Непэрэ лъэхъаным дезыгъэштэрэ бзылъфыгъэу Iофым охътабэ те­зыгъэкIуадэрэр хэдэн фаеу мэхъу, унагъомрэ сэнэхьатым епхыгъэ IофшIэнымрэ азыфагу еуцо. ЛъэгэпIэ инхэм анэсыгъэ финансист IэпэIасэу Нэгъуцу Гощнагъо ащ фэдэ гумэкIыгъо зыкIи иIагъэп.

Шэн пытэ зиIэ, акъылыгъэ хэлъэу зекIорэ цIыф ар — «жьы» зыкIэт бзылъфыгъ. ­Илъэс щэкIым ехъурэ Гощнагъо финансхэм япхыгъэ IофшIэнхэр егъэцакIэ — апэ Урысыем и Сбербанк, ащ ыуж «Крайинвестбанкым» — ищыIэкIэ-псэу­кIи ахэм яфэмэ-бжьымэ къытехьагъ, ащ елъытыгъэу, охътэ хьаулые къызхэмыфэрэ зекIокIэ хабзэри зыфигъэнэфэжьыгъ. Нэгъуцу Гощнагъо Байзэт ­ыпхъум иIофшIэгъу уахътэ та­къикъ-такъикъэу гощыгъэ —зэ­IукIэгъухэр, зэхэсыгъохэр, тхьа­пэмэ Iоф зыщадишIэрэр — ащ фэдэ зэкIэлъыкIуакIэм бэшIа­гъэу ар есэжьыгъ.
ПшъэдэкIыжьышхоу ыхьырэм, зэпыугъо зимыIэ IофшIэным ар агъэщынэрэп, ау агъэпшъы, жьыкъэщэгъуи химыгъуатэрэм фэдэу къыпщэхъу — тыдэкIи игъо ифэнэу щыт: хъурэ-шIэ­рэ-
мэ ежь ышъхьэкIэ алъыплъэн фае — къэпIопэщтмэ, ышIэщтым, ыгъэцэкIэщтым ащыкIэрэп.
Сыдэущтэу зэкIэми ар игъо афифэра? Пкъышъолыр зыпкъ итэу пIыгъышъуныр, узэкIужьэу, ренэу гъэкIэрэкIагъэу ухэтышъу­ныр, къыздежъугъаштэх, IэшIэ­хэп, ау бзылъфыгъэу сатыум хэтымкIэ Iофыгъошху. Шъачэ хэхьэрэ къуаджэу Хьаджыкъо къыщыхъугъэ Нэгъуцу Гощнагъо (Хэшхмэ ащыщ) — пэрытныгъэ шэныр къызэбэкIырэ, гъэIоры­шIэным хэшIыкI фызиIэ цIыф, сыдигъокIи пшъэрылъэу зыфигъэуцужьыгъэм епцIыжьырэп, икабинет чIэсми, пэщэ пыта­гъэу хэлъым дакIоу, ар бзылъфыгъэ лъэгъупхъэу, узIэпызыщэу къэ­нэжьы. АкъылышIу, жэбзэ дэгъу Iулъ, сэмэркъэу дахэ хэлъ — ар Тхьэр къызэшIушIэгъэ цIыф, зы­кIи къызэкIэкIуагъэп, зыкIи зи Iэпэдэлэл ышIыгъэп. Iоф­шIэгъу уахътэр хэзыгъэ имыIэу гъэнэфагъэ: телефоныр къытео зэпыт, секретарым зыкIэтхэ­­жьыщт тхьапэхэр Iатэу къы­фы­чIехьэх, отделмэ япащэхэр чэзыум хэсых, пчэдыжь планеркэм чIэхьанхэу хьазырых. ГущыIэхэу «Уахътэр — ахъщэ» зыфиIоу банкым идэпкъ тетхагъэм имэхьанэ мыщ нахь щызэхапшIэу мэхъу. Гощнагъо ынэгу къызыушъэбыжьыгъэр, зыкъызызэблихъугъэр ащ ищы­Iэныгъэ анахь щигъэлъэпIэрэ янэ-ятэхэм ягугъу зыфэтэшIыр ары, зигъэпсэфынэу джыри мытIысыжьызэ гущыIэгъу ащ тыфэхъугъагъ.
— Сиунагъо, зэкIэ сигупсэхэм, гущыIэ лые къызэмышIэ­кIыгъэ псалъэкIэ сакъытегущыIэ сшIоигъу, — къеIуатэ Гощ­нагъо. — Ахэр ары сищыIэ­ныгъэ мэхьанэ къезытыгъэхэр. Ны-тыхэм ягущыIэ фабэ, ягу­кIэгъу, шIулъэ­гъоу къытфыряIэр, къызэрэт­фыщытхэр сыдигъокIи тэ зэхэтэшIэ. Сэ гъэхъа­гъэу сшIыгъэмэ ахэм яIахьы­шхо ахэлъ, ащ сэ уасэ фэсэшIы.
Илъэс зэфэшъхьафхэм мызэу, мытIоу тызэдэгущыIэу хъугъэ — кабинет зэфэшъхьафхэм е «Адыгэм и Унэу» 2014-рэ илъэ­сым кIымэфэ Олимпийскэ джэ­гунхэр Шъачэ зыщыкIогъэхэ лъэхъаным агъэпсыгъагъэм. Нэ­гъуцу Гощнагъо удэгущыIэныр, шъыпкъэр пIощтмэ, Iофыгъо псынкIэхэм ащыщэп: ащ игупшысэхэр, игущыIэхэр псын­кIэ дэдэу зэкIэлъэкIох, тхьапэм тептхэнэу игъо уифэрэп. Ар зэресагъэу, пчъагъэхэу иIофшIэн епхыгъэхэр «къыптыретакъох», иIофшIэкIо куп игъэхъагъэхэр, пшъэрылъэу зыфагъэуцужьхэ­рэр, ахэр зэкIэ ежьыркIэ мэхьанэшхо зиIэ Iофыгъох.
