Теуцожь район хьыкумым гъэIорышIэкIо компаниеу «Стройкомсервисым» иIофышIитIумэ пщыныжьэу арагъэхьыщтымкIэ унашъо ышIыгъ.

Урысые Федерацием и Уголовнэ кодекс ия 208-рэ статья ия 8-рэ Iахь зигугъу къышIырэ бзэджэшIагъэ зэрихьагъэкIэ (къолъхьэшхо ыштагъэкIэ) зыр, Урысыем и Уголовнэ кодекс ия 204.1-рэ статья ия 3-рэ Iахь зигугъу къы­шIырэ бзэджэшIагъэ зэрихьагъэкIэ (къолъхьэ­Iыхыным хэщэгъагъэкIэ) адрэр агъэмысагъ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ къыIэкIигъэхьэгъэ материалхэм атетэу Урысыем и Следственнэ комитет Адыгэ Рес­публикэмкIэ иследственнэ гъэIорышIапIэ уголовнэ Iофыр къызэIуихыгъ.
ЫпэкIэ макъэ къызэрагъэIугъагъэу, псэупIэ-коммунальнэ хъызмэтымкIэ фэIо-фашIэхэр зыгъэцэкIэрэ сатыу организацием иIофышIитIумэ Теуцожь районым псэолъэшIыным щыпылъ предпринимателыр къагъэгугъагъ сомэ миллиони 2,5-рэ къызаритыкIэ, псы чъыIэр зэраIакIагъахьэрэ гупчэ системэхэу сатыу организацием ыгъэIорышIэхэрэм унитIоу агъэпсыгъэр фыпашIэнхэу. Къуалъхьэм щыщ къаIахызэ, нэб­гыритIури хэбзэухъумэкIо къулыкъухэм яIофышIэхэм къаубытыгъэх.
Хьыкумым ышIыгъэ унашъом диштэу зым условнэу илъэси 6 хьапс тыралъхьагъ, илъэси 2-кIэ сатыу организациехэм зэхэщэн-унэшъошIын, административнэ-хъызмэт IофшIэнхэр ащызэрихьан фимытэу агъэнэфагъ, адрэм условнэу илъэси 3 хьапс тыралъхьагъ. Хьыкумым унашъоу ышIыгъэм хэбзэ кIуачIэ джыри иIэ хъугъэп.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ ипресс-къулыкъу