Зэнэкъокъум зэрэхэлажьэхэрэм ишIуагъэкIэ
Урысыем икъэлэ цIыкIухэм япроектхэм язэнэкъокъу Адыгеим имуниципалитетхэр хэлэжьэнхэ алъэкIыщт.
Федеральнэ проектэу «Iэрыфэгъу къэлэ псэукIэр» зыфиIорэм хэхьэрэ лъэпкъ проектэу «ЩыIэныгъэм пае инфраструктурэр» зыцIэм игъэцэкIэн къыдыхэлъытагъэу Урысыем икъэлэ цIыкIухэм япроектхэр зыхэлэжьэщтхэ зэнэкъокъур япшIэнэрэу мыгъэ зэхащэ. Адыгеим имуниципальнэ администрациехэм ащ зыфагъэхьазыры. ЛъэIу тхылъхэр зытыщтхэм ащыщых къалэхэу Мыекъуапэрэ Адыгэкъалэрэ, джащ фэдэу къэлэ гъэпсыкIэ зиIэ поселкэхэу Инэмрэ Яблоновскэмрэ.
Шъугу къэдгъэкIыжьын, къалэу Мыекъуапэ тIогъогогъо мы зэнэкъокъум щытекIуагъ, ащ ишIуагъэкIэ зыгъэпсэфыпIэ чIыпIэу «Мэздахэ» зэтегъэпсыхьажьыгъэным иапэрэ ыкIи иятIонэрэ едзыгъохэм апэIухьэгъэ мылъкур къыфатIупщыгъагъ. Джырэ уахътэм гъэцэкIэжьынхэм яящэнэрэ уцугъо къыдыхэлъытэгъэ документацием игъэхьазырын макIо. Урысые зэнэкъокъухэм Адыгэкъалэ щэгъогогъо ащытекIуагъ.
— Къэлэ гъэпсыкIэ зиIэ поселкэхэу Инэмрэ Яблоновскэмрэ пштэхэмэ, ахэм ащыпсэурэ цIыфхэм яшIошIхэр къыдалъытэхэзэ, яадминистрациехэм гъэцэкIэжьынхэу рахъухьэхэрэм зэхъокIыныгъэхэр афашIыгъэх. Зэнэкъокъум мыщ фэдэ псэуалъэхэр хагъэлэжьэщтых: «Зэкъошныгъэм» игупчэу Инэм дэтыр, ЯблоновскэкIэ псыхъоу Пшызэ инэпкъ, — къыщыхагъэщыгъ АР-м псэолъэшIынымкIэ и Министерствэ.
Ащ къызэритыгъэмкIэ, псэупIэхэм яадминистрациехэм общественнэ чIыпIэхэм ягъэцэкIэжьын зэрэрагъэкIокIыщт едзыгъохэр къыдэзылъытэрэ гъогу картэхэр зэхагъэуцуагъэх. ЛъэIу тхылъхэр жъоныгъуакIэм и 1-м нэс АР-м псэолъэшIынымкIэ и Министерствэ IэкIагъэхьанхэ фае.