Адыгеим и Конституцие заштагъэр илъэс 30 зэрэхъу­рэм фэгъэхьы­гъагъ АР-м и Къэралыгъо Совет — Хасэм Iэнэ ­хъураеу тыгъуасэ зэхищэгъагъэр.

Ащ хэлэжьагъэх АР-м и ЛIышъхьэу КъумпIыл Мурат, Адыгеим и Апшъэрэ хьыкум и Тхьаматэу Шумэн Байзэт, хэбзэ гъэцэкIэкIо къулыкъухэм ялIыкIо­хэр, Парламентым идепутатхэр.
Джащ фэдэу Iофтхьабзэм къырагъэблэгъагъэх къэралыгъо ыкIи общественнэ IофышIэшхо­хэу, республикэм и Хэбзэгъэуцугъэ шъхьаIэ ипроект игъэхьазырын хэлэжьагъэхэу, охътэ зэ­фэшъхьафхэм пэщэ IэнатIэхэм аIутыгъэхэу, шъолъырым хэхъо­ныгъэхэр ышIынхэм зиIахьышхо хэзылъхьагъэхэ АР-м илIышъхьа­гъэу, Къэралыгъо упчIэжьэгъоу ТхьакIущынэ Аслъан, Адыгеим и Апшъэрэ хьыкум ипэщагъэу, юридическэ шIэныгъэхэмкIэ док­торэу, профессорэу Трэхъо Аслъан, АР-м и Апшъэрэ Совет иапэрэ тхьамэтагъэу, гуманитар ушэтынхэмкIэ Адыгэ республикэ институтэу Т. М. КIэращэм ыцIэ зыхьырэм ипащэу ЛIыIужъу Адам, АР-м инахьыжъхэм я Совет итхьаматэу ГъукIэлI Нурбый, АР-м и Конституционнэ хьыкум ипэщагъэу, Урысыем июристхэм я Ассоциацие ишъо­лъыр Къутамэ ипащэу Лъэхъэтыкъо Аскэр, нэмыкIхэр.

Адыгеим и ЛIышъхьэ зэхэсыгъор къызэIуихызэ, АР-м и Конституцие зэраштагъэм мэхьанэшхо зэриIэр, УФ-м изы шъолъыр шъхьафит хъугъэ рес­публикэм нэужым гъогоу зэрыкIощтыр къэзгъэнэфэгъэ тарихъ ыкIи политическэ-правовой хъугъэ-шIагъэу зэрэщытыр къы­хигъэщыгъ. КъумпIыл Мурат шъолъырым и Хэбзэгъэуцугъэ ШъхьаIэ игъэхьазырын, респуб­ликэр ылъэ теуцоным зиIахь ахэзылъхьагъэхэм хэушъхьафыкIыгъэ «тхьашъуегъэпсэу» къариIуагъ.
— Хэбзэгъэуцугъэ шъхьаIэр шъолъырым иэкономикэ игъэпытэн, социальнэ лъэныкъом хэхъоныгъэхэр ышIынхэм ыкIи цIыфхэм ящыIакIэ нахьышIу хъуным афэIорышIэ. Ащ анахь шъхьаIэу къыщыхэгъэщыгъэхэр тиIэубытыпIэхэу, хэгъэгум и Президентэу Владимир Путиныр, Правительствэр тиIэпыIэгъухэу цIыфхэм щыIэкIэшIу яIэным фытегъэпсыхьэгъэ пшъэрылъхэр пхырытэщых, — къыкIи­гъэтхъыгъ КъумпIыл Мурат.

Республикэм ипащэ псауныгъэм икъэухъумэн исистемэ игъэкIэжьын, гъэсэныгъэм шIуа­гъэу къытырэр нахьыбэ шIыгъэ­ным, инфраструктурэм изегъэу­шъомбгъун, зэкIэ цIыфхэм ящы­IакIэ нахьышIу шIыгъэным афытегъэпсыхьэгъэ IофшIэнхэр тапэкIи зэрэлъагъэкIотэщтхэр къыхигъэщыгъ.
— АР-м и Конституцие шъо­лъырым хэхъоныгъэхэр ышIынхэм, цIыфхэм щыIэкIэшIу яIэным, ти Хэгъэгу ыкIуачIэ джы­ри нахь пытэным зэрифэшъуа­шэм тетэу тиIахь хэтлъхьаным фытегъэпсыхьэгъэ пшъэрылъхэм япхырыщын тапэкIи зэрэфэIорышIэщтым сицыхьэ телъ, — къыIуагъ ЛIышъхьэм.
АР-м и Парламент и Тхьаматэу Владимир Нарожнэр Хэбзэгъэуцугъэ ШъхьаIэр аштэным ыпэкIэ гъогоу къыкIугъэм кIэкIэу къытегущыIагъ, ащ хэлэжьагъэхэм ацIэхэр джыри зэ агу къыгъэкIыжьыгъэх.
— Къэралыгъо пэпчъ и Конституцие итамыгъэ шъхьаIэу щыт. Арышъ, ащ лъытэныгъэ фэпшIымэ, уихэгъэгу олъытэ, о зыолъытэжьы. Адыгеим лъэпкъ зэфэшъхьафыбэ зэрыс Урысые Федерацием хэпчын умылъэ­кIыщт изы шъолъыр статус иIэ зэрэхъугъэр ащ къыгъэпытэ­жьыгъ, — къыIуагъ Владимир Нарожнэм.
Нэужым псалъэ къэзышIыгъэ­хэм Конституциер зэрэзэхагъэу­цуагъэм, статусыкIэу зиIэ хъугъэ шъолъырым икъэралыгъо-­правовой зэфыщытыкIэхэм ягъэ­кIэжьын ащ иIахьэу хэлъым къатегущыIагъэх.
ХЪУТ Нэфсэт.