Урысыем и Президентэу Владимир Путиныр фондэу «Хэгъэгум иухъумакIохэр» зыфиIорэм Iоф щызышIэрэ бзылъфыгъэхэм аIукIагъ.

Ащ Адыгеир къыщигъэлъэ­гъуагъ къэралыгъо фондым ишъо­лъыр къутамэ ипащэ игуа­дзэу Джарымэ Еленэ. Ар къы­зэ­кIожьым, зэIукIэгъум гупшысэу ригъэшIыгъэхэр «Адыгэ макъэм» къыфиIотагъэх.
Бзылъфыгъэхэм я Дунэе мафэ ипэгъокIэу хэушъхьафыкIыгъэ дзэ операцием хэлэжьа­гъэхэм ыкIи ахэм яунагъохэм IэпыIэгъу ягъэгъотыгъэнымкIэ ЗыкI гупчэу Москва дэтым а Iофтхьабзэр щыкIуагъ. ЗэIукIэгъум къырагъэблэгъагъэх фондэу «Хэгъэгум иухъумакIохэр» зыфиIорэм иIофышIэхэу зиIа­хьылхэр хэушъхьафыкIыгъэ дзэ операцием хэлажьэхэрэр, лIы­хъужъхэм янэхэр ыкIи яшъхьэгъусэхэр, зигупсэ зышIокIодыгъэхэр.
Джарымэ Еленэ ишъхьэгъуси икIали зэо-зэпэуцужьхэм яветераных. Еленэ Анатолий ­ыпхъум ишъхьэгъусэ фэгъэхьыгъэ къэбарыр Владимир Путиным фиIотагъ. Джарымэ Рэщыдэ Чэчэным щыкIогъэ зэпэуцужьым хэлэжьагъ, ЛIыхъужъныгъэм иорден, бгъэхалъхьэу «За отвагу» зыфиIорэр къыфагъэшъошагъэх, джы идзэ пшъэ­рылъхэр Курскэ хэкум щегъэцакIэх. Илъэс 25-м ехъукIэ узэ­кIэIэбэжьымэ, ныбжьыкIэхэм япатриотическэ пIуныгъэ дэлэ­жьэрэ общественнэ организациеу «ЗыкIыныгъэр» ащ ыгъэ­псыгъ.

«Ахэм яцыхьэ зытелъын кIыб пытэ Адыгеим щыряI. ДзэкъулыкъушIэхэм, яунагъохэм ящыкIэгъэ IэпыIэгъу зэфэшъхьафыр шъолъырым арегъэгъоты. А Iофыр егъэцакIэ ыкIи лъэплъэ фондэу «Хэгъэгум иухъу­ма­кIо­хэр» зыфиIорэм ишъолъыр къутамэ. Къыхэзгъэщымэ ­сшIоигъу, фондыр къызызэIуа­хыгъэм къыщегъэжьагъэу гъогогъу мини 6,5-м фэдизрэ зыкъыфагъэзагъ. 2024-рэ илъэ-
сым нэбгырэ 1417-мэ Iофыгъо зэфэшъхьафхэр къырахьылIа­гъэх, лъэIу 4750-м ехъу къаIу­кIагъ. Ащ ипроцент 90-р зэшIуа­хыгъ», — къыIуагъ Адыгеим и ЛIышъхьэу КъумпIыл Мурат.
Шъолъыр фондым ипащэ игуадзэ къызэрэхигъэщыгъэмкIэ, мыр мэфэкI зэIукIэгъу къо­дыеу щытыгъэп, къырагъэблэгъэгъэ бзылъфыгъэ пэпчъ Iоф­шIэнэу зыфэгъэзагъэм изэ­фэ­хьысыжьхэр, ягумэкIыгъохэр, яIофыгъохэр къыраIотыкIынхэм изы амал хъугъэ.
