Республикэм икъэлэ шъхьаIэ ыкIи Мыекъопэ районым ащыпсэухэрэр псэу зашъохэрэм ылъэныкъокIэ гумэкIыгъохэр аужырэ тхьамэфищым щыIагъэх. А уахътэм ар график гъэнэфагъэкIэ къатыгъ.

Тикъушъхьэхэм лъэшэу къызэращесыгъэм, температурэр зэрехыгъэм апкъ къикIкIэ, псыр къыз­хэкIырэ псыхъоу Цыцэ щтыгъагъ, кIуачIэу иIэр мэкIэ дэдэу икIуапIэхэм къарыхьэщтыгъ. Ары Iофыгъор къызпыкIыгъэр.
Гъатхэр къызехьэм, фабэри къыздихьыгъ. Псы­хъом мылэу телъыгъэри, осыри къыгъэжъужьыгъэх. Мыекъопэ къэлэ администрацием ыкIи «Мыекъопэ водоканалым» къызэратыгъэмкIэ, джы ищыкIагъэм фэдиз псыр зыщызэIуагъакIэрэм къилъэдагъ, зэпыу фэмыхъоу къатын алъэкIы. Гъэтхапэм и 8-м къыщегъэжьагъэу ар нахьыпэкIэ зэрэщытыгъэм фэдэу къакIо хъужьыгъэ.
Арэу щытми, псыр къызхэкIыхэрэм язытет чэщи, мафи зэрэлъыплъэхэрэм, зэхъокIыныгъэ фэхъумэ макъэ къызэрагъэIущтым «Мыекъопэ водоканалым» къыщыкIагъэтхъы.