БаскетболымкIэ Урысыем ипервенствэ ишъолъыр финал едзыгъо текIоныгъэр къыщыдахыгъ олимпийскэ резервым испорт еджапIэу В.С. Максимовым ыцIэ зыхьырэм зыщызыгъасэхэрэм.

БлэкIыгъэ зыгъэпсэфыгъо мафэхэм къэралыгъо еджэпIэ лигэу «Локобаскет» зыфиIорэм къыдыхэлъытэгъэ финал ешIэгъу­хэр ыпшъэкIэ зигугъэу къэтшIыгъэ спорт еджапIэм щыкIуагъэх. Командэ анахь лъэш хъуным фэбэнагъэх муниципальнэ едзыгъохэм текIоныгъэр къащыдэзыхыгъэхэр.

Зэфэхьысыжьхэм къызэрагъэлъэгъуагъэмкIэ, 2009-рэ илъэсым къэхъугъэ кIалэхэу С.В. Золотцевамрэ В.А. Манютрэ агъасэхэрэм дышъэ медальхэр къахьыгъэх. Ахэр финалым Тэхъутэмыкъое районым илIыкIохэм щатекIуагъэх, пчъагъэр — 62:20. Джэрз медальхэр Мыекъопэ районым ибаскетболистхэм афагъэшъошагъэх. Республикэм икъэлэ шъхьаIэ икомандэ къэзыгъэлъэгъогъэ Никита Ястребовыр ешIэкIо анахь дэгъоу зэхэщакIо­хэм къыхахыгъ.
Бзылъфыгъэ командэхэм язэ­нэкъокъуи къэлэ спорт еджапIэм апэрэ чIыпIэр къыщыдихыгъ. Ащ илIыкIохэм финалыр Красногвардейскэ районым ипшъашъэхэм къашIуахьыгъ. Мыекъопэ районыр ящэнэрэ хъугъэ. Аделина Коноваловар ешIэкIо анахь дэгъоу алъытагъ. Спортсменкэхэм ятренерых Е.Р. Крбашянрэ Ю.В. Петровымрэ. Зэнэкъокъум изичэзыу едзыгъо чемпионхэр хэлэжьэщтых.