СамбэмкIэ Урысыем ичемпиона­тэу Краснодар щыкIорэм иапэрэ мафэ Адыгэ Республикэм дышъэ медаль къыфихьыгъ.

СпортымкIэ дунэе класс зиIэ мастерэу, килограмм 71-м нэс къэзыщэчыхэрэм якуп хэтыгъэ Наш Расул ухьазырныгъэ дэгъу къыгъэлъэгъуагъ. Ар финалым Свердловскэ хэкум илIыкIоу Али Турсуновым щыIукIагъ ыкIи очкохэмкIэ 6:3-у текIуагъ. Мы илъэсыр пштэмэ, сэнаущыгъэ зыхэлъ тибэнэкIо цIэрыIо мэхьанэшхо зиIэ спорт зэнэкъо­къухэм ятIонэрэу текIоныгъэр къащыдихыгъ, чемпионатым ыпэкIэ Урысыем ипервенствэ дышъэ медаль къыщихьыгъ.
Мы медалым республикэр ежагъ, сыда пIомэ аужырэу Адыгеим илIыкIо Урысыем ичемпионат текIоныгъэр къызщыфагъэшъошагъэр 2019-рэ илъэсыр ары. Расул зыгъа­сэхэрэр Джарымэкъохэу Рустемрэ Азмэтрэ. Апэрэ тренерэу иIагъэр Джарымэкъо Нурбый.
СамбэмкIэ Урысыем ичемпионат къэралыгъом ишъолъыр 61-мэ къарыкIыгъэ спорт­смен 640-рэ хэлажьэ. Адыгеир нэбгыри 8-мэ къагъэлъагъо: Наш Расул, Тыгъужъ Тимур, Кобл Рэмэзан, Мэлгощ Адам, СтIашъу ТIа­хьир, Хьакъуй Амир, Гъомлэшк Анзор ыкIи Татьяна Шаталовар.
Зэнэкъокъум къэралыгъом исамбист анахь лъэшхэр хэлажьэх. Ахэм ахэтых Урысыем ичемпионатхэм текIоныгъэр ыкIи хагъэунэфыкIырэ чIыпIэхэр къащыдэзыхыгъэхэр, дунаим ыкIи Европэм ячемпионхэр. Урысыем самбэмкIэ ифедерацие исайт ыкIи телеканалэу «МатчТВ» зыфиIорэм иэфир занкIэ яамалкIэ Iофтхьабзэр зэрэкIорэм шъулъыплъэн шъулъэкIыщт.
Спортсмен анахь лъэшхэм медальхэр зэрафагъэшъошэщтхэм дакIоу, Европэм ичемпионатрэ (Кипрэ щыкIощт) дунаим ичемпионатрэ (Туркменистан щызэхащэщт) ахэлэжьэнхэмкIэ фитыныгъэ яIэщт.