Бзылъфыгъэхэм я Дунэе мафэ фэгъэхьыгъэ мэфэкI зэ­IукIэр республикэ филармо­нием щыкIуагъ.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, хабзэм ифеде­ральнэ, иреспубликэ къулыкъухэм, муни­ципальнэ образованиехэм япащэхэр, лэжьэкIо купхэм, общественнэ движениехэм, организациехэм ялIыкIохэр, хэу­шъхьафыкIыгъэ дзэ операцем хэла­жьэхэрэм яунагъохэм арысхэр, гуфэкIо организациехэм ахэтхэр.
Къэзэрэугъоигъэхэм апашъхьэ къыщыгущыIэзэ, республикэм и ЛIышъхьэ къыхигъэщыгъ цIыф пэпчъ ыгъэлъэпIэрэ шIогъэ пстэури: шIулъэгъур, унагъор, кIэлэцIыкIухэр, унэ гупсэр бзылъфы­гъэхэм зэряпхыгъэр.

«Ренэу тыкъызэрэжъугъэгъунэрэм, шъукъызэрэтфэшъыпкъэм тищыIэныгъэ нахь дахэ, нахь бай къашIы. Унагъом гуфэбэныгъэу илъыр, ар зэрэгуIэтыпIэр, кIэлэцIыкIухэр узынчъэхэу, Iуш цIыкIу-­
хэу къызэрэтэджыхэрэр, хъулъфыгъэхэр зэрэгупсэфхэр, ахэм яцыхьэ зэрэзытелъыжьыр зишIушIагъэр шъоры», — къыIуагъ КъумпIыл Мурат зэIукIэм къе­кIолIэгъэ бзылъфыгъэхэм за­къы­фигъа­зэзэ.
Республикэм ипащэ Урысыем и Президентэу Владимир Путиным игущыIэхэр къыкIиIотыкIыжьыгъэх. ПсынкIэу зызэзыхъокIырэ тиджырэ дунае къэралы­гъо­хэм апашъхьэ къыригъэуцорэ пшъэ­рылъ­хэм язэшIохын бзылъфыгъэхэм яIа­­хьэу хашIыхьэрэм зэрэхэхъо зэпы­тырэм ахэр фэгъэхьыгъагъэх.
КъыткIэхъухьэрэ ныбжьыкIэхэм пIуныгъэу агъотыщтыр, обществэр зэры­гъозэрэ хэбзэшIухэр зэрэпытэщтхэр, цIыфыгъэ шэпхъэ лъагэхэмрэ зэхэтыкIэ дахэхэмрэ къэухъумагъэ зэрэхъущтхэр бэкIэ бзылъфыгъэхэм зэрялъытыгъэр зэIукIэм къыщыхагъэщыгъ. Теубытагъэ зэрахэлъым, къэралыгъом ихэхъоныгъэ яIахь зэрэхашIыхьэрэм афэшI бзылъ­фы­гъэ-ветеранхэм, бзылъфыгъэ-дзэ­къулы­къушIэхэм, хэушъхьафыкIыгъэ дзэ опе­рацием хэлэжьэрэ дзэкъулыкъушIэхэм янэхэм, яшъхьэгъусэхэм, ашыпхъухэм зэрафэразэхэр шъхьафэу къаIуагъ.

Сабыйхэм якъэгъэхъунрэ япIунрэ япхыгъэ Iофыгъохэм къатегущыIэзэ, Адыгеим и ЛIышъхьэ унагъохэм, ныхэм, кIэлэцIыкIухэм IэпыIэгъу афэхъу­гъэнымкIэ амалэу республикэм щызэрахьэхэрэм анаIэ тыраригъэдзагъ. На­хьыбэу сабый къагъэхъуным, кIэлэ­цIыкIубэ яIэным зэрэкIагъэгушIухэрэм, цIыф­хэм япсауныгъэ нахьышIоу къафаухъумэ, гъэсэныгъэ дэгъу арагъэгъоты зэрэхъугъэм, псэукIэ амалэу яIэхэм зыкъызэраIэтыгъэм, IофшIапIэ къазэрафагъотырэм ар алъыIэсыгъ.
Адыгеим щыпсэурэ унагъохэу кIэлэцIыкIу зэрысхэм IэпыIэгъу ягъэгъотыгъэ­ным тегъэпсыхьагъэу 2024-рэ илъэсым сомэ миллиард 1,3-рэ республикэ бюджетым къызэрэхагъэкIыгъэр зэIукIэм щыхагъэунэфыкIыгъ. Ащ нэмыкIэу Социальнэ фондымкIэ сомэ миллиарди
6-м ехъу ахэм аратыгъ. НепэкIэ кIэлэцIыкIу зиIэ унэгъо мин 53-м ехъу рес­публикэм щэпсэу. Ахэм ащыщэу мини 9,5-м ехъур сабыибэ зиIэ унагъох. Зыныбжь илъэс 26-м нэмысыгъэ бзылъ­фыгъэхэу сабый къызыпыфэхэрэм 2025-рэ илъэсым къыщегъэжьагъэу зэтыгъо ахъщэ аIэкIагъахьэ. Я 3-рэ ыкIи ащ къы­кIэлъыкIорэ сабый къызыфэхъухэрэм зэтыгъо ахъщэу аIукIэрэм фэдитIу хэ­хъуагъ. Я 3-рэ ыкIи ащ къыкIэлъыкIорэ сабый къызэрыхъухьэрэ унагъохэм ипотекэмкIэ чIыфэр зытырагъэкIыжьыным пае сомэ миллионым нэс араты.

«Лъытэныгъэ зыфэсшIырэ бзылъфыгъэхэр! ШъуиIофыгъохэм язэшIохын та­пэкIи тынаIэ тедгъэтыщт, шъуищыIакIэ нахьышIу хъунымкIэ ткIуачIэ къыхьырэр зэкIэ тшIэщт. Iофым шъуIэ зэрекIурэм, цIыфхэм шъузэрафэгумэкIырэм, агу къызэрэдэшъущаерэм, тыкъэзыуцухьэрэ дунаир нахь гуIэтыпIэ хъуным амалэу шъуиIэр зэрешъухьылIэрэм афэшI мы гъэтхэ мэфэкI мафэм «тхьашъуегъэпсэу» шъосэIо», — къыIуагъ КъумпIыл Мурат.
ЗэIукIэм икIэух Адыгеим и ЛIышъхьэ республикэм ис бзылъфыгъэхэм ямэфэкIыкIэ къафэгушIуагъ, яIофшIэн дэ­гъоу зэрагъэцакIэрэм, гупцIанэу зэрэщытхэм, гукIэгъу зэрахэлъым афэшI лъэшэу зэрафэразэр къыIуагъ.
«Мы гъэтхэ мэфэкIым гушIогъуабэ, шъузэмыжэгъэ хьалэмэтыбэ къышъу­фе­рэхь, шъуимафэ пэпчъ хъугъэ-шIэгъэ дэ­гъухэмкIэ орэбай», — къыIуагъ Къум­пIыл Мурат.
Джащ фэдэу АР-м и Къэралыгъо Совет — Хасэм и Тхьаматэу Владимир Нарожнэр зэIукIэм къыщыгущыIагъ. Адыгеим итворческэ купхэмрэ искусствэхэмкIэ иIэпэIасэхэмрэ зыхэлэжьэгъэхэ мэфэкI концертыр ыужкIэ къатыгъ.
АР-м и ЛIышъхьэ ипресс-къулыкъу къытырэ
къэбархэмкIэ ЛIышэ Саныет.