— Къэралыгъошхор зыгъэIорышIэрэ Президентым тыIукIэныр, тыдэгущыIэныр сэркIи, хэлэ-
жьагъэхэмкIи ошIэ-дэмышIагъэу щыт. Къыхэзгъэщымэ сшIоигъу, Урысыем ишъолъыр 89-мэ ­къахахыгъэ 17-мэ Адыгеир зэрахэфагъэр ыкIи ахэм къарыкIыгъэ бзылъфыгъэ 18-мэ сэ сызэрахэтыгъэр Тхьэм ишы­куркIэ (тхьэшIошъхъуныгъэ сиI) синасып къыхьыгъэу сэлъытэ. Нэбгырэ пэпчъ охътэ гъэнэфагъэм къыкIоцI игупсэу дзэ операцием хэлажьэрэм, Iоф­шIэнэу ыгъэцакIэрэм афэгъэ­хьыгъэу къыIотэнэу щытыгъ. Президентэу Владимир Путиныр къэгущыIэгъэ пстэуми ядэIугъ, бзылъфыгъэ пэпчъ къыIэтыгъэ Iофыгъом фэгъэхьыгъэу уна­шъохэу къэралыгъо фондэу «Хэ­гъэгум иухъумакIохэр» зыфиIорэм ипащэу Анна Цивелевам ригъэтхыгъэхэр чэщ-зымафэм зэшIохыгъэхэ хъугъэ, — хигъэунэфыкIыгъ Еленэ Анатолий ыпхъум.
ЗыдэщыIэр амышIэу кIодыгъэ дзэкIолIхэм яIоф фондым епхыгъэу щытыгъэп, ау а гу­мэкIыгъор бэрэ къырахьылIэ. Уставым зэрэхэмытхагъэм фэшI икъоу зэшIуахын алъэкIыщтыгъэп. А Iофыгъор зэIукIэгъум къыщаIэтыгъэхэм ащыщ ыкIи джы ар фондым ипшъэрылъхэм къахагъэхъуагъ.
ТигущыIэгъу къызэриIуагъэмкIэ, хьакIэу зэIукIэгъум къе­кIолIагъэхэм зэрифэшъуашэу хэти ишъолъыр къызэригъэлъэ­гъощтым пылъыгъ, гум нэсэу, нэпсыр къэзыгъэкIорэ къэбар гъэшIэгъон дэдэхэр зыпылъхэр къахэкIыгъэх. Бзылъфыгъэхэм ащыщыбэм ягупсэхэр дзэ операцием хэкIодагъэх.
ГущыIэм пае, медицинэ IофышIэу Тува къикIыгъэ бзы­лъфыгъэм игукIуачIэ зэрэиныр пстэуми хагъэунэфыкIыгъ. Ежьри ишъхьэгъуси, якIэлэцIыкIуищ ныжъ-тыжъхэм къафагъа­нэхи, хэушъхьафыкIыгъэ дзэ операцием хэтыгъэх. Километрэ 40 азыфагоу дзэ часть зэфэшъхьафхэм ащыIэхэу илъэс реным зэрэлъэгъугъэхэп. Мафэ горэм ишъхьэгъусэ зэрэщымыIэжьыр къызыраIом, командирым ытIупщи ар зыдэщыIэгъэ частым кIуагъэ. ДзэкIолIыр зы­щыфэхыгъэ чIыпIэр зэфэшIыгъэу, къычIэпхыжьынэу зэрэщымытыр къыраIуагъ. Бзылъфыгъэр ямыдэIоу изакъоу кIуи, ар къыгъотыжьын ылъэкIыгъ.
— Мы бзылъфыгъэм джыри дзэ операцием ыгъэзэжьын гухэлъ зэриIэр зэIукIэгъум къы­зыщеIом, фадагъэп. Ащ фэдэ дзэкIолI лъэшхэр тихэгъэгу иIэхэу ТекIоныгъэр къызэрэдэтхыщтым зэкIэми тицыхьэ телъ. Джащ фэд, Къырым къикIыгъэ Ольга Дорохинам икIалэу ­илъэс 21-рэ нахь зымыныбжьым Андырхъое Хъусен фэдэу ыпсэ ытыгъ. Пыим къызедзыхьэм, благъэу къызэригъэкIуалIэхи, ежьми, адрэхэми гранатэр ахидзи, зыкъыгъэожьыгъ. Урысыем и ЛIыхъужъыцIэр къыфагъэшъошагъ. Мыщ дэжьым къэIогъэн фае илъэсипшI пчъагъэ тешIэ­жьыгъэу лIэужхэм ящысэ зэпхы­гъэ зэрэхъугъэр, — хигъэунэфыкIыгъ Джарымэ Еленэ.
Фондым иIофшIэн игугъу къэтшIымэ, ащ икIэух зэфэхьысыжьхэу Адыгеим илIыкIо зэ­Iу­кIэгъум къыщиIотагъэм осэшIу къыфашIыгъ. Ар ежь изакъоу ишIуагъэу ащ ылъытэрэп — шъолъыр фондым икомандэ зэдиштэу, зэрифэшъуашэу ­шъхьадж ипшъэрылъ зэригъэцакIэрэм къыкIэкIуагъ.
Iэшъынэ Сусан.