Адыгабзэмрэ тхы­бзэмрэ я Мафэ ­ипэгъокIэу, хабзэ зэрэхъугъэу, респуб­ликэм икIэлэ­еджакIохэм апае зэнэкъокъоу «Сыбзэ — сидунай» зыфи­Iорэр афызэхащэ.

Ар уцугъуитIоу гощыгъэ, муниципальнэм текIоныгъэ къыдэзыхыгъэхэм гъэтхапэм и 11-м яны­дэлъфыбзэкIэ сочинение атхыгъ.
АР-м гъэсэныгъэмрэ шIэныгъэмрэкIэ и Министерствэрэ сэнэхьат Iэпэ­Iэсэныгъэм хэгъэхъогъэнымкIэ Адыгэ республикэ институтымрэ Iофтхьабзэм кIэщакIо фэхъугъэх. Адыгабзэр кIэлэеджа­кIо­хэм нахь игъэкIотыгъэу зэрагъэшIэныр, дэгъоу ры­гущыIэнхэр, адыгэ шэн-­зэхэтыкIэхэр лIэужхэм ашIэнхэр, агъэлъэпIэнхэр ары пшъэрылъ шъхьаIэу зэхэщакIохэм зыфагъэуцужьырэр.
Институтым иIофышIэу Шорэ Жаннэ къызэрэти­IуагъэмкIэ, я 7 — 8-рэ ыкIи я 10-рэ классхэм ащеджэхэу адыгабзэр дэгъоу зышIэхэрэр ары зэнэкъокъум хэлажьэ­хэрэр, ахэр нэбгырэ 31-рэ мэхъух.
— Сочинениеу атхыщтым итемэхэр къыхэтхы зэхъум анахьэу зигъо къэсыгъэ Iофыгъохэр къы­хэдгъэщынэу тыфэягъ. Андырхъое Хъусен къызыхъугъэр мыгъэ илъэси 105-рэ зэрэхъурэр, зэлъа­шIэрэ тхакIоу МэщбэшIэ Исхьакъ ыныбжь илъэс 95-рэ зэрэхъущтыр къыдэтлъытэхэзэ къыхэтхы­гъэх, джащ фэдэу ныдэлъ­фыбзэм, шэн-зэхэтыкIэхэм афэгъэхьыгъэу хэдгъэхьагъэх, — къыIуагъ Шорэ Жаннэ.
Сыхьатищым къыкIоцI кIэлэеджакIохэм сочинениер атхыгъ. Къатефэгъэ темэм купкIэу иIэр къызэрэзэIуахыгъэм осэшIхэр лъыплъэщтых. Класс пэпчъкIэ текIоныгъэ ыкIи хагъэунэфыкIырэ чIыпIэ­хэр къыдэзыхыгъэхэр агъэнэфэщтых.
Адыгэкъалэ дэт гурыт еджапIэу N 3-м къикIыгъэ Хьалыл Светланэ къызэриIуагъэмкIэ, икIэлэеджа­кIохэу Тхьагъэпсэу Ари­нэрэ Гъонэжьыкъо Динарэрэ зэнэкъокъум зэрифэшъуашэу зыфагъэ­хьазырыгъ. Яныдэлъфыбзэ шIу алъэгъоу, ащ изэ­гъэшIэн ашIогъэшIэгъонэу пшъэшъэжъыехэр ыуж итых. Адыгабзэм фэгъэ­хьыгъэу республикэм щы­зэхащэрэ Iофтхьабзэхэм зэрахэлажьэхэрэр, ахэм шIогъэ ин зэряIэр адыгабзэмкIэ кIэлэегъаджэм къыхигъэщыгъ.
Кощхьэблэ гурыт еджапIэу N 2-м адыгабзэмкIэ икIэлэегъаджэу Бжьэц Фатимэ я 7-рэ классым щеджэрэ Мэрэтыкъо Ари­нэ къыщагъ. Ныдэлъфы­бзэм фэгъэхьыгъэ Iоф­тхьабзэхэм кIэлэеджакIо­хэр ягуапэу зэрахэлажьэ­хэрэр кIэлэегъаджэм къы­Iуагъ. Ахэм яшIуагъэкIэ ныбжьыкIэхэм яныдэлъфыбзэ нахь игъэкIотыгъэу зэрагъашIэ, нахь фэщагъэ мэхъух.
Сочинениер анахь дэгъоу зытхыгъэхэр мазэм ыкIэм нэс къэнэфэщтых, анахь къахэщыгъэхэр агъэ­шIощтых.
ДЕЛЭКЪО Анет.