ВолейболымкIэ Мыекъуапэ ия 11-рэ зэIухыгъэ чемпионат мы мафэхэм рагъэжьагъ. Ащ бзылъфыгъэ ыкIи хъулъфыгъэ командэхэр хэлажьэх. ЗэIукIэгъухэр Адыгэ къэралыгъо университетым испортзал щэкIох. ЗэкIэмкIи командэ 24-мэ заушэты.

Шэмбэтым хъулъфыгъэ командэхэр зэнэкъокъугъэх. Зы зэIукIэгъур ары текIоныгъэр къыдэзыхыщтыр гъэунэфыгъэнымкIэ сетитф зищыкIэгъагъэр. «Джаджэ» ыкIи «СШ Шытхьал» зыфиIохэрэм яешIэгъу гъэшIэгъонэу кIуагъэ, апэрэхэр 3:2-у текIуагъэх.
Апэрэ турым изэфэхьысыжьхэр (хъулъфыгъэхэр):
«СШ N 1» (2009) – «Фыщт иветеранхэр» — 3:0, «СШ N 1» (2011) – «АГУ» — 0:3, «Джаджэ» — «СШ Шытхьал» — 3:2, «Приставы» — «Дружина» — 3:0, «Трудовые резервы» — «Вершина» — 3:0.
Бзылъфыгъэ командэхэр тхьэумафэ пэпчъ зэнэкъокъух. Апэрэ турым «АГУ-Ветеран» зыфиIорэр «Адыгея-Пантеры» дешIагъ ыкIи 2:0-у текIозэ, къыкIэлъыкIорэ сети 3-р шIуахьыгъ, пчъагъэр 2:3-у зэIукIэгъур аухыгъ. Мыщ нэмыкIэу командэхэм джыри зэIукIэгъуитIу яIагъ, ахэр Мыекъопэ спорт еджапIэу N 1-м илIыкIохэм ахьыгъэх.
Апэрэ турым изэфэхьысыжьхэр (бзылъфыгъэхэр):
«АГУ-Ветеран» — «Адыгея- Пантеры» — 2:3, «СШ N 1» (2007) – «СШ Шытхьал» — 3:0, «СШ N 1» (2010) – «Тульскэр» — 3:0.
Чемпионатым къыдыхэлъытэгъэ зичэзыу ешIэгъухэр командэхэм гъэтхапэм и 8 – 9-м яIэщтых.