— ЕджапIэр къэсыухи, институтым сычIэхьанэу зызгъэ­хьазыры зэхъум, илъэс заулэкIэ арэу лъэшэу сищыIэныгъэ зэ­хъокIыщтми, финансхэм япхыгъэ Iофхэм сафэгъэзэгъэщтми сшIэгъахэп, — къеIуатэ Гощ­нагъо. — Ны-тыхэм ялъагъо ясабыйхэри рэкIох е ахэм къа­фагъэнэфэгъэ гъогур къыхахы. Ау сэ сиIоф шъхьафыгъэ. Сянэ кIэлэегъадж, сятэ сурэтышIэу егъашIэм лэжьагъэ. Сэ Ставрополь сыщеджагъ, политехыр къыщысыухыгъ, инженер-механик сэнэхьатыр зэрэзгъотыгъэр къэзыушыхьатырэ дипломыр къыдэсхыгъ.
Ау щыIэныгъэм ежь-ежьырэу зэхъокIыныгъэхэр ешIых. Илъэс 23-рэ зыныбжь специалист ныбжьыкIэу Гощнагъо Къэралыгъо банкым 1983-рэ илъэсым Iухьанэу хъугъэ. Апэ ревизорэу Къэралыгъо IофшIэкIо сберкассэм (а лъэхъаным ащ фэдэхэр щыIагъэх) щылэжьагъ. Зы Iоф­шIэгъу илъэс тешIагъэу, ар сбер­кассэу N 18-49-м ипащэ игуадзэу агъэнэфагъ. 1988-рэ илъэсым Нэгъуцу Гощнагъо гъэсэныгъэ, Пшызэ къэралыгъо мэкъумэщ университетым бухгалтер-экономист сэнэхьатыр щызэригъэгъотыжьыгъ. IофышIэ къызэрыкIоу банкым Iухьэгъагъэр илъэс тIокIырэ тфырэм къыкIоцI пэщэ IэнатIэм нэсыгъ. Урысыем и Сбербанк икъутамэу ПсышIопэ районым щыIэм ипащэу Гощнагъо загъэнэфэгъа­гъэр 2007-рэ илъэсым имэзэе маз ары, а IэнатIэм илъэсихырэ Iу­тыгъ. А уахътэм къыкIоцI гъэхъагъэхэр ышIыгъэх: илъэсныкъо нахь темышIагъэу къалэу Урысыем и Сбербанк имедалэу «Фэшъыпкъэу къулыкъу зэрихьы­рэм фэшI» зыфиIорэр Москва къыщыратыжьыгъ. А бгъэхалъхьэр правительственнэмэ арагъапшэ, осэшхо фашIы.
Нэгъуцу Гощнагъо зыщылажьэ­щтыгъэ Сбербанкым къутэми­бгъу епхыгъагъ, ахэм нэбгыри 120-мэ Iоф ащашIэщтыгъ.
— IофышIэхэм сагъэразэ­щтыгъэ, гуетыныгъэшхо цIыфхэм яIагъ, — къеIуатэ ащ. — Мафэ къэс пшъэдэкIыжь зыпылъ Iофышхохэр къыкъокIыщтыгъэх, ар зэкIэми афэщыIэщтыгъэп, бэ IукIыжьыщтыгъэр, ау банкым къыIунагъэхэм IэпэIэсэныгъэ­шхо ахэлъыгъ, анахь Iоф хьы­лъэхэр зэшIуахышъущтыгъ.
2013-рэ илъэсым, Сбербан­кым илъэс щэкIырэ зыщэлажьэм ыуж, Нэгъуцу Гощнагъо ОАО-у «Крайинвестбанкым» и Къыблэ шъолъыр дирекцие пащэ ашIыгъагъ, илъэсиблыкIэ узэкIэIэ­бэжьмэ пенсием тIысыжьыгъэ. Ау ащ ишIэныгъэрэ иIэпэIэсэныгъэрэ непи бэмэ къызфагъэ­федэ.
— IофшIэным охътабэ ыхьыщтыгъ, ау сиунэ, сиунагъо, сянэ-­сятэхэр сищыIэныгъэкIэ анахь осэшхо зиIэхэу ренэу щы­тыгъэх, — къыкIегъэтхъы Гощнагъо. — Сишъхьэгъусэ, Нэгъуцу Махьмудэ Индрисэ ыкъор илъэс пчъагъэ хъугъэу, ПсышIопэ къэлэ сымэджэщэу N 1-м кардиологиемкIэ иотделение ипащ, ащи IофшIэным охътабэ тырегъэкIуадэ. Сипшъа­шъэу Дианэ медицинэ институтыр къыухыгъ, врач-кардио­логэу мэлажьэ. Сэ сынасыпышIу, Iа­хьылхэр, ныбджэгъухэр, нэIуа­сэхэр бэу сиIэх, ахэм гухахъо ахэсэгъуатэ, IофыгъошIухэм са­къыфагъэущы. Джыри бэшIагъэу, IофшIэныр езгъэжьэгъэ къодыеу, сэ зэсIожьыгъагъ: сыд фэдэ мэхьанэ IофшIэным иIэми, сиунагъо пстэуми апэ итынэу щыт. Ащ Iо хэлъэп…
Ныбэ Анзор.