ЛIэшIэгъум жъогъо нэфэу къыхэхъухьагъ МэщбэшIэ Исхьакъ. Илъэсыбэхэм итхыгъэхэмкIэ лъэпкъым фэлэжьагъ. Ащ ихъишъэ дунаим щызэлъаригъэшIагъ. Адыгэ Республикэм игимн игущыIэхэр ытхыгъ. Дышъэ жъуагъор тын лъапIэу къыфагъэшъошагъ, Урысыем IофшIэнымкIэ и ЛIыхъужъыцIэр къылэжьыгъ.

Исхьакъ дахэу фаIуагъэмрэ фашIагъэм­рэ сэ зыгорэ къыхэзгъэхъожьынэу арэп. Сэ кIэлэегъаджэу Пэнэжьыкъое гурыт еджапIэм Iоф щысшIагъ, апшъэрэ классхэм адыгабзэмрэ адыгэ литературэмрэ щязгъэхьыгъ. ТхакIохэм, усакIохэм атхыгъэхэр кIэлэегъаджэр арыба къафэзыIуатэрэр, аIузылъхьэрэр, мэхьанэу яIэр зэхязыгъашIэрэр.
КIэлэеджакIомэ теубытагъэ хэлъэу ясIощтыгъ МэщбэшIэ Исхьакъ итхылъмэ уямыджэу, лъэпкъым икультурэ, иклассикэ уахэхьаныр зэрэкъиныр. Адыгэмэ хабзэу ахэлъыгъэр, къин мыухыжьэу зэпачыгъэр, мэшIо лыгъэм зэрихьыгъэ­хэр, тарихъым гъогууанэу къыщакIугъэр, ау етIани бзэри шэн-хабзэхэри къызэраухъумэшъугъэхэр, тхакIом итхылъмэ къащыриIотыкIыгъ.
Мафэ горэм Щынджые къикIыгъэу Бгъанэмэ ащыщэу университетым икIэлэегъаджэ тиунэ къихьэгъагъ. Тхылъхэр зытелъ мэкIаим зытеIабэм, МэщбэшIэ Исхьакъ иер къахихыгъ.
— Мыщ фэдэ тхылъ зэгъэфагъэхэр унэм илъэу зысымылъэгъужьыгъэр бэшIагъэ, — Исхьакъ итхыгъэмэ тарыгущыIагъ. Шъыпкъэ, тхылъмэ яджэрэр макIэ хъугъэ.
Джыри зы щысэ гъэшIэгъон къэс­хьыщт. Тигъунэгъу кIалэу Зэрамыку Тембот ипшъэшъэжъые кIыгъоу садэжь къэкIогъагъ ыкIи МэщбэшIэ Исхьакъ итхылъэу «Мыжъо шъхьалым» къыкIэлъэIугъэх. Ар зыкIэзгъэшIэгъуагъэр пшъэшъэжъыем янэ урыс, къалэу Краснодар дэсых, урыс еджапIэм чIэс. Ау, ор-сэрэу пшъэшъэ­жъыер адыгабзэкIэ мэгущыIэ. Джащ фэдэ къабзэу адыгабзэкIэ еджэу, тхэу къычIэкIыгъ. Ар зишIушIагъэр ят, джащ фэдизэу адыгабзэр Iуилъхьан ылъэкIыгъ. Тхылъыри къыIысхыжьыгъэп, шIухьафтынэу къыфэзгъэнагъ. Тэ чылэм дэс ныбжьыкIэхэм бзэр ащэгъупшэжьы тэIошъ тыгу къео. Ащ къыгъэлъагъорэр ны-тыхэм икъу фэдизэу ясабыйхэм Iоф зэрадамышIэрэр ары. Лъэпкъыр щызыгъаIэрэр ныдэлъфыбзэр ары. МэщбашIэм итхыгъэхэм ар къащеIо.
Гъэзетэу «Адыгэ макъэри» IэпыIэ­гъушIу. ТхакIохэм, усакIохэм ятворчествэ фэгъэхьыгъэу гъэзет нэкIубгъохэм къа­рэхьэ. Ащ къыхаутыхэрэм Iоф зыдасшIэхэрэми нэмыкIхэми телефонкIэ ты­зэ­фытеожьызэ тарыгущыIэу бэрэ къы­хэкIы, анахь гъэшIэгъонэу къыхэдгъэщыхэрэр МэщбашIэм ытхыхэрэр, гъэ­хъа­гъэу иIэхэр ары.
Лъытэныгъэшхо зыфэсшIырэ Исхьакъ Шумафэ ыкъор! Урысыем, Кавказ, IэкIыб къэралыгъомэ арыс адыгэхэм ямыза­къоу, дунаим щыпсэурэ лъэпкъыбэхэм уитхыгъэхэр зэлъашIэх. Бзэ зэфэшъхьафыбэхэмкIэ зэрадзэкIыжьыгъэхэу яджэх. Дунаим тхэкIо инэу тетмэ зэу уащыщ. Дышъэ жъуагъор къыпфагъэшъошагъ, упсаузэ саугъэт пфагъэуцугъ, ар зыфашIэрэр зырыз.
БгъэшIагъэм фэдиз джыри къэбгъэшIэни, плъэ утетэу, псауныгъэ уиIэу, адыгэ лъэпкъым щытхъоу къыфэпхьы­гъэм джыри хэбгъэхъонэу сыпфэлъаIо!
Кощэгъу Нуриет.
Пэнэжьыкъуай