«Сэ сипшъэрылъ шъхьаIэр сабыир зэхэсшIыкIыныр, ищынагъохэмрэ игумэкIыгъохэмрэ апэшIуекIонымкIэ сыдэIэпыIэныр, тыкъэзыуцухьэрэ дунаир дэгъукIэ ыштэным тезгъэгушIухьаныр ары», — къыкIегъэтхъы мэхьанэшхо зэратырэ зэнэкъокъоу «Пшызэ ипедагог-психолог–2025-рэ» зыфиIорэм илауреатэу ТIэшъу Фатимэ.

Уегупшысэмэ, зэкIэри псынкIэм фэд: мафэр зэребгъэжьагъэу кIощтэу къыпщэхъу. Пчэдыжь къэс, хабзэ зэрэхъугъэу, поселкэу ПсышIуапэ дэт гурыт еджапIэу N 75-м щыжъот, гушIогъо такъикъ­хэмкIэ мафэр рагъажьэ. ЕтIани, ащ зэкIэхэри къыхэлажьэх — кIэлэегъаджэхэри, кIэлэеджакIохэри, ны-тыхэри, Iо хэмылъэу, хьакIэхэри.
— КъызэрыкIо Iоф зи тиIэп, зэкIэмэ мэхьанэ ятэты, — къеIуатэ ТIэшъу Фатимэ. Ар ПсышIопэ районым ит поселкэу Шъхьафитым къы­щыхъугъ, Хьаджыкъо дэт гурыт еджапIэу N 94-р къыухыгъ. — КIэлэегъаджэхэм, анахьэу психо­логхэм, пшъэрылъ хьылъэ яI, сыда пIомэ сабый пэпчъ — хэушъхьафыкIыгъ. Шъхьадж иIэкIоцI дунае, ишэн, зэсэгъэ шIыкIэхэр шъхьафых, ахэр зэкIэ къыдэплъытэхэзэ, пшъэ­дэкIыжьэу Iофым пылъыр зэхапшIэзэ уадэлэ­жьэн фае.
КIэлэегъаджэхэм Iофым пымылъ зи ахэтырэп, ау ТIэшъум фэдэхэу психологием хэшIыкIышхо фызиIэхэр зырызых. КIэлэцIыкIухэм ягумэкIыгъохэр къыхэбгъэ­щынхэр зы лъэныкъу, ащ ушъхьа­гъоу фэхъугъэр бгъэунэфынышъ, уедэIушъуныр ыкIи зэхэпхышъуныр, зэутэлIэгъэ Iофыр гууз фэмыхъузэ идэгъэзыжьын удэлэжьэныр — ащ IэпэIэсэныгъэшхо зыхэлъ IофышI ищыкIагъэр. Фатимэ Заидэ ыпхъум а пстэури къыдилъытэзэ исэнэхьат къыхихыгъэу рэлажьэ. А сэнэхьатыр зэрэгъэшIэгъоныр, кIэлэцIыкIумэ уишIуагъэ ябгъэкIыным фэшI Iофым шIыкIэу пылъыр зэрэгъу­нэнчъыр IэпэIасэм игущыIэхэм къащыхегъэщы. Къалэу Шъачэ дэт медучилищыр къызэеухым ыуж Шъачэ къэралыгъо университетым кIэлэегъэджэ сэнэхьатыр ТIэшъум щызэригъэгъотыжьыгъ.

— Сэ кIэлэегъэджэ лIэуж ныбжьыкIэм сыщыщ, — къе­Iуатэ Фатимэ. — Сшэу Шъхьабэ Заур я 75-рэ гурыт еджапIэм Iоф щешIэ, тарихъымрэ обществознаниемрэ арегъэхьы, муниципальнэ зэнэкъокъоу «Анахь дэ­гъум идэгъу­жьыр» зыфиIорэм щытекIуагъ. Сшыпхъоу Кобл Заринэ ТIуапсэ дэт гурыт еджапIэу N 5-м иублэпIэ классхэм якIэлэ­егъадж. Тэ тшIэзэ ащ фэдэ гъогу къы­хэтхыгъ, ащ пае зыкIи тыкIэгъожьыгъэп. Тэгугъэ тикIалэхэри тилъэуж къы­рыкIонхэу.
Советскэ Союзым и ЛIыхъу­жъэу Малышев Алексей Петр ыкъом ыцIэ зыхьырэ гъэсэныгъэ учреждением илъэс 17 хъугъэ Фатимэ зыщылажьэрэр. А уахътэм къыкIоцI ащ кIэлэегъэджэ-психолог къызэрыкIоу IофшIэныр ригъажьи Краснодар краим испециалист анахь дэгъухэм ащыщ хъугъэ. ТIэшъу Фатимэ методикэу, шIыкIэ-амалэу IофшIэным щигъэ­федэхэрэр апэ къалэм къыщыхагъэщыгъэх, Шъачэ икIэлэегъэ­джэ-психолог анахь дэгъоу къыхахыгъэу ар Краснодар кIуагъэ, ащ ыуж — шъолъырым. Гъэхъагъэ пшIыныр IэшIэхэп, псынкIэуи къыбдэхъурэп, ащ унэсыфэ пэ­рыохъубэ зэпыпчын фаеу мэхъу.
