэ-I­эзапIэм зэрэкIощтхэмкIи апэ ашIых.
Республикэм икъалэхэм ыкIи ирайон­хэм яеджапIэхэм зэкIэми хэушъхьафыкIыгъэ дзэ операцием хэлажьэхэрэм якIэлэцIыкIухэм, апэрэ классым къы­щыублагъэу я 11-м нэс, непэ тIо ыпкIэ хэмылъэу шхын стыр ащараты. Ахэм якIалэу, япшъашъэу колледжхэм, техникумхэм ачIэсхэр ыпкIэ хэмылъэу непэ зэ агъашхэх.
— «Хэгъэгум иухъумакIохэр» зыфи­Iорэ къэралыгъо фондым ишъолъыр Къутамэ Адыгеим ит. Ащ хэушъхьафыкIыгъэ дзэ операцием хэлажьэхэрэм IэпыIэгъу ятыгъэным фытегъэпсыхьэгъэ IофшIэныр зэхэщагъэ зэрэхъурэм ынаIэ тет. Шъугу къэзгъэкIыжьын, сэнэхьат ягъэгъотыгъэнымкIэ программэу «Адыге­им илIыхъужъхэр» зыфиIорэри респуб­ликэм щыттIупщыгъ. А зэкIэри сабый зэрыс унагъохэм IэпыIэгъу ятыгъэным ылъэныкъокIэ республикэм IофшIэны­шхоу щылъыдгъэкIуатэрэм изы Iахьэу щыт. Адыгеим щыпсэухэрэм социальнэ IэпыIэгъу ятыгъэным ылъэныкъокIи Iоф­шIэнхэм зягъэушъомбгъугъэным ренэу тыпылъ, — къыIуагъ КъумпIыл Мурат.