Урысые Iофтхьа­бзэу «ЗыкI къэралыгъо ушэтыныр ны-тыхэм зыщатырэ маф. Тызэгъусэу зэдэтэты» зыфи­Iорэр мы мафэ­хэм Мыекъуапэ дэт ­лицееу N 19-м щы­кIуагъ. Мыгъэ ар Адыгеим я 9-у щы­зэхащэ.

Мыекъопэ къэлэ ад­министрацием гъэсэны­гъэмкIэ и Комитет къызэ­рэщытаIуагъэмкIэ, илъэс къэс мыщ хэлажьэхэрэм япчъагъэ нахьыбэ мэхъу. Хабзэ зэрэхъугъэу, я 11-рэ классыр къэзыухыгъэхэм янэ-ятэхэм анэмыкIэу рес­публикэм имуниципалитетхэм япащэхэр, чIыпIэ зыгъэIорышIапIэхэм, об­щественнэ организациехэм ялIыкIохэр, гурыт еджапIэхэм япащэхэр, ахэм ягуадзэхэр, нэмыкI­хэри мы Iофтхьабзэм хэ­лэжьагъэх. Мыгъэ нэбгырэ 80-м ехъумэ заушэтыгъ, ахэр аудитории 6-мэ ачIэсыгъэх.
Мы илъэсым хьисапым епхыгъэу ушэтыныр акIугъ, ар сыхьатым къыкIоцI телъытэгъагъ.
Ны-тэу гущыIэгъу тызыфэхъугъэхэм зэкIэми ашIогъэшIэгъонэу Iофтхьабзэм зэрэхэлэжьагъэхэр къытаIуагъ. Зыбгъэхьазырымэ, зи къин зэрэхэмылъыр ахэм зэхашIагъ, ясабыйхэм ар агурагъэ­Iоным фэхьазырых. ЗыкI къэралыгъо ушэтыным ныб­жьыкIэхэри, ны-тыхэри агукIэ нахь фэхьазырынхэмкIэ мыщ фэдэ Iофтхьабзэхэм яшIуагъэ къызэрыкIорэр къыхагъэщыгъ.
Мыекъуапэ фэдэу мэ­фэ гъэнэфагъэхэр яIэхэу псэупIэхэу Красногвар­дейскэм, Джаджэм, Кощ­хьаблэ, Тэхъутэмыкъуае, Очэпщые, Хьакурынэ­хьаблэ, Адыгэкъалэ ыкIи Краснооктябрьскэм ны-тыхэм апае ушэтынхэр афызэхащэщт.
ДЕЛЭКЪО Анет.