Лъэпкъ гъэзетэу «Адыгэ макъэр» къызыдэкIырэр гъэтхапэм и 8-м илъэси 102-рэ мэхъу. Ащ ипэгъокIэу Адыгэ республикэ гимназием икIэлэеджакIохэр ыкIи Адыгэ къэралыгъо университетым адыгэ филологиемрэ шIэныгъэмрэкIэ ифакультет истудентхэр къырагъэблэгъагъэх. АдыгабзэкIэ къыдэкIырэ гъэзет закъом итарихъ, инепэрэ мафэ ныбжьыкIэхэм ашIогъэшIэгъоныгъ.

Редакциер зычIэт унэр культурнэ кIэ­нэу щыт, тарихъым чIыпIэ гъэнэфагъэ щеубыты. Унэм икъэбаркIэ экскурсиер аублагъ, ар Альтшулерхэм япсэупIагъ, яаптеки хэтыгъ. Нэужым лIэшIэгъум ехъурэ къыдэкIырэ республикэ гъэзетхэм яредакциехэр мыщ чIэтхэ хъугъэ. «Адыгэ макъэм» фэгъэхьыгъэ тарихъыр, непэрэ мафэм ар къызэрэдэкIырэр къа­фиIотагъ мыщ иIофышIэу Анцокъо Иринэ. Непэ мыщ щылэжьэрэ журналистхэм нэIуасэ афэхъугъэх.

Адыгэ лъэпкъым икультурэ, итарихъ, ыбзэ зэрэщыIэщтхэм ыкIи хэхъоныгъэ зэрашIыщтым «Адыгэ макъэр» ылъапс. Гъэзетым гъогушхо къыкIугъ. Апэрэ адыгэ гъэзетыр зыгъэхьазырыгъэр а лъэхъа­ным тхэным зыщызыушэтэу езыгъэжьэгъэгъэ, ыужкIэ зэлъашIэ хъугъэ адыгэ тхэкIо цIэрыIоу, СССР-м и Къэралыгъо премие къэзылэжьыгъэ КIэрэщэ Тембот. Апэрэ «Адыгэ макъэр» нэкIубгъуиплI хъоу пстэумкIи номери 8 къалэу Краснодар къыщыдэкIыгъагъ. Адыгэ лъэпкъымкIэ мэ­хьанэшхо зиIэ Iофыгъор лъызыгъэкIо­тэн, зыгъэцэкIэн ылъэкIынэу къыхэкIыгъэр макIэп. Адыгэ гъэзетым иредакцие чIэкIыхи заом кIуагъэри бэ, ахэм ащыщ Андырхъое Хъусен. Илъэс зэкIэлъыкIохэм тхэкIо цIэрыIо хъугъэхэу Хьаткъо Ахьмэд, Жэнэ Къырымызэ, МэщбэшIэ Исхьакъ ыкIи нэмыкIыбэхэм яапэрэ лъэбэкъухэр мыщ щашIыгъэх.

Гъэ­зетым дэлажьэхэрэр зычIэс кабинетхэр ныбжьыкIэхэм къакIухьагъэх, гущыIэгъу афэхъугъэх. Нэужым редакцием щагъэ­псыгъэ хьакIэщым ахэр чIащагъэх, Дыгъу Айтэч исурэтэу ар къэзыгъэ­баирэр ныбжьыкIэхэм ашIогъэшIэгъо­ныгъ. КупкIэу исурэт хэлъыр, мэхьанэу иIэр сурэтышIым къафиIотагъ. Адыгэ лъэп­къым ибаиныгъэ, икультурэ мы сурэтым щыпхырищыгъ.
«Адыгэ макъэм» иредактор шъхьаIэу МэщлIэкъо Саидэ нэужым ныбжьыкIэхэм гущыIэгъу афэхъугъ. Къызэреблэгъагъэхэр игуапэ зэрэхъугъэр пэублэм къыщиIуагъ. Неущрэ мафэр ныбжьыкIэхэм аIэ зэри­лъыр, редактор шъхьаIэ хъущтхэр къа­хэкIын зэрилъэкIыщтыр къыIуагъ.
— Шъощ сыфэдагъ сэри апэрэу редакцием сыкъызычIэхьэм. Усэ къеджэнымкIэ зэнэкъокъум текIоныгъэ къызыщыдэсэхым республикэ уцугъом тыкъащэгъагъ ыкIи «Адыгэ макъэм» тырагъэб­лэгъэгъагъ. Гъэзетыр къызэрэдэкIырэ шIыкIэр лъэшэу сшIогъэшIэгъоныгъ. Ащ дэжьым мыщ редактор шъхьаIэу сыриIэщтэу къысаIогъагъэмэ, сшIошъ хъущтыгъэп. Уиныдэлъфыбзэ шIу плъэгъоу, ар бгъэлъапIэ зыхъукIэ, урылэжьэнэу уфэ­ещт. Тисэнэхьат шъушIогъэшIэгъон хъоу шъу­къакIомэ, тигопэщт, ныбжьыкIэхэр ти­щыкIагъэх, — къыIуагъ МэщлIэкъо Саидэ.
Журналист сэнэхьатым шъэфэу хэлъхэр нэужым редактор шъхьаIэм къафиIотагъ. Ар гъэшIэгъон дэдэу зэрэщытыр, цIыфхэм узэрахищэрэр, республикэм имызакъоу, IэкIыб къэралхэм, нэмыкI республикэхэм журналистхэр кIохэу къызэ­рэхэкIырэр къыIуагъ. Къэбэртэе-Бэлъ­къар, Къэрэщэе-Щэрджэс республикэ­хэм зэпхыныгъэ адыряIэу Iоф зэрашIэрэр къыхигъэщыгъ. БэмышIэу ткъош респуб­ликэ гъэзетхэм яредакциехэм яIофы­шIэхэр Адыгеим къакIохи Iоф щашIагъ, джащ фэдэу «Адыгэ макъэм» ижурналистхэри яхьакIагъэх, къэбар гъэшIэгъоныбэ тигъэзет къихьагъ.
Типографием Iоф зэришIэрэм, гъэзетыр къызэрэдэкIырэм фэгъэхьыгъэ видеотехыгъэ нэужым ныбжьыкIэхэр рагъэплъы­гъэх.

