Грант патриотическэ проектэу «ЛIыхъужъым исурэт» зыфиIоу республикэм щыпхыращыгъэр ыкIэм фэкIуагъ ыкIи ар игъэкIотыгъэу Мыекъуапэ игурыт еджапIэу N3-м щызэфашIыжьыгъ.

Iофтхьабзэм хэлэжьагъэх хэушъхьафыкIыгъэ дзэ операцием иветеранэу Юрий Виятик ыкIи мыщ щеджэгъэ кIалэу хэкIодагъэм янэу Валентина Мартиросян.
Шъугу къэдгъэкIыжьын, грант патрио­тическэ проектэу «ЛIыхъужъым исурэт» зыфиIорэм ныбжьыкIэ дзэ-патриотическэ зэхахьэу «ЗыкIыныгъэр» кIэщакIо фэхъугъ. Ащ иIэпыIэгъух фондэу «Хэгъэ­гум иухъумакIохэр» зыфиIорэм ишъо­лъыр къутамэрэ Адыгэ республикэ об­щественнэ организациеу «Хэушъхьа­фыкIыгъэ дзэ операцием иветеранхэм я Ассоциациерэ».
ТичIыгогъу Урысыем и ЛIыхъужъиплIэу ыкIи мы еджапIэр къэзыухыгъэхэу дзэ операцием хэкIодэгъэ нэбгырищмэ афэгъэхьыгъэ къэбархэу кIэлэ­еджакIохэм къагъэхьазырыгъэхэм ашIогъэшIэгъонэу ныбжьыкIэхэр, къырагъэ­блэгъэгъэ хьакIэхэр ядэIугъэх.
Проектым къыдыхэлъытагъэу дэпкъ гъэзетэу «ЗэкIэми ацIэ тыгу къэдгъэ­кIыжьыщт» зыфиIорэр, дзэкIолIхэм афашIыгъэ сурэтхэм ыкIи афатхыгъэ письмэхэм якъэгъэлъэгъон, дзэ опе­рацием хэлэжьэгъэ тичIыгогъу ЛIы­хъужъхэм ясурэтхэр ыкIи ящыIэныгъэ гъогу фэгъэхьыгъэ тхыгъэхэр зытет стендхэр агъэхьазырыгъэх. Ахэр фондым икъутамэ, гурыт еджапIэу N2-м ыкIи АР-м и Лъэпкъ музей ащагъэуцугъэх.
Стендхэм атет QR-кодымкIэ проектым ыкIи ЛIыхъужъхэм афэгъэхьыгъэ къэбархэр нахь игъэкIотыгъэу зэрагъэшIэнхэ алъэкIыщт. Хэгъэгум иухъумакIохэм яшIэжь гъэпытэгъэным епхыгъэ IофшIэныр джыри лъагъэкIотэщт.