Бзылъфыгъэхэм я Дунэе мафэ ипэгъокIэу фондэу «Хэгъэгум иухъумакIохэр» зыфиIорэм ишъолъыр къутамэ тхылъыпIэм къэгъэгъэ Iэрамхэр хэшIыкIыгъэнхэмкIэ мастер-класс щыкIуагъ.

Iофтхьабзэм къырагъэблэгъагъэх хэушъхьафыкIыгъэ дзэ операцием хэлэжьагъэхэм ыкIи дзэкIолIэу хэкIодагъэ­хэм якIэлэцIыкIухэм янэхэр ягъусэхэу.
Шъолъыр фондымрэ Мыекъопэ къэралыгъо технологическэ университетымрэ зэгъусэхэу пхыращырэ проектэу «Уроки мастерства для СВОих» зыфи­Iорэм къыдыхэлъытагъэу ар зэхащагъ.
Апшъэрэ еджапIэм икIэлэегъаджэхэр ыкIи истудентхэр яIэпыIэгъухэу ныбжьыкIэ цIыкIухэм янэхэм, янэжъхэм апае къэгъэгъэ гъэшIэгъонхэр, дахэхэр егугъухэзэ тхылъыпIэм хашIыкIыгъэх. Ахэр зы мэфэкI Iэрамхэу аугъоижьыгъэх. Нэбгырэ пэпчъ творческэ гупшысэу, еплъыкIэу иIэр къыриIотыкIын амал иIагъ.
ХэушъхьафыкIыгъэ дзэ операцием иветеранхэм якIэлэцIыкIухэм апае фондымрэ университетымрэ зэгъусэхэу мыр я 4-у мастер-класс афызэхащэ. Ащ фэдэ Iофтхьабзэхэм яшIуагъэкIэ ныбжьыкIэ цIыкIухэм творческэ амалэу яIэм хэхъо ыкIи дзэ операцием хэлажьэхэрэм яуна­гъохэм IэпыIэгъу тызэрафэхъурэр зэхашIэ.
— Творчествэр — цIыфым зыкъы­зэIуихынымкIэ амалышIу. Непэрэ Iофтхьабзэр десэ афэ­хъун къодыеу арэп зыкIызэхэтщагъэр, сабыйхэр зэгупшысэхэрэр, гъатхэм дунаим идэхагъэ аIэ цIыкIухэмкIэ къыраIотыкIыным, чэфыгъор ахэтлъхьаным пай. ТилIыхъужъхэм яунагъохэм ащ фэдэ амал ядгъэгъотын зэрэтлъэкIырэм тэри тегъэгушIо, — хигъэунэфыкIыгъ шъолъыр фондым ипащэу ПIатIыкъо Аслъан.
Мастер-классым къекIолIэгъэ кIэлэцIыкIухэм ащыщхэм гущыIэгъу тафэ­хъугъ. Ахэм ахэт хэушъхьафыкIыгъэ дзэ операцием хэкIодэгъэ Илья Покусаевым ипшъашъэу Эвелинэ. Ар гурыт еджапIэу N 17-м ия 7-рэ класс щеджэ.
— СицIыкIугъом къыщегъэжьагъэу «оригами» зыфаIорэм зыфэ­сэгъасэ, пкъыгъо гъэшIэ­гъонхэр тхылъыпIэм хэсшIыкIынхэу сикIас. Сигуапэу непэрэ Iоф­тхьабзэм сыхэлажьэ, — къыхигъэщыгъ Эвелинэ.
А еджэпIэ дэдэм ия 4-рэ класс щеджэрэ Валерия Тороховар мастер- классым игуапэу къекIолIагъ. Зыпсэ зыгъэтIылъыгъэ УФ-м и ЛIыхъужъэу Роман Тороховым ар ипшъашъ.
— Сыд фэдэрэ Iофтхьабзэу шъолъыр фондым зэхищэхэрэм тиунагъокIэ тыкъырагъэблагъэ, тигуапэу тахэлажьэ. Сэ сурэтшIыным нахь сыпылъ, ау тхы­лъыпIэм къэгъагъэхэр хэсшIыкIыныр сшIогъэшIэгъонэу непэ сыкъэкIуагъ. Бзылъфыгъэхэм ямэфэкI ехъулIэу сяни, игъо сифэмэ, сянэжъи къэгъэгъэ Iэрамхэр афэсшIынэу сыфай. Ахэр ащ зэрэщыгушIукIыщтхэм сицыхьэ телъ, — къыуIагъ Валерие.
Iэшъынэ Сусан.
Сурэтыр авторым ий.