Адыгэ Республикэм и Сурэт къэгъэлъэгъуапIэ «Тайны древнего Египта» зыфиIорэ интерактивнэ къэгъэлъэгъоныр къыщызэIуахыгъ. Англием, Францием, Италием ыкIи Египет ямузейхэм ачIэлъ экспонати 100-м атехыгъэ пкъыгъо хьалэмэтхэр ащ хэхьагъ.

ИкIэрыкIэ шъыпкъэу гъэпсыгъэ къэ­гъэлъэгъоным ипкъыгъохэр дахэу, узыIэпащэу агъэпсыгъэх. Археологием ылъэ­ныкъокIэ мэхьанэшхо зиIэ ыкIи гъэшIэгъонэу гъэпсыгъэ пкъыгъо зэфэшъхьаф­хэр, Египет итарихъ фэгъэхьыгъэ фильмыр ыкIи нэмыкIхэри мыщ къекIуа­лIэхэрэм зэрагъэлъэгъун алъэкIыщт. Египет, Англием, Францием, Италием ямузейхэм ачIэлъ экспонат цIэрыIохэм атехыгъэ пкъыгъохэр гъэшIэгъоных. Ахэм ахэхьэх Египет тхьэхэм, ахэм якъуп­шъхьэ-лъашъхьэхэм ыкIи къэунэхэм атехыгъэ сурэтхэр, пкъыгъохэр.
Къэгъэлъэгъоным изэхэщакIохэм къызэрыхагъэщыгъэмкIэ, мыщ къекIуа­лIэхэрэм Тутанхамон икъэунэ къыщагъотыгъэ артефакт гъэшIэгъонхэм ате­шIыкIыгъэхэр зэрагъэлъэгъунхэ алъэ­кIыщт. Ижъырэ Египет щаIыгъыгъэ диным, ащ хэбзэ зэхэтыкIэу илъыгъэхэм защагъэгъозэн, зэтырагъэпсыхьэжьыгъэ пкъыгъохэм яшIуагъэкIэ Египет идунэе гъэшIэгъон хэхьанхэ алъэкIыщт.
Мэлылъфэгъум и 6-м нэс къэгъэлъэ­гъоныр зэIухыгъэщт. Искусствэр зышIогъэшIэгъонхэр ащ еплъынхэу зэхэщакIохэм рагъэблагъэх.
Лъэпшъыкъо
Фатим.