Урысые Федерациемрэ Адыгэ Республикэмрэ якъэралыгъо тын лъапIэхэу къафагъэшъошагъэхэр ятыжьыгъэнхэм фэгъэ­хьыгъэ Iофтхьабзэр республикэ филармонием щыкIуагъ. Ар зэрищагъ Адыгеим и ЛIышъхьэу КъумпIыл Мурат.

Къэзэрэугъоигъэхэм шIуфэс къарихызэ, республикэм ипащэ бзылъфыгъэхэм я Дунэе мафэ фэшI афэгушIуагъ. КъумпIыл Мурат къызэрэхигъэщыгъэмкIэ, непэрэ бзылъфыгъэхэр хъулъфы­гъэхэм афэдэу тиреспублики, хэгъэгуми ящыIэныгъэ илъэныкъо пстэуми ахэлажьэх. Ащ да­кIоу джэныкъом иухъума­кIо­хэу, ны мыгупсэфхэу, бзылъфы­гъэ гукIэгъухэу къэнэжьых.
«ШъуисэнэхьаткIэ IэпэIэсэныгъэу шъухэлъым имызакъоу ным, Урысыем анахь щагъэ­лъэпIэрэ шIуагъэхэм мэхьанэшхо зэряIэр икъоу зэхэшъошIыкIы. ШIуагъэхэр зытIокIэ къи­кIырэр уихэгъэгу шIу плъэгъуныр, узэкъотыныр, Урысыем ифедэхэм уафэшъыпкъэныр ары. А шIуагъэхэр зы лIэужым адрэм лъегъэIэсыжьых, цIыф лъэпкъ зэфэшъхьафхэу хэгъэгум щыпсэухэрэр ахэм зэрап­хых. Урысые Федерацием и Президент иунашъохэм адед­гъаштэзэ, IэкIыб къэралхэм къыт­фыряIэ джэгъогъуныгъэм тыпэшIуекIонымкIэ тизыкIыныгъэ ар дэгъоу къеушыхьаты. Джащ фэдэу Урысыем идзэ­кIолIхэр, хэушъхьафыкIыгъэ дзэ операцием лIыхъужъныгъэ щы­зэрахьэзэ, пыим пхъашэу пэуцужьых», — къыIуагъ АР-м и ЛIышъхьэ.
Къэралыгъом ипащэ игущыIэхэр КъумпIыл Мурат агу къыгъэкIыжьыгъэх: «Урысыем ицIыф пэпчъ игупсэ хэгъэгу къахэзгъэщырэ шIуагъэу иIэхэм джыри ахэхъоным фэшI наукэм, культурэм, гъэсэны­гъэм, экономикэм, къыдэгъэ­кIыжьыным иIахь ахешIыхьэ, къэкIощт лъэхъаным епхыгъэ мурадхэр гъэцэкIагъэ хъунхэм лъапсэ фешIы».
Сэнэхьат зэфэшъхьафхэр зиIэ цIыф хъупхъэхэу, Адыгеим ыкIи зэрэ Урысыеу яхэхъоныгъэ лъэпсэ пытэ фэзышIыхэрэм зэрафэразэр КъумпIыл Мурат къыIуагъ. Ахэр врачых, кIэлэ­егъаджэх, кIэлэпIух, культурэм иIофышIэх, журналистых, муниципальнэ къулыкъушIэх, юрис­тых, псэолъэшIых, гъогушIых, мэкъу-мэщым, транспортым яIо­­фышIэх. Нэбгырэ пэпчъ мафэ къэс зыфэлажьэрэр дунаир нахьышIу, щыIакIэр нахь Iэрыфэгъу хъуныр ары.
АР-м псауныгъэр къэухъу­мэ­гъэнымкIэ иминистрэу Мэрэтыкъо Рустем псауныгъэм икъэу­хъу­мэнкIэ гъэхъагъэу иIэхэм ыкIи илъэсыбэ хъугъэу гуетыныгъэ фыриIэу Iоф зэришIэрэм апае орденэу «Хэгъэгум ыпашъхьэ гъэхъагъэу щыриIэхэм апай» зыфиIорэм имедалэу я II-рэ шъуашэ зиIэр къы­фагъэ­шъошагъ, ащ фэшI ЛIы­шъхьэр фэгушIуагъ.
Адыгэ къэралыгъо универ­ситетым искусствэхэмкIэ и Ин­ститут икафедрэ идоцентэу Бастэ Асиет АР-м и ЛIы­шъхьэ ышъхьэкIэ фэгушIуагъ. Лъэпкъ фольклор-этнографи­ческэ ансамблэу «Ащэмэзыр» зэхэзыщагъэм лъэпкъ культу­рэмрэ искусствэмрэ яхэхъо­ныгъэ иIахь зэрэхишIыхьэрэм, илъэсыбэ хъугъэу шIуагъэ къы­тэу Iоф зэришIэрэм апае медалэу «Культурэмрэ искусст­вэмрэ иIахьэу ахишIыхьагъэм пай» зыфиIорэр ащ къыфагъэшъошагъ.
Федеральнэ шIухьафтынхэр аратыжьыгъэх: Владимир Ки­селевым — «Урысые Феде­рацием изаслуженнэ журналист» зыфиIорэ щытхъуцIэр; Лафышъэ Иннэрэ Хабир Ха­бибулинымрэ — «Урысые Федерацием изаслуженнэ врач» зыфиIорэр; Лъэпшъыкъо Щамилэ — «Урысые Федерацием псауныгъэм икъэу­хъумэнкIэ изаслуженнэ IофышI»; Мэзыужьэкъу Эммэ, Лариса Рябцевам, Хэкужъ Любовь, Чэсэбый Раисэ, Любовь Литвиновам, Оксана Сливкэ, ТIэшъу Тэмарэ — «Урысые Федерацием изаслуженнэ кIэлэегъадж»; Алексей Сличнэм — «Урысые Федерацием транс­портымкIэ изаслуженнэ IофышI»; Сергей Егоровымрэ Валерий Гаринымрэ — «Урысые Федерацием мэкъу-мэщымкIэ изаслуженнэ IофышI» зыфиIохэрэр къа­фагъэшъошагъэх.
ИкIэухым КъумпIыл Мурат Iофтхьа­бзэм хэлэжьэгъэ пстэуми афэлъэIуагъ псауныгъэ пытэ яIэнэу, ягуетыныгъэ къыкIимычынэу ыкIи ублэпIэ пстэуми гъэхъагъэхэр ащашIынхэу.
АР-м и ЛIышъхьэ
ипресс-къулыкъу къытырэ къэбар­хэмкIэ Тхьаркъохъо Сафыет.