Пэтхъу-Iутхъур ыкIи гриппыр къызэузыхэрэм япчъагъэ зэрэбэм къыхэкIыкIэ эпидемиологием изытет щынэгъо чIыпIэм зэрит. Ащ фэгъэхьыгъэу Iофхэм язытет «Адыгэ макъэр» щыкIэупчIагъ щэфакIохэм яфитыныгъэхэр ыкIи цIыфым игупсэфыныгъэ къэухъумэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм.

Эпидемиологие лъыплъэнымкIэ отделым ипащэу Гурген Авакян къызэриIуа­гъэмкIэ, зэпахырэ узхэм яжъотыпIэ джыри республикэр хэт.
— Мы илъэсым ия 8-рэ тхьамафэ изэфэхьысыжьхэм къызэрагъэлъэгъуагъэмкIэ, гриппыр ыкIи пэтхъу-Iутхъур нэбгырэ мини 2 фэдизмэ къяутэкIыгъэу агъэунэфыгъ. Ау ащ ыпэрэ тхьамафэм егъэпшагъэмэ, ар тIэкIу нахь макI. Арэущтэу щыт нахь мышIэми, эпидемиологием ишапхъэу агъэнэфагъэм игъунапкъэ шъхьадэкIы. Къыхэгъэщыгъэн фае, джы нахь сымаджэхэрэр ныбжь зиIэхэр ары (нэбгырэ 1200-рэ). Адрэхэр — кIэлэцIыкIух (800 фэдиз). КIэлэеджэкIо 1500-рэ фэдизыр пэIудзыгъэ шIыкIэм тетэу джыри рагъа­джэх. ЕджэпIэ псаухэр зэфэшIыгъэхэу щытэп, классхэм ащыщхэр, къэсымэджэрэ пчъагъэм елъытыгъэу, тхьамафэ къэс агъэтIысых. Джащ фэдэу гриппыр къызэузыхэрэм япчъагъи хэхъуагъ, я 8-рэ тхьамафэм лабораторнэ уплъэкIунхэр зыфашIыгъэ­хэм ащыщэу 60-мэ ар къахагъэщыгъ, коронавирусыр къяузыгъэу нэбгыри 4 агъэу­нэфыгъ, — хигъэунэфыкIыгъ Гурген Авакян.
ИкIыгъэ илъэсым ибжыхьэ лъэхъан гриппым пэуцужьырэ вакцинэр Адыгеим щыпсэурэ нэбгырэ мин 299-мэ ахалъхьа­нэу агъэнэфэгъагъ. Ащ ишIуагъэ къызкIэмыкIуагъэмкIэ теупчIыгъ санитарнэ врачым.
— Гриппым пэуцужьырэ вакцинэр зыхалъхьанэу агъэнэфэ­гъэгъэ пчъагъэм тылъыIэсыгъэп, ащ ипроцент 50-р ары прививкэр зыфашIыгъэр. Арэу щытми, «коллективнэ иммунитетыр» идгъэкъугъэу мэхъу. Эпидемиер къызежьагъэм къыщыублагъэу уплъэкIунхэмкIэ гриппыр къызхагъэщыгъэхэм зэкIэми (нэбгырэ 300 фэдизым) вакцинэр ахэлъэп, — хигъэунэфыкIыгъ Гурген Авакян.
Санитарнэ врачым къызэриIуагъэмкIэ, тишъолъыр нахь къыщекIокIыхэрэр риновирусхэр, аденовирусхэр, метапневмовирусхэр, гриппэу «А-р» ыкIи «B-р». «Метапневмовирусым» епхыгъэ къэбархэр зэтыраIотыкIых ыкIи ар кIэу къежьагъэу, щынэгъо дэдэу цIыфхэм къашIошIы. Ащ епхыгъэуи упчIэр шъо­лъыр «Роспотребнадзорым» илIыкIо фэдгъэзагъ.
— Мы вирусым ащ фэдизэу ущыщынэнэу щытэп ыкIи ар кIэп, илъэс 20-м ехъугъэу къекIокIы. Илъэс къэс тишъолъыр щыд­гъэунэфыхэрэм ари ащыщ, адрэхэм афэдэу бгъэхъужьын олъэкIы, анахьыбэми мэфи 7-м къыкIоцI зэрэпхэтырэр, — хи­гъэунэфыкIыгъ Г. Авакян.
Iэшъынэ Сусан.

Сурэтыр: авторым ий.