— ЦIыфмэ зэраIоу, Тхьэм лъэ­ныкъуищ икIасэр, — щхызэ къеIуатэ Фатимэ, гъэтхапэм и 8-м ехъулIэу икIэлэеджакIохэм къыратыгъэ къэгъэгъэ Iарамхэр зэригъа­фэхэзэ. — 2013 — 2024-рэ илъэсхэм — краим ирайонхэм ыкIи икъалэхэм якIэлэегъэ­джэ IэпэIасэхэр зыхэлэжьэгъэхэ зэнэкъокъухэм защысыушэтыгъ, джырэкIэ зэхащагъэм лауреат сыщыхъугъ. УиIэпэIэсэныгъэ хэзыгъэхъо­рэ еджапIэу сэ ар сэлъытэ, уасэ зыфэошIыжьы, практическэ IофшIэнхэм, гукъэкI­хэм, авторскэ егъэжьапIэхэм зэфэхьысыжь афыуегъэшIы, уиIофшIэгъухэм яшIыкIэхэми уащегъэгъуазэ.
ЛъэныкъуитIум — «педагог-психолог» ыкIи «педагог-психолог ныбжьыкIэр» зыфиIохэрэм кIэлэегъэджэ 53-мэ текIоныгъэ къа­щыдахы ашIоигъуагъ. Гъэсэныгъэм­рэ шIэныгъэмрэкIэ краим и Ми­нистерствэ, Урысыем и Проф­союзхэм яшъолъыр организацие, гъэсэныгъэм хэхъоныгъэ егъэшIыгъэнымкIэ краим и Институт зэнэкъокъур зэхащагъ, ащ иапэрэ едзыгъо заочнэ шIыкIэм тетэу аублэгъагъ. IофшIагъэхэу апэрэм щыпхырыкIыгъэхэм авторскэ мастер-классхэр зэхащэнхэу щытыгъ, ащ фэдэ Iофтхьабзэхэр ТIэшъу Фатими ригъэкIокIыгъэх.
— КIэлэегъэджэ психологым иIофшIэн кIэлэцIыкIу закъо­хэр арэп зыфытегъэпсыхьагъэр, арэу бэмэ къащэхъуми, — къыкIегъэтхъы ащ. — КIэ­лэеджакIомэ узэрадэлажьэрэм фэшъхьафэу, бгъэ­рэхьатыщтхэми, зэпэуцу Iофы­гъо хьылъэр «бгъэушъэбыжьыщтми», ны-тыхэр къыхэдгъэлажьэхэу мэхъу. Джащ фэдэу психологическэ IэпыIэгъур кIэлэегъаджэхэми ящыкIагъэу загъорэ къы­хэкIы. Мафэ къэс агъэцэкIэрэ Iофым гуузэу ыкIи гумэкIыгъоу къыкIэлъыкIорэр гъу­нэнчъ, къиныгъоу зэуалIэхэ­рэр психологым атырихын елъэкIы. А темэр нахь куоу зэгъэшIэгъэн фаеу сэлъытэ.
— Фатимэ Заидэ ыпхъур илъэс пчъагъэхэм ыгу еты­гъэу, творческэ амалхэр къызфигъэфедэзэ, IэпэIэсэныгъэшхо хэлъэу иIоф егъэцакIэ, кIэлэцIыкIухэм дахэу ахэт, — къыхегъэщы къалэу Шъачэ иадминистрацие гъэсэныгъэмрэ шIэныгъэм­рэкIэ игъэIорышIапIэ ишъо­лъыр отделэу ПсышIуапэ дэтым ипащэу Анастасия Гнусаревам. — Ар кIэлэ­еджа­кIохэми, ны-тыхэми, кIэлэегъэджэ купми яIэпыIэ­гъушIу хъугъэ, къиныгъохэр зэпичыхэзэ, кIэлэеджакIохэм хэхъоныгъэхэр арегъэшIых. Зэнэкъокъоу краим зэхища­гъэм лауреатыцIэу къыщыфагъэшъошагъэр къылэжьыгъэ шъыпкъ, мафэ къэс щытхъу пылъэу Iофэу ышIэрэм ар къыкIэкIуагъ. ТIэшъу Фатимэ иIофшIэ­гъухэмкIэ, гъэсэныгъэм илъэгапIэхэм анэсы зышIоигъо­хэмкIэ щысэтехыпI.
Ныбэ Анзор.
Сурэтхэр: ТIэшъу Фатимэ ихъар­зынэщ.