Непэ ныбжьыкIэ инспекторхэм я Урысые движение (ЮИД) зызэхащагъэр илъэс 52-рэ зэрэхъугъэм фэгъэхьыгъэ республикэ слет Мыекъуапэ илицееу N34-м щыкIуагъ. Ащ кIэщакIо фэхъугъэх АР-м и Къэралыгъо автоинспекциерэ гъэсэныгъэ тедзэ зыщызэрагъэгъотырэ Гупчэмрэ.

Районхэм ыкIи къалэхэм къарыкIыгъэ ныбжьыкIэ инспекторхэм яотряд анахь дэгъухэм ялIыкIохэр слетым зэфищагъэх.
Iофтхьабзэр шIуфэс гущыIэхэмкIэ къызэIуихыгъ АР-м и Къэралыгъо автоинспекцие ипащэу, подполковникэу Андрей Огурцовым. НыбжьыкIэ инспекторхэм яотрядхэр зэхэзыщэгъэ ветеранхэм, кIэлэегъа­джэхэм рэзэ­ныгъэ гущыIэхэр гъогу инспектор шъхьаIэм къафиIуагъ.
— НыбжьыкIэ отрядхэм ядвижение зызэхащагъэр илъэс 52-рэ зэрэхъугъэмкIэ зэкIэми сышъуфэгушIо. ГъогурыкIоным хэлэжьэрэ кIэлэцIыкIухэм ящыIэныгъэ ыкIи япсауныгъэ къызэтенэным зиIахьышIу хэзылъхьэрэ кIэлэегъаджэхэм «тхьашъуе­гъэпсэу» ясэIо. НыбжьыкIэхэм зафэзгъа­зэмэ, щынэгъончъэу гъогум щызекIонхэмкIэ шIэныгъэу яIэхэр агъэфедэнхэу, къэралыгъом ифэшъошэ цIыфэу щытынхэу афэсэIо, — хигъэунэфыкIыгъ Андрей Огурцовым.
МэфэкI чэфыгъор къаIэтыгъ Мыекъуа­пэ икIэлэцIыкIу творческэ купхэм ыкIи командэхэм ахэтхэм къагъэхьазырыгъэ къэгъэлъэгъоным. Командэхэр яIэпэIэсэныгъэкIэ зэхъожьыгъэх, зым ышIэрэм адрэхэр кIырыплъынхэ амал яIагъ, а зэпстэуми ныбджэгъуныгъэр, нэIосэныгъэр агъэпытагъэх. ЗэкIэми зэрифэшъуа­шэу дэгъоу зыкъагъэлъэгъуагъ, щытхъу тхылъхэр ыкIи нэпэеплъ шIуфхьафтынхэр аратыгъэх.

Хэгъэгу зэошхом ТекIоныгъэр къызыщыдахыгъэр илъэс 80 зэрэхъурэм ипэгъокIэу Урысые патриотическэ Iофтхьабзэу «ТекIоныгъэм игъогухэр!» зыфиIорэр рагъэжьагъ. Ащ АР-м и Къэралыгъо ав­тоинспекцие хэлажьэ. Мыр проекты­шху, Хэгъэгу зэошхом илIыхъужъхэм яшIэжь къызэтегъэнэгъэным, ныбжьыкIэ­хэр патриотизмэм фэпIугъэнхэм ыкIи тарихъ шIэныгъэу аIэкIэлъым зегъэушъом­бгъугъэным фэIорышIэ. Ащ къыдыхэлъы­тагъэу, Александр Твардовскэм ипоэмэу «Василий Теркин» зыфиIорэм жъынчэу кIэлэеджакIохэр къеджагъэх. Хэгъэгу зэошхом илъэхъан а тхыгъэм окопым, госпиталым, тыди зыщыхъурэм щеджэщты­гъэх, джы къызнэсыгъэми ар цIыфхэм якIас.
ЗэIукIэм зэфэхьысыжь къыфишIыгъ полицием иподполковникэу Бзэджэжъыкъо Мурат.
— НыбжьыкIэхэм зыкъызэIуахынымкIэ ыкIи тигъогухэм щынэгъончъагъэр ащыгъэпытэгъэнымкIэ слетыр амалышIоу щыт. КIэлэцIыкIу фыкъоныгъэхэр дэгъэзыжьыгъэнхэмкIэ, къэмыгъэхъугъэнхэмкIэ, тигъогухэм щынэгъончъагъэр ащыгъэпытэгъэнымкIэ АР-м и Къэралыгъо автоинспекцие зэрихьэрэр макIэп ыкIи ащ кIэух дэгъухэр иIэу къэнэфагъ. Къы­хэз­гъэщымэ сшIоигъу, кIэлэцIыкIухэр зыхэфэрэ авариехэм алъэныкъокIэ Iоф­хэм язытет нахь зыпкъ иуцуагъ. ИкIыгъэ илъэсым ахэм япхыгъэ гъогу хъугъэ-шIэгъэ 45-рэ агъэунэфыгъ, нэбгыри 5 ахэкIодагъ, зэкIэри автомобилым къадисыгъэх. ТапэкIи мы лъэныкъомкIэ ны-тыхэм Iоф адэтшIэщт. ЛъэсрыкIо кIэлэцIыкIухэм ягугъу къэтшIымэ, ахэр зыхэ­фэгъэ хъугъэ-шIэгъи 8 агъэунэфыгъ, нэбгыритIумэ шъобжхэр атещагъэх, зи хэкIодагъэп. БлэкIыгъэ илъэсым ипчъагъэхэм ябгъапшэмэ, мыр фэдитIукIэ нахь макI. Арышъ, Къэралыгъо автоинспекцием гъэсэныгъэм иучреждениехэр игъу­сэхэу зэрихьэрэ IофшIэным шIуагъэ къызэритыгъэм тегъэгушIо, джыри ар лъыдгъэкIотэщт, — къыIуагъ Бзэджэжъы­къо Мурат.
Iэшъынэ Сусан.