Урысые политическэ партиеу «Единэ Рос­сием» и Адыгэ шъолъыр къутамэ и Секретарэу, Адыгеим и ЛIышъхьэу КъумпIыл Муратрэ мы партием и Къыблэ Координационнэ совет ипащэу, партием и Гене­ральнэ совет и Президиум хэтэу Сергей Горняковымрэ АР-м и Правительствэ и Унэ IофшIэгъу зэIукIэгъу щызэдыряIагъ.

Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, Администрацием ипащэ игуадзэу Къонэ Заур, партиеу «Единэ Россием» ишъолъыр гъэцэкIэкIо комитет иIэшъхьэтетэу АфэшIэгъо Рэмэзан.
ЗэIукIэгъур къызэIуихызэ республикэм и ЛIышъхьэ къызэрэхигъэщыгъэмкIэ, «Единэ Россиер» республикэ парламентымкIи муниципальнэ лIыкIо къулыкъу­хэмкIи Адыгеим ипартие пэрытэу щыт. Ащ амал къеты партием хэтхэм федеральнэ Iофыгъохэр чIыпIэхэм тэрэзэу, шIуагъэ къатэу ащыпхыращынхэмкIэ.

ЗэдэгущыIэгъум илъэхъан «Единэ Россиер» кIэщакIо зыфэхъугъэ партийнэ проектхэмрэ федеральнэ программэхэмрэ республикэм щыпхырыщыгъэн­хэмкIэ пшъэрылъэу яIэхэм атегущыIагъэх. ХэушъхьафыкIыгъэу къызщыуцугъэ­хэр дзэ операцием хэлажьэхэрэм ыкIи ахэм яунагъохэм арысхэм, чIыпIакIэхэм ащыпсэухэрэм IэпыIэгъу ятыгъэнымкIэ ашIэрэр ары.
Адыгеим и ЛIышъхьэ къызэриIуагъэм­кIэ, хэушъхьафыкIыгъэ дзэ операциер къызежьагъэм къыщыублагъэу тидзэ­кIолIхэм IэпыIэгъу ятыгъэным епхыгъэу республикэм щызэрахьэрэ Iофхэм пэщэныгъэ адызезыхьэрэр партием ишъо­лъыр къутам. Партиеу «Единэ Россием» общественнэ IэпыIэгъу етыгъэнымкIэ штабым ынаIэ тетэу шIушIэ хьылъэхэр агъэхьазырых. Ахэр зищыкIагъэхэм аIэкIэгъэхьэгъэнхэм партием хэтхэр хэлажьэх, сымэджэщхэм ащэIэх, волонтерхэм яIофшIэн нахь дэгъоу зэхэщэгъэным анаIэ тырагъэты.
«Тэ къыдгурэIо пэщэныгъэ зезыхьэрэ партием аштэрэ унэшъо пстэухэмкIи пшъэдэкIыжь зэрихьырэр, цIыфхэм ящыIэныгъэкIэ ахэм мэхьанэшхо зэряIэр. Джащ пае партиеу «Единэ Россием» хэтхэр республикэм щызэшIуахырэ Iофтхьабзэхэм ренэу ахэлажьэх, гъэсэныгъэм, псауныгъэм икъэухъумэн, социальнэ ыкIи нэмыкI лъэныкъохэм ащыпхыращырэ проект шъхьаIэхэр гъэцэкIагъэ хъунхэм анаIэ тырагъэты, алъэплъэх. Ащ дакIоу цIыфхэм яеплъыкIэ къыдэт­лъытэзэ, Iофтхьабзэу зэшIотхыхэрэм афэхъурэ кIэуххэми тахэплъэ, тахэIэзыхьажьы», — къыIуагъ АР-м и ЛIышъхьэ.
Сергей Горняковыр къызэгущыIэм, партиеу «Единэ Россием» ишъолъыр къутамэ Iофэу ышIэрэм осэшхо къыфишIыгъ, мы лъэхъэнэ благъэхэм ащ хэтхэм яIофшIэнкIэ анахь мэхьанэшхо зиIэ пшъэрылъэу зэшIуахыщтхэри къыгъэнэфагъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.