— Лъэпкъым уфэлэжьэным мэхьанэшхо иI. АР-м и ЛIышъхьэу КъумпIыл Мурат ынаIэ лъэшэу къыттет. Илъэс къэс тимэфэкI ипэгъокIэу зыкъытIуегъакIэ, гущыIэгъу къытфэхъу, тигумэкIыгъохэр зэрегъашIэ ыкIи ахэр зэрэзэшIуихырэмкIэ лъэшэу тыфэраз, — къыIуагъ редактор шъхьаIэм.
Гъэзетыр тхьамафэм тфэ къызэрэдэкIырэм имызакъоу, дунэе хъытыуми чанэу зэрэщылажьэхэрэр нэужым МэщлIэкъо Саидэ къыIуагъ. Телеграм-нэкIубгъуитIу гъэзетым иI, зым урысыбзэкIэ, адрэм адыгабзэкIэ къэбархэр къарэхьэх.
— Социальнэ нэкIубгъохэм ащызэхатщэрэ зэнэкъокъухэм шъуакъыхэлэжьэн шъулъэкIыщт. Сэнаущыгъэу шъухэлъыр къэжъугъэлъэгъон амал шъуиI. Республикэм щыпсэурэ закъохэр арэп тигъэзет еджэхэрэр, дунэе хъытыум ишIуагъэкIэ IэкIыбым щыIэ тилъэпкъэгъухэм «Адыгэ макъэр» дэгъоу ашIэ, тижурналистхэм ацIэ чыжьэу Iугъэ. Лъэпкъым шъуфэлэжьэнэу, ыпэкIэ шъулъыкIотэнэу, сэнэхьат гъэшIэгъон шъуиIэнэу шъуфаемэ, «Адыгэ макъэм» шъукъеблагъ, — ныбжьыкIэхэм зафигъэзагъ редактор шъхьа­Iэм.
Нэужым гъэзетыр къыдэкIыным ыпэкIэ Iофэу дашIэрэр хьакIэхэм къафаIотагъ. Адыгабзэм изэгъэшIэнкIэ, икъэухъумэнкIэ мыщ фэдэ Iофтхьабзэхэм яшIуагъэ къызэрэкIорэр къыIуагъ Адыгэ республикэ гимназием икIэлэегъаджэу Хьабэхъу Сусанэ.
— АдыгабзэкIэ къыдэкIырэ гъэзет закъом иIофшIэн зэрэзэхащэрэр, къыкIугъэ гъогур гъэшIэгъоны. Журналист сэнэхьатым фэщагъэ хъущт ныбжьыкIэхэр зэрэтиIэщтым тицыхьэ телъ. Редактор шъхьаIэм яIофшIэн зыфэдэр игъэкIотыгъэу къытфиIотагъ, гъэшIэгъонэу бэ зэ­рэхэлъыр къыдгурыIуагъ. ТиеджапIэ адыгабзэм изэгъэшIэн игъэкIотыгъэу пылъ, ныдэлъфыбзэм епхыгъэ мазэм къыды­хэлъытагъэу мы экскурсием мэхьанэ ин иI, — къыIуагъ Хьабэхъу Сусанэ.
КIэлэеджакIоу гущыIэгъу тызыфэхъугъэхэм зэкIэми апэрэу редакцием къызэрэчIэхьагъэхэр къытаIуагъ. Чэрынэ Миланэ адыгабзэр дэгъоу ешIэ, «Адыгэ макъэм» иунагъо исхэр кIэтхэх, ныбжьыкIэхэм, культурэм афэгъэхьыгъэ къэбархэм яджэу къызэрэхэкIырэр къыхигъэщыгъ. Гъэзетым хэутыгъэным зэрэфагъэхьазырырэр шIогъэшIэгъонэу ащ зэригъэлъэгъугъ.
Дзыбэ Рэдэд иунагъокIэ адыгабзэр дэгъоу ашIэ, янэжъ-ятэжьхэм адэжь гъэ­зетыр илъэу бэрэ елъэгъу. Ятэу Дзыбэ Мыхьамэти, ежьыри гъэзетым инэкIубгъохэм бэрэ къарэхьэх. Адыгэ лъэпкъым ибаиныгъэ щыщэу мы гъэзетыр елъытэ. ИщыIэныгъэ гъогу адыгэ культурэм рипхын мурад зэриIэр кIалэм къытиIуагъ.
Адыгабзэр дэгъоу зышIэрэ, зыгъэлъэпIэрэ ныбжьыкIэхэм япчъагъэ нахьыбэ хъуным, ныдэлъфыбзэм рылэжьэнхэр къыхахыным тэри тыщэгугъы.
ДЕЛЭКЪО Анет.
Сурэтхэр авторым иех.